Josué 11:1-23
11 Ima pasashcata yachaj chayashpami, Hazor llactamanda Jabín shuti reyca Madón llactamanda Jobab shuti reyman, Simrón llactamanda reyman y Acsaf llactamanda reyman villachun cacharca.
2 Shinallata norte ladopi urcucunamanda reycunaman, Kinéret pushtumanda sur ladopi pambacunamanda* gentecunaman, Sefelá pushtumanda gentecunaman shinallata indi huashajuj ladopi Dor laderacunamanda gentecunamanbashmi villachun cacharca.
3 Shinallata indi llujshimuj, indi huashajuj ladopi cananeo gentecunaman, urcucunamanda amorreo gentecunaman, hitita gentecunaman, perizita gentecunaman, jebuseo gentecunaman y Mizpá pambacunapi Hermón laderacunamanda heveo gentecunamanbashmi villachun cacharca.
4 Chaimi paicunaca paicunapa tucuilla soldadocunandi, ashtaca ashtaca caballocunandi y guerrapa carretacunandi llujshirca. Paicunaca mar manñapi arena cuenda ashtaca ashtacacunami carca.
5 Chai reycunaca gulpi tandanajungapami de acuerdo quidashcarca. Chaimi paicunaca Merom pugyu yacucuna ladoman rishpa israelitacunahuan macanajungapaj carpacunata chaipi shayachishcarca.
6 Chaimi Jehová Diosca Josuetaca cashna nirca: “Paicunataca na manllanachu cangui. Porque cayaca cashna horasllatami paicunata huañuchichun cangunapa maquipi churasha. Paicunapa caballocunatapash suchutami saquigringui. Paicunapa carretacunatapash rupachishpami saquigringui” nircami.
7 Josueca tucuilla soldadocunandimi, paicunataca cungashcapi Merom pugyu yacucuna ladopi atacarca.
8 Jehová Diosmi israelitacunapa maquipi paicunataca churarca. Chaimi israelitacunaca paicunata mishashpa Sidón la Grande llactacaman, Misrefot-Maim shuti pushtucaman shinallata indi llujshimuj ladopi Mizpé pambacunacaman* catishpa huañuchirca. Ni shujtallapash na causataca saquircachu.
9 Josueca Jehová Dios nishcashnami, paicunapa caballocunatapash suchuta saquirca. Y paicunapa carretacunatapash rupachishpa saquirca.
10 Chai jahuapash Josueca cutin tigrashpami, Hazor llactata mishashpa chai llactapa reytapash huañuchishpa saquirca. Porque Hazor llactaca tucui chai llactacunamanda principal llactami carca.
11 Chai llactapi gulpi gentecunataca* espadahuan huañuchishpami, paicunataca tucuchishpa saquirca. Ni shujtallapash na causataca saquircachu. Chai jipaca Hazor llactata rupachishpami saquirca.
12 Josueca chai reycunapa tucuilla llactacunatami misharca. Y chai llactacunapa reycunatapashmi tucuillata espadahuan huañuchishpa saquirca. Josueca Jehová Diosta sirvij Moisés mandashcashnami, paicunataca huañuchishpa* saquirca.
13 Shinapash israelitacunaca lomacunapi llactacunataca ni shujtallapash na rupachircachu. Solo Hazor shuti llactatallami Josueca rupachishpa saquirca.
14 Israelitacunaca chai llactacunamanda tucuilla mishashca cosascunahuan y animalcunahuanmi quidarca. Pero gulpi gentecunatami espadahuan huañuchishpa saquirca. Ni shujta na causataca saquircachu.
15 Moisesca Jehová Dios paita mandashcashnallatami Josuemanbash mandarca. Y Josueca Moisés mandashcashnallatami rurarca. Josueca, Jehová Dios Moisesman imata mandashcataca tucui tucuitami rurarca.
16 Josueca cai tucuilla alpacunatami misharca. Négueb pushtuta, Gosén alpacunata, Sefelá pushtuta, Arabá pushtutapashmi tucuillata misharca. Israel urcucunatapash y lomacunatapashmi mishashpa saquirca.
17 Shinallata Seír pushtucaman chayaj Halac shuti lomamanda Baal-Gad pushtucamanmi misharca. Baal-Gad pushtuca Líbano pambacunapi* y Hermón loma laderapimi carca. Chaipimi Josueca chai llactacunapa reycunataca japishpa huañuchirca.
18 Josueca unaitami chai reycunahuanga macanajushcarca.
19 Ni maijan llactapash israelitacunapa parteca na tucurcachu. Solo Gabaón llactapi causaj heveo gentecunallami ama macanajungapaj shuj tratota* rurarca. Israelitacunaca resto llactacunataca macanajushpami misharca.
20 Chai reycuna israelitacunahuan macanajungapaj richun y paicunata nimata na llaquishpa tucuchingapami, Jehová Diosca chai llactacunapa reycuna terco tercocuna tucuchun saquirca. Chai reycunaca Jehová Dios Moisesman mandashcashnami tucuchi tucuna carca.
21 Chai tiempopimi Josueca Hebrón, Debir, Anab urcucunamanda tucuilla anaquim gentecunata huañuchishpa saquirca. Shinallata Judá urcucunamanda y Israel urcucunamandapashmi anaquim gentecunataca huañuchishpa saquirca. Josueca chai gentecunatapash y chai gentecunapa llactacunatapashmi tucuchishpa saquirca.
22 Anaquim gentecunaca israelitacunapa alpacunapica ni shujllapash na quidarcachu. Solo Gaza, Gad, Asdod llactacunapillami quidarca.
23 Josueca, Jehová Dios Moisesman prometishcashnami chai gulpi alpacunataca japirca. Shinami Josueca cada jatun familiacunaman según imashina urmashcata repartichun chai alpacunataca como herencia israelitacunamanga curca. Chai alpacunapica guerracunapashmi tucurirca.
Notacuna
^ O “Arabá pushtumanda”.
^ O “Valle de Mizpé”.
^ O “tucuchitapacha tucuchishpa”.
^ O “Valle del Líbano”.
^ O “pactota”.
