Apocalipsis 14:1-20
14 Chai jipaca, Maltun Llamagu Sion shuti urcupi shayajujtami ricurcani. Paihuanga 144 mil gentecunami carca. Paicunapa frentepica Maltun Llamagupa shuti y paipa Taitapa shutipashmi escribishca carca.
2 Shinallata jahua cielomandaca shuj jatun cascada yacucuna ushashcata* huacajunshna, shinllita culun ninshnami uyarimurca. Chai uyarishcaca, arpata tocashpa candanajunshnami carca.
3 Chai 144 mil gentecunaca, mandangapaj tiarina pushtu* ñaupapi, chuscu querubingunapa* ñaupapi y ancianocunapa ñaupapimi shuj mushuj canciondashna candanajurca. Chai canciondaca nipipash na yachajuita usharcachu. Solo 144 milcunallami chai mushuj canciondaca yachajuita usharca. Paicunataca Taita Diosmi cai alpamanda randirca.
4 Paicunaca ni maijan huarmicunahuanbash na mapayashcarcachu. Ashtahuangarin nipihuan na paicunaca cashcarcachu. Paicunami Maltun Llamagu maita rijpipash Maltun Llamagutaca catishpa rin. Paicunaca cai mundopi gentecunamanda randishcacunami can. Taita Diosman carana y Maltun Llamaguman carana primero cozechashca granocunashnami can.
5 Paicunaca ima llullatapash na nishcarcachu. Ni ima pecadotapash na charishcarcachu.
6 Shuj ángel cielota volajujtapashmi ricurcani. Chai angelca, tucui llacta gentecunaman, tucui jatun familiacunaman, tucui idiomacunata parlajcunaman y tucui pueblocunamanmi, para siempre tiashpa catina ali villaicunata predicajurca.
7 Chai angelca shinllitami cashna nijurca: “Taita Diosta manllaichi, paita alabaichi. Porque gentecunata juzgana horasca ñami chayamushca. Chaimandami jahua cielota, cai alpata, mar yacucunata y pugyucunata ruraj Taita Diosta adorana canguichi” nijurcami.
8 Chai jipaca, shuj angelpash shamushpami cashna nijurca: “Ñamari urmashca. Importante Babilonia Llactaca ñami urmashca. Paimi gentecunamanga paipa vinota ufiachishca. Chai vinoca gentecuna huainayana juchapi* paihuan urmashcatami ricuchijun” nircami.
9 Chai jipaca shuj tercer angeltapashmi ricurcani. Paica shinllitami cashna nirca: “Si pipash primer manllanai sacha animalta y paipa estatuata adorashpa y paipa frentepi o paipa maquipi señalta charishpaca,
10 Taita Diospa vinotapashmi ufianga. Chai vinoca Taita Diospa ninan culirashcatami ricuchin. Chai vinoca na imahuanbash chapushcachu can. Chai vinotami Taita Diosca paipa copapi churanga. Chai copapimi Taita Diosca paipa ninan culirashcata churanga. Shinallata paicunaca, angelcunapa ñaupapi y Maltun Llamagupa ñaupapimi ninahuan, azufrehuan llaquichi tucunga.
11 Paicunata sufrichijuj nina cushnica para siempremi vichai rijungalla. Manllanai sacha animaltapash, paipa estatuatapash y chai sacha animalpa señalta chasquishcacunaca tuta y punllami llaquichi tucunga, na samangachu.
12 Chaimandami Taita Diospa mandamientocunata cazuj y Jesuspi confiashpa causajuj Taita Diospa separashcacunaca* aguantashpa catina can”.
13 Jahua cielomandaca cashna parlamujtapashmi uyarcani: “Caitaca escribinami cangui: ‘Señor Jesuspa discipulocunaca* cunanmanda vichai huañushpaca cushillami canga. Taita Diospa espíritu santoca ninmi, paicunapa ruraicunamandaca samanami can. Porque Taita Diosca paicunapa ali ruraicunataca na cungangachu’”* nircami.
14 Chaipimi shuj yurajlla fuyuta ricurcani. Chai fuyupica runapa churiman parecidoshnalla tiajujtami ricurcani. Paica shuj oro coronata umapi churajushcami carca. Shinallata shuj filo filo hocestami maquipica charijurca.
15 Shuj angelca Taita Diospa santo nishca pushtumanda* llujshimushpami, fuyu jahuapi tiajujtaca shinllita cashna nirca: “Hocesta japishpa cozechai callari. Alpapi fucushcataca canba hoceshuan cozechailla. Granoca ñami fucushca can. Cozechana tiempoca ñami chayamushca” nircami.
16 Chaimi fuyupi tiajujca, cai alpapi fucushcataca, paipa hoceshuan cozecharca.
17 Jahua cielopi Taita Diospa templo huasimandaca shuj angelpashmi llujshimurca. Paipashmi shuj filo filo hocesta charijurca.
18 Altarmandaca shuj angelpashmi llujshimurca. Paica ninata mandana autoridadtami charirca. Paica shinllita caparishpami, filo filo hocesta charijuj angeltaca cashna nirca: “Filo filo hocestaca ñami ocupai callarinalla cangui. Cai alpapi uvascunataca tandachinallami cangui. Uvascunaca ñami fucushca”.
19 Chaimi angelca cai alpapi hocesta satishpa y cai alpapi uvas plantata cuchurca. Uvas plantatapash y uvastapash uvasta saruna pushtumanmi shitarca. Chai pushtuca Taita Diospa ninan culirashcatami ricuchin.
20 Uvastaca llacta canllapimi caballocunaca sarurca. Uvasta saruna pushtumandaca ashtaca yahuarmi llujshirca. Chai yahuarca cazi caballocunapa umacamanmi jundarca. Chai yahuarca cazi 300 kilometrocunatami* calparca.
Notacuna
^ O “pudishcata”.
^ Griego shimipica “trono” nijunmi.
^ Querubingunaca importantepacha angelcunami can.
^ Griego shimipica “pornéia” nijunmi. Glosariopi “huainayana jucha” shimita ricupangui.
^ Glosariopi “Taita Diospa separashcacuna” shimita ricupangui.
^ O “Taita Dioshuan shujllashna cajcunaca”.
^ Griego shimipica “paicuna rurashca cosascunaca paicunahuanmi rin” nijunmi.
^ Cai cuartoca Taita Diospa templo huasipi Santísimo nishca cuartomi carca.
^ Griego shimipica “mil 600 estadiocunatami” nijunmi. Shuj estadioca 185 metrocunatami midin carca.
