Josué 23:1-16
23 Jehová Dios Israel llactata paicunapa tucuilla contracunamanda salvashpa samachun saquishca ashtaca huatacuna jipa y Josuepash ña mayorlla cashpami,
2 Josueca gulpi israelitacunata, llactata ñaupaman pushaj jaricunata,* jefecunata, juezcunata y funcionariocunata tandachishpa cashna nirca: “Ñucaca ñami mayorllapacha cani.
3 Cangunata cuidangapami cangunapa Jehová Diosca cai tucuilla llactacunata mishashca. Chaitaca cangunallatami tucuita ricurcanguichi. Cangunapa Jehová Diosca cangunamandami macanajurca.
4 Ricuichi, ñucami cai llactapi quidashca alpacunataca cangunapa jatun familiacunaman por sorteo curcani.* Shinallata Río Jordanmanda callarishpa, indi huashajuj Mar Grandecamanmi* ñuca tucuchishca gulpi llactacunapi alpacunataca cangunaman curcani.
5 Cangunapa Jehová Diosmi paicunataca cangunapa ñaupamanda anchuchishpa chai alpacunamandapash llujchishpa cacharca.* Chaimi cangunapa Jehová Dios prometishcashna chai alpacunataca japircanguichi.
6 ”Moisesman Cushca Leyta escribishca libropi tucuillata cazungapaj y rurangapapash na manllanachu canguichi. Shinallata chai Leymandaca ni ali ladoman, ni lluqui ladoman nunca na anchurinachu canguichi.
7 Cai quidashca llactacunahuanbash nunca na chapurinachu canguichi. Paicunapa yanga dioscunapa shuticunatapash parlaitallapash na parlanachu canguichi. Ni chai dioscunapa shuticunapipash na juranachu canguichi. Y nunca na paicunataca sirvinachu canguichi, ni cunguritallapash na cungurinachu canguichi.
8 Chaipa randica imashinami cunangaman cangunapa Jehová Diosmandaca na caruyashcanguichi, shinallatami rurashpa catina canguichi.
9 Jehová Diosmi cangunapa ñaupamandaca jatun y shinlli llactacunataca llujchishpa cachanga. Cunan punllacamanga nipipash na cangunataca mishai ushashcachu.
10 Jehová Diosca cangunaman prometishcashnami cangunamanda macanajushca. Chaimandami cangunapuramandaca shujlla runa mil runacunata mishanga.
11 Shinaca cangunapa Jehová Diosta juyashpami pendiente causana canguichi.
12 ”Pero si canguna Taita Diosmanda caruyashpa, chai quidashca llactacunamanda gentecunahuan tandanajushpa, cangunapa ushicunata y churicunata paicunahuan cazarachishpa y randimanda chapurishpaca,
13 cangunapa Jehová Diosca chai llactacunata cangunapa ñaupamanda llujchishpa cachanataca yaitallapash na yanachu canguichi. Chai llactamanda gentecunaca, cangunapaca shuj trampashna y cangunapa huashapica astijuj azialshnami canga. Y cangunapa ñavipapash shuj casha cuendami canga. Cangunapa Jehová Dios carashca cai ali alpamanda canguna tucuringacamanmi shina canga.
14 ”Ricuichi, ñucaca ña huañunallami cani. Cangunapa Jehová Dios prometishca shimicuna shujllapash na fallashcataca alimi yachanguichi.* Tucuimi cangunapa alipallata pactarishca, ni shuj shimipash sin cumplishpaca na quidashcachu.
15 Imashinami cangunapa Jehová Dios cangunaman prometishca shimicunata pactachishca, shinallatami Jehová Diosca llaquichisha nishca shimicunatapash* tucuita pactachinga. Shinami cangunapa Jehová Diosca cai carashca ali alpacunamanda cangunataca tucuchinga.
16 Cangunapa Jehová Dios cangunata cumplichun mandashca tratota* canguna na cumplishpa shuj yanga dioscunatara sirvijpi y paicunapa ñaupapi cungurijpica Jehová Diosca ninandami cangunahuanga culiranga. Shinami Taita Dios carashca cai ali alpacunamandaca ñapash chinganguichi” nircami.
Notacuna
^ O “partircani”.
^ Caipica Mar Mediterraneomandami parlajun.
^ O “tucuita quichurca”.
^ Hebreo shimipica “tucui shunguhuan, tucui almahuan yachanguichi” nijunmi. Glosariopi “alma” shimita ricupangui.
^ O “pai maldicishcacunatapash”.
^ O “pactota”.
