Josué 8:1-35
8 Jehová Diosca Josuetaca cashnami nirca: “Ama manllaichu, gulpi soldadocunandi Hai llactamanda gentecunahuan macanajungapaj vichai rilla. Ricui, Hai llactamanda reytapash, gentecunatapash, chai llactatapash y chai alpacunatapashmi canman cushcani.
2 Jericó llactata y Jericó llactapa reyta rurashcashnallatami Hai llactata y Hai llactapa reytapash rurana cangui. Pero cai viajeca chai llactata mishashpa tandachishca cosascunahuan y animalcunahuanbashmi quidaita ushanguichi. Chai llactata atacangapaca soldadocunata pacalla chai llacta huasha ladopi churangui” nircami.
3 Chai jipaca Josuepash y gulpi soldadocunapashmi Hai llactahuan macanajungapaj vichai rirca. Josueca 30 mil alipacha shinlli soldadocunata agllashpami, paicunataca tutata cacharca.
4 Josueca paicunataca cashnami nirca: “Ricuichi, chai llactata atacangapaca chai llacta huasha ladopi pacajunguichi. Chai llactamandaca ama yapata caruyanguichichu. Gulpimi listo cana canguichi.
5 Ñucaca, ñucahuan caj soldadocunandimi llactamanga quimirishun. Hai llactamanda gentecuna ñucanchita chaishuj viajeshna atacangapaj llujshijpica paicunamandaca calpashpami llujshishun.
6 Paicuna ñucanchita catiriashpa llujshijpimi paicunataca chai llactamanda caruyachishun. Chaimi paicunaca ‘chaishuj viajeshnallatami ñucanchimanda calpashpa llujshinajun’ ningami. Chaimi ñucanchica calpashpa llujshishun.
7 Y chaimi cangunaca pacajushca pushtumanda chai llactata atacangapaj llujshina canguichi. Cangunapa Jehová Diosmi chai llactataca tucuchichun cangunapa maquipi entreganga.
8 Jehová Dios mandashcashnami rurana canguichi. Chai llactata mishashca jipaca, chai llactataca rupachishpami saquina canguichi. Ñucami shina rurachun mandajuni” nircami.
9 Josueca chai llacta huasha ladopi pacajuchunmi huaquin soldadocunataca cacharca. Chaimi paicunaca Betel llacta y Hai llacta chaupipi pacajungapaj rirca. Hai llactamanda indi huashajuj ladomanmi pacajungapaj rirca. Cutin Josueca resto soldadocunahuanmi chai tutaca pacarirca.
10 Jipamanga tutamandata jatarishpami Josueca soldadocunata tandachirca. Josuepash, Israel llactata ñaupaman pushaj jaricunapashmi* soldadocunata ñaupashpa Hai llactamanga rinajurca.
11 Josuehuan cashca gulpi soldadocunami vichai rishpa Hai llactapa ñaupapi shayarirca. Paicunaca Hai llactapa norte ladomanmi carpacunataca shayachirca. Paicuna tianajushca pushtupi y Hai llactapica shuj jatun pambami tiarca.
12 Chaicamanga Josué mandashcashnami 5 mil soldadocunaca Betel llacta y Hai llacta chaupipi atacangapaj listo pacajushca carca. Paicunaca Hai llactamanda indi huashajuj ladopimi carca.
13 Mayoría soldadocunaca Hai llactapa norte ladopimi carca. Cutin atacangapaj pacajushca soldadocunaca, Hai llactamanda indi huashajuj ladopimi carca. Shinallata chai tutaca Josueca chai pamba chaupicamanmi rirca.
14 Chaita ricushpami Hai llactamanda reypash y chai llactamanda jaricunapash tutamandata ñapash jatarishpa israelitacunahuan macanajungapaj desierto ladoman rirca. Shinapash Hai llactamanda reyca chai llacta huasha ladoman huaquin israelita soldadocuna pacajushca cashcataca na yacharcachu.
15 Hai llactamanda jaricuna atacajpimi, Josuepash y paihuan caj gulpi israelitacunapash desiertoman rina ñanda pacajushpa rirca.
16 Chaimi paicunata pactangapaj gulpi Hai llactamanda gentecunata cayachun cacharca. Shinami paicunaca Josueta catishpa llactamandaca caruyarca.
17 Hai llactamanda y Betel llactamanda gulpi gentecunami israelitacunataca catiria llujshirca. Paicunaca llactamanda pungucunata pascaria saquishpami, israelitacunataca catiria llujshirca.
18 Chaimi Jehová Diosca Josuetaca cashna nirca: “Canba maquipi charijushca lanzata Hai llacta ladoman ricuchi. Porque chai llactataca canba maquipimi cugrini” nircami. Shina nijpimi Josueca paipa maquipi charijushca lanzataca chai llacta ladoman ricuchishpa maquita chutarca.
19 Josué maquita chutajhuanmi pacalla atacangapaj shuyanajuj soldadocunaca calpashpa, Hai llactaman yaicushpa chai llactataca misharca. Chai ratomi chai llactataca rupachishpa saquirca.
20 Hai llactamanda jaricunaca tigrarishpami, Hai llacta jahua cielocaman ushashcata cushnijujta ricurca. Paicunaca pacajushpa ringapapash fuerza illami quidarca. Chaimi desiertoman pacajushpa calpanajuj israelita soldadocunaca tigrashpa contracunata catirca.
21 Atacangapaj pacajushca soldadocuna llactata mishashcata y chai llacta cushnijujta ricushpami Josuepash y gulpi israelita soldadocunapash Hai llactamanda jaricunata atacangapaj tigrarca.
22 Chaimi chaishuj israelita soldadocunaca llactamanda llujshishpa chaishuj israelita soldadocunata tuparingapaj rirca. Shinami Hai llactamanda jaricunataca chaupipi churashpa gulpita huañuchirca. Paicunaca nipita na escaparichunga saquircachu.
23 Pero Hai llactamanda reytaca causata japishpami Josuepaman aparca.
24 Israelita soldadocunaca Hai llactamanda gulpi gentecunatami, paicunata catinajushca desiertopi espadahuan huañuchirca. Chai jipaca israelita soldadocunaca Hai llactaman cutin tigrashpami chai llactata espadahuan tucuchishpa saquirca.
25 Chai punllaca Hai llactamanda gulpi gentecunami huañurca. Totalca 12 mil gentecuna tanto jaricuna y huarmicunami huañurca.
26 Josueca Hai llactamanda gulpi gentecunata huañuchingacamanmi* maquipi lanzataca chutaria charijurca.
27 Israelitacunaca Jehová Dios Josueman mandashcashnami animalcunata y mishashpa tandachishca cosascunatapash japinajurca.
28 Josueca chai llactata rupachishpami rumi mundunda saquirca. Y chai llactaca cunangamanmi shinallata tiajun.
29 Hai llactamanda reyta huañuchishpami chishangacaman jatun racu caspipi* huarcushpa saquirca. Josueca ña indi huashajunalla cajpimi Hai llactamanda reypa cuerpotaca jatun racu caspimanda uriajuchichun mandarca. Chai reypa cuerpotaca llacta pungu entradapi shitashpami paipa jahuapica ashtaca rumicunata mundunashpa saquirca. Y chai rumi mundunga cunangamanmi chaipillata tiajun.
30 Chai jipaca Israel llactapa Jehová Diosmanmi, Josueca shuj altarta Ebal lomapi rurarca.
31 Jehová Diosta sirvij Moisés israelitacunaman nishcashna y Moisesman Cushca Leypi escribishcashnami rurarca. Moisesman Cushca Leypica cashnami escribishca tiajun: “Entero rumicunahuanmi chai altartaca rurana can. Chaita rurangapaca fierro herramientataca na utilizanachu can” nijunmi. Chai altar jahuapimi Jehová Diosmanga rupachina ofrendacunata* y paihuan amigo cashpa catingapaj ofrendacunata* cararca.
32 Chai jipami israelitacunapa ñaupapi Moisés escribishca Leyta copiashpa Josueca chai rumicunapi escribirca.
33 Tucuilla israelitacuna, llactata ñaupaman pushaj jaricuna, funcionariocuna y juezcunapashmi Arcapa ishcandi ladopi shayanajurca. Jehová Diospa Arca del Pactota* apanajuj levita sacerdotecunapa ñaupapimi shayanajurca. Chaipica shuj llactamanda causangapaj shamushca gentecunapash, israelitacunapashmi carca. Chai gentecunamanda chaupica Guerizim loma ñaupapimi carca. Cutin chaishuj gentecunaca Ebal loma ñaupapimi carca. (Paicunaca Jehová Diosta sirvij Moisés mandashcashnami rurarca). Israel llacta bendiciai tucuchunmi paicunaca chashna rurarca.
34 Chai jipami Josueca Leypi tucui ima nijujtapash, tanto bendiciongunatapash y maldiciongunatapash tucuicuna uyajta liirca. Paica libropi escribishca Leytaca tucuitami liirca.
35 Moisés imata mandashcataca Josueca tucui Israel llacta congregacionba ñaupapimi tucui tucuita liirca. Paica huarmicuna, huahuacuna, paicunapurapi shuj llactamanda causangapaj* shamushca gentecunapash uyajtami liirca.
Notacuna
^ O “tucuchi tucuchingacamanmi”.
^ O “quiru”. Glosariopi “jatun racu caspi” shimita ricupangui.
^ O “ofrenda quemada”. Glosariopi “ofrenda quemada” shimita ricupangui.
^ O “ofrenda de paz”. Glosariopi “ofrenda de paz” shimita ricupangui.
^ Glosariopi “Arca del Pacto” shimita ricupangui.
^ Hebreo shimipica “puringapaj” nijunmi.
