Josué 7:1-26
7 Israelitacunaca tucuchi tucungapaj separashca cosascunahuan Taita Dios imata rurachun mandashcashnaca na rurarcachu. Porque Judá jatun familiamanda Acán shuti runaca tucuchi tucungapaj separashca cosascunamandami pacalla japishcarca. Chaimi Jehová Diosca israelitacunahuanga ninandapacha culirarca. Acán runaca Carmí shuti runapa churi, Zabdí shuti runapa nieto y Zérah shuti runapa familiamandami carca.
2 Josueca Jericó llactamandami, Hai shuti llactata pacalla chapachun huaquin jaricunata cacharca. Hai shuti llactaca Bet-Aven llacta ladolla y Betel llactapa indi llujshimuj ladomanmi carca. Chai jaricunataca Josueca “chai llactata pacalla chapangapaj vichai richi” nircami. Shina nijpimi chai jaricunaca vichai rishpa chai llactata pacalla chaparca.
3 Chai jaricuna tigramushpaca Josuetaca cashnami nirca: “Tucuilla soldadocunata cachanaca na minishtirinllu. Porque Hai llactapica ashallacunallami causan. Chai llactataca solo 2 mil o 3 mil soldadocunahuanllata mishashunllami. Yangami gulpi soldadocunata chaiman cachashpa shaijuchingui” ninajurcami.
4 Chaimi 3 mil soldadocuna vichai rirca. Pero Hai llactamanda jaricuna tuparimujpimi soldadocunaca pacajushpa calparca.
5 Hai llactamanda jaricunaca 36 israelita soldadocunatami huañuchirca. Israelita soldadocunataca llacta pungumanda Sebarim* pushtucaman catishpami bajadapi paicunataca huañuchinajurca. Chaimi israelita soldadocunaca shungu ucupi ninanda manllarishca carca.
6 Chaita ricushpami Josueca ninanda llaquirishpa pai churajushca ropata liquishpa Jehová Diospa Arca ñaupapi cungurishpa alpacaman cumurirca. Josuepash, Israel llactata ñaupaman pushaj jaricunapashmi* chishicaman shinallata ruranajurca. Y paicunapa umapipashmi alpata churarinajurca.
7 Josueca cashnami nirca: “Aij Tucuita Mandaj Jehová Dioslla ¿imapata israelitacunataca Jordán yacucunata yalichimurcangui? ¿Amorreo gentecunapa maquipi entregashpa ñucanchita tucuchichunllu apamushcangui? Río Jordán chaishuj ladopi* quidashpachari ali canchiman carca.
8 Jehová Dioslla perdonahuai ¿imata nipashayari? Israel llactaca ñucanchi contracunamanda pacajushpami rishca.
9 Cananeo gentecuna y cai alpacunamanda tucuilla gentecuna chaita yachaj chayashpaca, ñucanchi muyundipi shayarishpami ñucanchitaca gulpita huañuchinga. Shina rurajpimi ñucanchi shutipash cai alpamanda chingaitapacha chinganga. Y ¿nachu canba respetashca shutipash pingaipi quidanga?” nircami.
10 Chaimi Jehová Diosca Josuetaca cashna nirca: “Jatari, ¿imashpata alpacaman chayajta cumurishca cangui?
11 Israel llactami pecadota rurashca. Paicunaca ñucahuan rurashca tratotami* na cumplishca. Tucuchi tucungapaj separashca cosascunamanda shuashpami, paicunapa cosascunapurapi pacashca.
12 Chaimandami israelitacunaca paicunapa contracunata mishaitaca na ushanga. Paicunapa contracunamandaca pacajushpami calpanajunga. Porque paicunaca tucuchi tucungapaj separai tucushcami can. Ñuca huañuchichun nishca personata huañuchijpillami ñucaca cangunataca ayudasha.
13 Jatari, israelitacunataca prepararichun mandai. Paicunataca cashna ni: ‘Caya punlla Taita Diospa ñaupapi presentaringapaj prepararichi. Porque Israel llactapa Jehová Diosca cashnami nin: “Israel llactalla pecadota rurashca shuj runami cangunapurapica can. Chai runata huañuchingacamanmi cangunapa contracunata mishaitaca na ushanguichi.
14 Caya tutamandatami cada jatun familia presentarina can. Y Jehová Dios agllashca jatun familiamandaca cada familiami presentarina can. Shinallata Jehová Dios agllashca familiamandami cada huasi ucupuracuna presentarina can. Shinallata Jehová Dios agllashca huasi ucupuramandaca cada jarimi presentarina can.
15 Tucuchi tucungapaj separashca cosascunata japishca personaca rupachi tucunami can. Chai personaca paipa tucui charishcacunahuanmi rupachi tucuna can. Porque Jehová Dioshuan rurashca tratotami na cumplishca. Y shinallata Israel llactapimi pinganai nalitapacha rurashca” ninmi’ ningui” nircami.
16 Cayandi punllaca Josueca tutamandata jatarishpami, cada jatun familia presentarichun cayarca. Chaicunamandaca Judá shuti jatun familiami agllai tucurca.
17 Chaimi Judapa jatun familiamanda familiacuna presentarichun cayarca. Chai familiacunamandaca zerahita gentecunapa familiami agllai tucurca. Chai jipaca zerahita gentecunapa familiamanda cada jari presentarichunmi cayarca. Chai jaricunamandaca Zabdí shuti runapa familiami agllai tucurca.
18 Y ultimopica Zabdí shuti runapa familiamandami cada jarita cayarca. Paicunamandaca Acán shuti runami agllai tucurca. Acanga Carmí shuti runapa churi, Zabdí shuti runapa nieto, Zérah shuti runapa familiamanda y Judapa jatun familiamandami carca.
19 Chaimi Josueca Acán runataca cashna nirca: “Ñuca huahualla, Israel llactapa Jehová Diosta respetashcata ricuchispa paipa ñaupapi villai. Por favor, can imata rurashcata villahuai. Imatapash na pacashpa tucuita villahuai” nircami.
20 Shina nijpimi Acanga Josuetaca cashna nirca: “Ciertomi can, ñucami Israel llactapa Jehová Diospa contra pecadota rurashcani. Caitami rurarcani:
21 chai llactata mishashpa tandachishca cosascunapurapimi Sinar llactamanda fino ropata, 200 siclos de platata* y shuj librata* pesaj orota ricushpa ninanda munashpami japircani. Chaicunataca ñuca carpa huasi alpa ucupimi pambarcani. Platapash, oropash ashtahuan ucuman pambashcami can” nircami.
22 Chai ratomi Josueca huaquin runacunata cacharca. Chaimi chai runacunaca Acán runapa carpa huasiman calpashpa rirca. Chai carpa huasi alpa ucupimi fino ropatapash, platatapash y orotapash pacashcata tarirca.
23 Chai cosascunataca, carpa huasimanda llujchishpami Josuepaman y gulpi israelitacunapaman aparca. Y chai cosascunataca Jehová Diospa ñaupapimi churarca.
24 Josuepash y tucuilla israelitacunapashmi Zérah runapa familiamanda Acán runataca platandi, fino ropandi, orondi, paipa churicunandi, ushicunandi, torocunandi, burrocunandi, llamacunandi, chivocunandi, paipa carpa huasindi y paipa tucui charishcacunandi Acor pambacunaman* apashpa rirca.
25 Chaipimi Josueca cashna nirca: “¿Imashpata ñucanchitaca shina llaquichishcanguiyari? Cunanga Jehová Diosmi candaca llaquichinga” nircami. Chai jipami gulpi israelitacunaca, paitapash y paipa familiatapash rumicunahuan pigashpa huañuchirca. Shina rurashca jipami paicunataca rupachirca. Paicunataca rumicunahuan pigashpami huañuchirca.
26 Y Acanba jahuapimi rumicunata mundunarca. Y chai rumicunaca cunangamanmi chai pushtupillata mundunashca can. Shina rurajpimi Jehová Diospa manllanai culirashcapash yalirca. Chai razonmandami chai pushtutaca cunangaman Acor pambacuna* nishpa rijsin.
Notacuna
^ Cai shutica “canteracuna” nijunmi.
^ Caipica indi llujshimuj ladomandami parlajun.
^ O “pactotami”.
^ Shuj siclo de plataca shuj pedazo de plata materialmi carca y hebreocunapa pesana medidami carca y valortapash charinmi carca. Apéndice B14ta ricupangui.
^ Hebreo shimipica “50 siclos” nijunmi. Apéndice B14ta ricupangui.
^ O “Valle de Acor”.
^ O “Valle de Acor”. Cai shutica “llaquicuna o problemacuna” nijunmi.
