Josué 13:1-33
13 Josueca ñami mayorlla carca. Chaimi Jehová Diosca paitaca cashna nirca: “Ñami mayorlla cangui. Pero todaviami ashtaca alpacunata mishanara* cangui.
2 Filisteocunapa y guesurita gentecunapa gulpi alpacunatami mishanara cangui.
3 (Egipto llactapi indi llujshimuj* ladopi tiaj Sihor* pushtumanda callarishpa, norte ladocaman Ecrón llacta manñacaman. Chai llactacunaca cananeo gentecunapa alpacunami can). Filisteocunapa 5 gobernantecuna mandanajuj cai alpacunatapashmi mishana cangui: gazeo gentecunapa, asdodita gentecunapa, asquelonita gentecunapa, guitita gentecunapa y ecronita gentecunapa alpacunata. Sur ladopi avim gentecunapa alpacunatapashmi mishana cangui.
4 Shinallata cananeo gentecunapa gulpi alpacunata, sidonio gentecunapa Meará alpacunata Afec llactacaman y amorreo gentecunapa alpa manñacamanmi mishana cangui.
5 Guebalita gentecunapa alpacunatapash, indi llujshimuj ladopi Líbano pushtupa gulpi alpacunatapash, shinallata Hermón loma manñapi Baal-Gad llactamanda Lebó-Hamat pushtucamanmi* mishana cangui.
6 Urcucunapi causajcunataca Líbano pushtumanda, Misrefot-Maim pushtucamanmi mishana cangui. Y gulpi sidonio gentecunatapashmi mishana cangui. Paicunataca ñucami israelitacunapa ñaupamanda llujchishpa cachasha. Canga solo ñuca mandashcashnami israelitacunamanga cai alpacunataca como herenciata repartina cangui.
7 Cunanga 9 jatun familiacunaman y Manasespa chaupi jatun familiamanmi como herencia cai alpacunataca repartina cangui” nishpami Taita Diosca nirca.
8 Manasespa chaishuj chaupi jatun familiacunandimi, Rubenba y Gadpa jatun familiacunaca Jordán indi llujshimuj ladopi Moisés cujpi paicunapa herencia alpacunataca japirca. Paicunaca Jehová Diosta sirvij Moisés cushcashnami japirca.
9 Paicunaca Arnón pambacuna* manñacunapi Aroer llactamanda callarishpami hasta Dibón pushtucaman japirca. Shinallata Arnón pambacuna chaupipi llactatapash y Medebá gulpi pambacunatapashmi japirca.
10 Paicunaca amorreo gentecunapa mandaj Sehón shuti reypa gulpi llactacunata hasta ammonita gentecunapa alpa manñacamanmi japirca. Sehón shuti reyca Hesbón llactamandami mandajurca.
11 Shinallata Galaad alpacunatapash, guesurita gentecunapa y maacatita gentecunapa alpacunatapashmi japirca. Paicunaca gulpi Hermón lomata, gulpi Basán pushtuta Salecá pushtucamanmi japirca.
12 Paicunaca Basán pushtumanda Og shuti reypa gulpi alpacunatapashmi japirca. Og shuti reyca Astarot y Edréi llactacunapimi mandan carca. (Paica refaím gentecunamanda quidashca último jarimi carca). Moisesmi paicunata mishashpa chai alpacunamanda llujchishpa cacharca.*
13 Pero israelitacunaca, guesurita gentecunata y maacatita gentecunataca na chai llactacunamanda llujchishpa cacharcachu. Chaimandami Guesur y Maacat llactacunamanda gentecunaca cunangaman Israel llacta gentecunahuan causanajun.
14 Levita jatun familiacunamanllami Moisesca na imapash alpa herenciataca curca. Israel llactapa Jehová Diosman rupachishca ofrendacunami levitacunapa herencia can. Chaica Taita Dios prometishcashnami can.
15 Moisesca Rubenba jatun familiamanga según familiami herenciataca curca.
16 Rubenba jatun familiapa alpacunaca, Arnón pambacuna* manñapi Aroer llactamanda callarishpa Arnón pambacuna chaupipi tiaj llactapash y Medebá ladolla gulpi pambacunapashmi paicunapa carca.
17 Hesbón llacta y chai llactapa tucuilla pueblocunami carca. Shinallata pambacunapi caj Dibón, Bamot-Baal, Bet-Baal-Meón pushtucunapashmi carca.
18 Jáhaz, Quedemot, Mefaat pushtucunapashmi paicunapa carca.
19 Quiryataim, Sibmá shuti pushtucuna y pambacunapi tiaj urcu jahuapi Zéret-Sáhar shuti pushtupashmi carca.
20 Bet-Peor pushtupash, Pisgá laderacunapash y Bet-Jesimot pushtupashmi carca.
21 Pambacunapi tucuilla llactacunapash y Hesbón llactapi mandajuj amorreo gentecunapa Sehón shuti reypa gulpi alpacunapashmi carca. Moisesca Sehón shuti reytapash y madianita gentecunapa Eví, Réquem, Zur, Hur y Reba shuti reycunatapashmi misharca. Chai reycunaca Sehón shuti reyta sirvishpami causan carca. Paicunaca chai llactapillatami causan carca.
22 Beor shuti adivinopa churi Balaam shuti runapashmi israelitacuna espadahuan huañuchishcapuracunapica carca.
23 Rubenba jatun familiapa alpacunaca Río Jordán manña ladocamanmi carca. Chai alpacunataca llactacunandi y comunidadcunandimi rubenita gentecunapa cada familiacuna como herenciata japirca.
24 Shinallata Gadpa jatun familiamanbashmi según cada familiaman Moisesca herenciata curca.
25 Paicunapa alpacunaca Jazer pushtupash, Galaadpi tiashca gulpi llactacunapashmi carca. Shinallata ammonita gentecunapa chaupi alpacunamanda callarishpa, Rabá pamba frentepi caj Aroer llactacamanmi carca.
26 Shinallata Hesbón llactamanda, Ramat-Mizpé y Betonim llactacunacamanmi carca. Y Mahanaim llactamanda, Debir llacta manña alpacunacamanmi carca.
27 Shinallata pambacunapi Bet-Haram, Bet-Nimrá, Sucot y Zafón shuti llactacunapashmi carca. Y Hesbón llactapa Sehón rey mandajuj resto llactacunapashmi carca. Chai alpacunaca indi llujshimuj Río Jordán ladomanmi carca. Chai alpacunaca Río Jordán manña ladocaman, shinallata mar de Kinéret* sur ladocamanmi carca.
28 Gadpa jatun familiaca según cada familiami chai alpacunataca llactacunandi y comunidadcunandi como herenciata japirca.
29 Shinallata Manasespa chaupi jatun familiamanbashmi según cada familiaman Moisesca herenciata curca.
30 Manasespa chaupi familiapa alpacunaca, Mahanaim llactamanda callarishpa tucuilla Basán llactacunapash y shinallata Basanmanda Og shuti rey mandajuj gulpi llactacunapash y Basán llactapi Jaír shuti runapa carpacunahuan rurashca gulpi llactacunapashmi carca. 60 llactacunapashmi paicunapa carca.
31 Shinallata Galaad alpacuna chaupitapash, Basán llactamanda Og shuti rey mandajuj Astarot y Edréi shuti llactacunapashmi Manasespa churi Makir shuti runapa chaupi familiapa carca. Según cada familiami alpacunataca repartirirca.
32 Chai alpacunatami Moisesca como herencia paicunamanga curca. Chai alpacunaca Moab llactapa desierto pambacunapimi carca. Chaica Río Jordán chaishuj ladopi, indi llujshimuj Jericó ladomanmi carca.
33 Pero Levipa jatun familiamanga Moisesca imapash herenciataca na curcachu. Porque Israel llactapa Jehová Diosmi pai prometishcashna paicunapa herencia can.
Notacuna
^ O “japinara”.
^ Hebreo shimipica “frente” nijunmi.
^ O “Río Nilomanda llujshimuj uchilla río”.
^ O “Hamat pushtupa entradacamanmi”.
^ O “tucuita quichurca”.
^ Caipica Genesaret lagomanda o mar de Galileamandami parlajun.
