Apocalipsis 15:1-8
15 Jahua cielopica shuj manllarinai, jatun señalpashmi ricurirca. Chaipica 7 angelcuna, 7 plagacunata apamunajujtami ricurcani. Cai plagacunaca ña último plagacunami carca. Chai plagacuna tucurijpimi, Taita Diospa ninan culirashcapash tucuringa.
2 Shinallata, ninahuan chapushca vidrioshnalla mar yacutami ricurcani. Primer manllanai sacha animaltapash, paipa estatuatapash y paipa shutita charij numerota mishashcacunatapashmi ricurcani. Paicunaca vidrioshnalla mar yacu ladopimi shayanajurca. Paicunapa maquipica, Taita Diospa arpacunatapashmi charinajurca.
3 Paicunaca Taita Diosta sirvij Moisespa cancionda y Maltun Llamagupa canciondami candanajurca. Paicunaca cashna nishpami candanajurca:
“Jehová* Dioslla quiquinga Tucui Ushaita Charij Taita Diosmi capangui. Quiquinba rurashcacunaca jatun y juyaillagucunapachami can. Quiquinba tucui rurashcacunami ali can, imata nishpapash ciertotami nipangui. Quiquinba shimicunaca tucuimi cierto can. Quiquinmi pundamandapacha y para siempre Rey capangui.
4 Jehová* Dioslla, ¿pita quiquindaca na respetangayari?* ¿Pita quiquinba shutitaca na alabangayari? Quiquinllami tucui shunguhuan ayudashpa catijuj Taita Dios capangui. Quiquin aliguta ricushpa juzgajta cuenta japishpami, tucuilla llactacunaca quiquinbaman shamunga y quiquinda adoranajunga” nishpami candanajurca.
5 Chai jipami jahua cielopica, Taita Dios imata nishca shimicunata charijuj Taita Diospa tabernáculo carpa huasipa santo nishca pushtu* pascarirca.
6 Chai pushtumandaca 7 angelcunami 7 plagacunata apamushpa llujshirca. Paicunaca punchapamba, limpio lino telata churajushcacunami carca. Shinallata paicunapa pechotaca dorado chumbicunahuan huatarishcami carca.
7 Chuscu querubingunamanda* shuj querubinmi 7 angelcunamanga 7 oro tasongunata curca. Chai tasongunaca Taita Diospa ninan culirashcahuan jundami carca. Taita Diosca para siempre causajuj Taita Diosmi can.
8 Taita Dios punchapamba cashcamanda y paipa podermandami Taita Diospa santo nishca pushtuca cushni junda tucurca. 7 angelcuna apamushca 7 plagacuna tucuringacamanga, nipipash na Taita Diospa santo nishca pushtuman yaicuitaca usharcachu.
Notacuna
^ Griego shimipica “manllangayari” nijunmi.
^ Cai cuartoca Taita Diospa templo huasipi Santísimo nishca cuartomi carca.
^ Querubingunaca importantepacha angelcunami can.
