Josué 5:1-15
5 Río Jordanba indi huashajuj ladopi* causaj amorreo gentecunapa y mar ladopi causanajuj cananeo gentecunapa tucui reycunaca, israelitacuna Río Jordanda yalingacaman Jehová Dios paicunapa ñaupapi chai yacucunata chaquichishcatami uyarca. Chaita uyashpami chai reycunaca ñapash ninanda manllai callarirca.* Israelitacunahuanbash macanajunataca ninandami manllanajurca.
2 Chai punllacunapica Jehová Diosca Josuetaca cashnami nirca: “Israelita jaricunata cutin circuncisionda* rurangapaj rumi cuchillocunata rurai” nirca.
3 Chaimi Josueca rumi cuchillocunata rurashpa Guibeat-Haaralot* shuti pushtupi israelita jaricunata circuncisionda rurarca.
4 Macanajunata ali yachaj tucui jaricuna* Egipto llactamanda llujshishpa desiertota rinajushpa huañushcamandami, Josueca israelita jaricunataca circuncisionda rurarca.
5 Egipto llactamanda llujshishca tucui jaricunaca circuncisionda rurashcami carca. Pero desiertopi nacirishca jaricunamandaca ni maijan na circuncisionda rurashcachu carca.
6 Egiptomanda llujshishca tucuilla alipacha macanajunata yachaj jaricuna huañungacamanmi, israelitacunaca 40 huatacunata desiertopi purinajurca. Paicunaca Jehová Diosta na cazushcamandami huañurca. Paicunataca ashtaca lechepash y ashtaca mielpash tiaj alpacunataca nunca na ricunguichichu nishpami Jehová Diosca jurarca. Jehová Diosca cai alpacunatami cangunapa punda taitacunaman carasha nishpa prometishcarca.
7 Shinapash paicunapa randica paicunapa huahuacunamanmi cai alpacunataca curca. Paicunatami Josueca circuncisionda rurarca. Porque paicunataca na ñanbillata circuncisiondaca rurashcachu carca.
8 Tucui jaricunata circuncisionda rurashca jipami, jaricuna ali tucungacaman israelitacunaca carpacunata shayachishca pushtupillata quidarca.
9 Chai jipami Jehová Diosca Josuetaca “Egipto llactamanda gentecuna burlarishcataca cunanmi anchuchisha”* nircami. Chaimandami cunan punllacaman chai pushtutaca Guilgal* nishpa rijsin.
10 Israelitacunaca Guilgal pushtupimi quidarcara. Y Jericó llactapa chaquishca pambacunapimi, primer quillapa día 14ta chishi horas Pascua* Fiestataca rurarca.
11 Paicunaca Pascua Fiestata rurashca cayandi punllallatami alpapi fucushcacunata micurca. Chaicunaca levadura illa tanda y camllashca granocunami carca.
12 Alpapi fucushcacunata micushca punllami maná tandaguca tucurirca. Israelitacunapa maná tandagu ñana tiajpimi, chai huataca Canaán alpacunapi fucushcacunata micui callarirca.
13 Josueca Jericó llacta ladopi cashpami shuj runa paipa ñaupapi shayajujta ricurca. Chai runaca paipa maquipica shuj espadatami charijurca. Chaimi Josueca chai runapaman rishpa cashna tapurca: “¿Ñucanchipa ladochu cangui o ñucanchi contracunapa ladochu cangui?” nishpami tapurca.
14 Chaimi chai runaca “na, ñucaca Jehová Diospa soldadocunata mandajmi* cani” nirca. Chaita uyashpami Josueca cungurishpa alpacaman cumurishpa cashna nirca: “Ñuca amolla, ñucaca quiquinba sirvijmi capani. ¿Imatata ñucamanga ningapaj munapangui?” nircami.
15 Jehová Diospa soldadocunata mandajca Josuetaca cashnami nirca: “Canba sandaliata llujchi porque can sarujuj pushtuca sagrado pushtumi can” nircami. Shina nijhuanmi Josueca pai nishcashna rurarca.
Notacuna
^ Hebreo shimipica “mar ladoman” nijunmi.
^ Hebreo shimipica “paicunapa shunguca yacuyarca” nijunmi.
^ Glosariopi “circuncisión” shimita ricupangui.
^ Cai shutica “jaricunapa parte pundagupi aicha caraguta cuchushca loma” nijunmi.
^ O “macanajungapaj edadta charij jaricuna”.
^ Hebreo shimipica “cangunapa jahuamanda vultiachisha” nijunmi.
^ Cai shutica “vultiachina o vultiachishpa anchuchina” nijunmi.
^ O “Fiesta de la Pascua”. Glosariopi “Fiesta de la Pascua” shimita ricupangui.
^ O “soldadocunapa jefemi”.
