Apocalipsis 17:1-18
-
Importante Babilonia Llacta castigai tucunatami parlajun (1-18)
-
Culquimanda huainayaj famosa huarmica, puca puca manllanai sacha animalpa jahuapimi tiajun (1-3)
-
Manllanai sacha animalca, “pundaca caipimi carca, pero cunanga ñana caipi canllu. Shinapash ñallami ucu ucu utujumanda llujshimunga” (8)
-
10 cachocunaca Maltun Llamaguhuanmi macanajunga (12-14)
-
10 cachocunaca huainayaj huarmitaca na ricunayachingachu (16, 17)
-
17 Chai jipaca, 7 tasongunata charijuj 7 angelcunapuramanda shuj ángel shamushpami cashna nihuarca: “Shamui, ashtaca yacucuna jahuapi tiajuj culquimanda huainayaj famosa huarmi ima castigota chasquigrijushcatami ricuchigrini.
2 Chai huarmihuanmi cai alpapi reycunaca huainayana juchapi* urmarca. Cai alpapi causanajuj gentecunaca chai huarmipa vinohuanmi machashcarca. Vinoca huainayaj huarmipa huainayashca ruraicunatami ricuchijun” nihuarca.
3 Angelca Taita Diospa espíritu santota utilizashpami, ñucataca shuj muscuipishna desiertoman apahuarca. Chaipica, puca puca manllanai sacha animalpa jahuapi shuj huarmi tiajujtami ricurcani. Chai animalca Taita Diosta nalicachishpa o nalicunata rimashcacunapa shuticunatami paipa cuerpo enteropi escribishca charirca. Shinallata 7 umacunata y 10 cachocunatami charirca.
4 Chai huarmica, morado ropatapash* puca ropatapash churajushcami carca. Shinallata orohuan, juyailla rumicunahuan, perlas rumicunahuan arreglarishcami carca. Paipa maquipica shuj oro copatami charijurca. Chai copaca millanai mapa cosascunahuan y huainayana juchapa* mapa ruraicunahuan jundami carca.
5 Chai huarmipa frentepica, shuj shutimi escribishca tiajurca. Chai shutica na intindi ushanallami carca. Cashnami nijurca: “Importante Babilonia Llactaca, culquimanda huainayaj huarmicunapa y cai alpapi millanai mapa cosascunapa mamami can” nijurcami.
6 Chai huarmica, Taita Diospa separashcacunapa* yahuarhuan y Jesuspa testigocunapa yahuarhuan machashca cashcatami ricurcani.
Chai huarmita ricushpaca ninandapachami manllarircani.
7 Chaimi angelca ñucataca cashna nihuarca: “¿Imamandata manllarijungui? Chai huarmi ima cajta yachana, shinallata chai huarmi tiajuj 7 umacunata charij, 10 cachocunata charij sacha animal ima cajta yachanaca shuj secretomi can. Pero chaicuna ima cajtaca ñucami quiquinmanga villagrini.
8 Quiquin ricushca manllanai sacha animalca, pundaca caipimi carca, pero cunanga ñana caipi canllu. Shinapash ñallami ucu ucu utujumanda llujshimunga. Paica tucuchi tucungami. Manllanai sacha animalca pundaca caipimi carca, pero cunanga ñana caipi canllu. Shina cashpapash cutin caipi cajta ricushpami cai alpapi gentecunaca manllaringa. Chai gentecunapa shutica picunalla causaita chasquinata ricuchij libropica na escribishca tiajurcachu. Cai mundo* tiai callarishcamandapachami paicunapa shutica na escribishca tiajurca.
9 ”Caita intindingapaca ali yachajushca canami minishtirin. Sacha animalpa 7 umacunaca 7 urcucunatami ricuchijun. Chai urcucunapa jahuapimi chai huarmica tiarin.
10 Shinallata 7 reycunami tian. 5 reycunaca ñami urmashca. Shuj reyca cunan horasmi tian. Y chaishuj reyca nara chayamushcachu. Pero chayamushpaca asha tiempotallami quidanga.*
11 Y punda caipi cashca pero cunanbi ñana caipi caj sacha animalpash octavo reymi can. Chai reyca 7pura reycunamandami llujshimun. Y paica tucuchi tucungami.
12 ”Quiquin ricushca 10 cachocunaca, todavía nara mandanajuj 10 reycunatami ricuchijun. Shinapash shuj horasta sacha animalhuan mandangapami, chai 10 reycunaca autoridadta chasquinga.
13 Paicunaca tucuicunami shujlla yuyaita charin. Chaimandami paicuna charishca poderta y autoridadtaca sacha animalman cunga.
14 Chaicunaca Maltun Llamaguhuanmi macanajunga. Pero Maltun Llamagumi paicunataca mishanga. Porque paimi mandajcunapa Mandaj y reycunapa Rey can. Maltun Llamaguhuan cajcunapashmi mishanga. Paicunaca Taita Dios cayashcacuna, Taita Diospa agllashcacuna y paita tucui shunguhuan cazujcunami can” nihuarcami.
15 Shinallata nihuarcapashmi: “Quiquin ricushca culquimanda huainayaj huarmi tiajushca yacucunaca, ashtaca gentecunata, llactacunata, shuj shuj idiomata parlaj gentecunatami ricuchin.
16 Quiquin ricushca 10 cachocunapash y sacha animalpashmi culquimanda huainayaj huarmitaca na ricunayachinga. Chai huarmitaca paipa tucuilla cosascunata quichushpami, lluchullata saquinga. Paipa aichatapashmi micunga. Ninahuanmi paitaca rupachitapacha rupachishpa saquinga.
17 Paipa munaita pactachina pensamientota Taita Dios paicunaman cujpimi shina pasanga. Paicunaca tucuicunami, Taita Diospa shimi pactaringacamanga paicuna mandangapaj charishca autoridadtaca sacha animalman cuna pensamientota charinga.
18 Y quiquin ricushca huarmica, cai alpapi tucuilla reycunata reinashna mandajuj jatun llactatami ricuchijun”.
Notacuna
^ Griego shimipica “pornéia” nijunmi. Glosariopi “huainayana jucha” shimita ricupangui.
^ O “llachapatapash”.
^ Griego shimipica “pornéia” nijunmi. Glosariopi “huainayana jucha” shimita ricupangui.
^ Glosariopi “Taita Diospa separashcacuna” shimita ricupangui.
^ Caipica “Adán y Evapa huahuacunamandami” parlajun.
^ O “saquiringa”.
