Josué 18:1-28
18 Tucuilla israelitacunami* Siló llactapi tandanajushpa chaipi tabernáculo huasita* shayachirca. Porque paicunaca ñami chai alpacunataca mishashca carca.
2 Pero israelitacunapurapica 7 jatun familiacunaman alpa herenciata cunataca faltajurcarami.
3 Chaimi Josueca israelitacunataca cashna nirca: “Cangunaca, cangunapa punda taitacunapa Jehová Dios carashca alpacunata japingapaca ¿ima horacamanda shuyagringuichi?
4 Cada jatun familiamanda quimsa jaricunata agllaichi. Paicunataca alpacunata ricushpa, cada jatun familiacunaman chai alpata como herencia repartingapami shuj mapata trazashpa dibujachun* mandasha. Jipamanga paicunaca ñucapamanmi shamunga.
5 Chai alpacunataca 7 partecunapimi partina canguichi. Judapa jatun familiaca sur ladopimi paicunapa alpacunapi quidanga. Cutin Josepa huahuacunaca* norte ladopimi paicunapa alpacunapi quidanga.
6 Cutin cangunaca mapacunata trazashpa dibujashpami chai alpataca 7 partecunapi partina canguichi. Chai jipaca chaicunata ñucapaman apamujpimi ñucanchi Jehová Diospa ñaupapi sorteota rurasha.
7 Pero levitacunaca chai alpacunamandaca imapash alpataca na japingachu. Porque paicunataca Jehová Diosmi sacerdotecuna shina sirvichun agllarca. Shinallata Gadpa, Rubenba jatun familiacuna y Manasespa chaupi jatun familiapash ñami paicunapa alpa herenciataca indi llujshimuj Río Jordanba ladopi japirca. Chai alpacunataca Jehová Diosta sirvij Moisesmi curca” nircami.
8 Chai agllashca jaricunaca ringapami alistarirca. Shinallata Josueca chai alpamanda mapacunata dibujagrijuj jaricunataca cashna nishpami mandarca: “Alpata ricungapaj rishpa chai alpamanda mapacunata trazashpa dibujaichi. Chai jipaca ñucapaman shamunguichi. Y ñucaca Siló llactapi cangunamanda Jehová Diospa ñaupapimi sorteota rurasha” nirca.
9 Chaimi chai jaricunaca, chai alpata muyungapaj rishpa, chai alpata 7 partecunapi partishpa mapacunataca trazashpa dibujarca. Shinallata chai alpapi llactacuna imashna cajtami ricuchirca. Y chaicunataca shuj libropimi tandachirca. Chai jipami chai jaricunaca Siló llactapi shayachishca carpacunaman tigrashpa Josuepaman rirca.
10 Chai jipami Josueca Siló llactapi, Jehová Diospa ñaupapi paicunamandaca sorteota rurarca. Chaimi Josueca israelitacunapa 7 jatun familiacunaman alpacunataca partishpa curca.
11 Primer viajeta sorteota rurajpica Benjaminba jatun familiapami alpa herenciaca urmarca. Paicunaca según cada familiacunami alpataca japirca. Paicunapa alpaca Judapa huahuacunapa* y Josepa huahuacunapa* urmashca alpacunapa chaupipimi urmarca.
12 Benjaminba jatun familiapa alpa fronteraca norte jahua ladopica Río Jordanbimi callarijurca. Shinallata norte ladoman Jericó laderacamanmi vichai rijurca. Shinallata indi huashajuj ladoman urcuta vichai rishpa, Bet-Aven desiertocamanmi carca.
13 Chaimandaca sur ladoman Luz o Betel shuti llactapa laderacamanmi paicunapa fronteraca carca. Shinallata Bet-Horón Baja pushtupa sur ladopi tiaj urcuta urai rishpa Atarot-Addar pushtucamanmi paicunapa fronteraca carca.
14 Shinallata paicunapa fronteraca indi huashajuj ladocamanmi carca. Y Bet-Horón pushtupa sur ladopi tiaj urcumanda callarishpa, sur ladota muyushpa Quiryat-Baal o Quiryat-Jearim llactacamanmi carca. Chai llactaca Judá jatun familiapami carca. Shinami indi huashajuj ladopi alpa fronteraca carca.
15 Sur ladopica Quiryat-Jearim pushtu ladota callarishpa indi huashajuj ladocaman, Neftóah pugyu yacucamanmi paicunapa alpa fronteraca carca.
16 Chai fronteraca Hinón pambacunapi* tiaj urcu ladotami urai rijurca. Chaica norte ladopi Refaím pambacuna* ladopimi carca. Shinallata chai alpa fronteraca sur ladopi jebuseo gentecunapa laderatami Hinón pambacunacaman urai catijurca. Chaimandaca En-Roguel pushtucamanmi urai catijurca.
17 Shinallata paicunapa fronteraca norte ladocamanmi carca. Chaimandaca En-Semes pushtucaman y Guelilot pushtucamanmi carca. Chaica Adumim pushtuman vichai rina ladomanmi carca. Chaimandaca Rubenba churi Bohán shuti runapa rumicamanmi urai rijurca.
18 Chaimandaca norte ladoman rishpa Arabá pushtu ñaupapi tiaj laderata catishpa, Arabá pushtucamanmi urai catijurca.
19 Chai pushtumandaca Bet-Hoglá pushtupa norte ladopi laderata catishpa, Mar Saladopa* norte ladopi mar filo manñacamanmi carca. Chaica Río Jordanba sur ladopimi carca. Shinami sur ladopica alpa fronteraca carca.
20 Indi llujshimuj ladopica Río Jordanmi paicunapa frontera carca. Chai alpa fronteracunami Benjaminba huahuacunapa* según familia japina alpacunata muyujurca.
21 Benjaminba jatun familiaca según cada familiacunami cai llactacunataca japirca: Jericó, Bet-Hoglá, Émec-Queziz,
22 Bet-Arabá, Zemaraim, Betel,
23 Avim, Pará, Ofrá,
24 Kefar-Amoní, Ofní y Gueba. 12 llactacunami carca. Y comunidadcunapashmi carca.
25 Gabaón, Ramá, Beerot,
26 Mizpé, Kefirá, Mozá,
27 Réquem, Irpeel, Taralá,
28 Zelá, Ha-Élef, Jebusí o Jerusalén, Guibeá y Quiryat. 14 llactacunami carca. Y comunidadcunapashmi carca.
Chai alpacunatami Benjaminba huahuacunaca* según cada familiacuna japirca.
Notacuna
^ Hebreo shimipica “Tucuilla asambleami” nijunmi.
^ Hebreo shimipica “tandanajuna carpa” nijunmi.
^ O “imashina cashcata escribichun”.
^ O “descendencia”.
^ O “descendencia”.
^ O “descendencia”.
^ O “Valle de Hinón”. Hebreo shimipica “Hinonba huahuacunapa pambacuna” nijunmi.
^ O “Valle de Refaím”.
^ Caipica Mar Muertomandami parlajun.
^ O “descendencia”.
^ O “descendencia”.
