Josué 14:1-15
14 Cai alpacunatami israelitacunaca Canaán alpacunapi como herenciata japirca. Paicunaca sacerdote Eleazarpash, Nun shuti runapa churi Josuepash, israelitacunapa jatun familiacunapa jefecunapash repartishcatami japinajurca.
2 Jehová Dios Moisesman mandashcashnami israelitacunapa 9 jatun familiacunamanbash y Manasespa chaupi familiamanbash sorteota rurashpa herenciataca curca.
3 Moisesca Manasespa chaishuj chaupi familiamanbash y chaishuj ishcai israelitacunapa jatun familiacunamanbash Río Jordán chaishuj ladomanmi* herenciataca cushcarca. Pero levitacunamanga chaishuj jatun familiacunaman herenciata cushcashnaca na imapash herenciataca curcachu.
4 José shuti runapa huahuacunataca* como ishcai jatun familiatashnami contarca. Paicunaca Manasés y Efraín jatun familiacunami carca. Levitacunamanga imapash alpa herenciataca na curcachu. Levitacunamanga paicuna causachun llactacunatallami curca. Paicunapa animalcunata michichunbashmi pambacunata curca. Shinallata paicunapa charishca cosascunapapashmi pambacunata curca.
5 Jehová Dios Moisesman mandashcashnami israelitacunaca alpacunata repartirca.
6 Judá jatun familiamanda huaquin jaricunaca Josuepamanmi Guilgal pushtuman rirca. Chaimi Jefuné shuti quenizita runapa churi Calebca Josuetaca cashna nirca: “Cadés-Barnea pushtupi cashpa canmanda y ñucamanda Jehová Dios* paita sirvij Moisesman imata nishcataca canga alimi yachapangui.
7 Jehová Diosta sirvij Moisés alpacunata pacalla chapachun ñucata Cadés-Barnea llactamanda cachajpica 40 huatacunatami charircani. Chaimanda tigramushpaca ñuca imata ricushcataca imatapash na pacashpa, cabaltami villarcani.
8 Aunque ñucahuan rishca ñuca huauquicuna, israelitacunata paicunapa nishcacunahuan manllachijpipash,* ñucaca tucui shunguhuanmi ñucapa Jehová Diostaca cazurcani.
9 Chai punllapimi Moisesca cashna nishpa jurarca: ‘Ñucapa Jehová Diosta tucui shunguhuan cazushcamandami, can sarushca alpacunaca canba y canba huahuacunapapash para siempre canga’ nirca.
10 Jehová Diosca pai prometishcashnami cai 45 huatacunata causashpa catichun saquihuashca. Israelitacuna desiertopi purinajujpi Jehová Dios Moisesman prometishca punllamandapacha cunangamanmi causashpa catijuni y cunanga ñami 85 huatacunata charini.
11 Moisés alpacunata pacalla chapachun cachahuashca punllapishnallatami ñucaca shinllira cani. Cunangamanmi tanto macanajungapaj y shuj cosascunapapash fuerzata charinira.
12 Shinaca Jehová Dios chai punlla ñucaman prometishcashna cai urcucunata ñucaman carahuai. Chai punllaca anaquim gentecuna jatun pircacunahuan muyundi pircashca llactacunapi causanajushcatami uyarcangui. Shina cajpipash Jehová Dios ñucahuan canataca seguromi cani. Jehová Dios prometishcashnami chai gentecunataca llujchishpa* cachasha” nircami.
13 Chaimi Josueca Jefunepa churi Calebtaca bendiciarca y Hebrón llactataca como herenciata curca.
14 Chaimandami cunan punllacaman Hebrón llactaca, Jefuné shuti quenizita runapa churi Calebpa herencia can. Porque Calebca Israel llactapa Jehová Diostami tucui shunguhuan cazurca.
15 Pundaca Hebrón llactataca Quiryat-Arbá nishpami rijsin carca. (Arbá shuti runaca anaquim gentecunamanda ashtahuan importante runami carca). Chai alpacunapica guerracunapashmi tucurirca.
Notacuna
^ Caipica indi llujshimuj ladomandami parlajun.
^ O “descendencia”.
^ O “Dios verdadero”. Glosariopi “Dios verdadero” shimita ricupangui.
^ Hebreo shimipica “paicunapa shunguta yacuyachijpipash” nijunmi.
^ O “tucuita quichusha”.
