Apocalipsis 6:1-17
-
Maltun Llamagumi primer 6 sellocunata pascan (1-17)
-
Mishadormi yura caballopi can (1, 2)
-
Ninashna puca color caballopi tiajujca, tranquilo ali causaitami anchuchin (3, 4)
-
Yana caballopi tiajujmi yarjaita apamun (5, 6)
-
Plomolla caballopi tiajujca Huañui shutimi can (7, 8)
-
Huañuchi tucushcacunataca altar chaquipi cajtami ricurca (9-11)
-
Jatun terremotomi tiarca (12-17)
-
6 Chaipimi Maltun Llamaguca 7 sellocunamandaca shuj sellota pascarca. Shinallata chuscu querubingunamanda* shuj querubinga, shuj rayo huacanshnami shinllita “shamui” nirca.
2 Chaipica shuj yura caballotami ricurcani. Chai caballopi tiajujca shuj arcota y shuj flechatami maquipi charijurca. Taita Diosmi paimanga shuj coronata curca. Chaimi caballopi tiajujca paipa contracunata mishangapaj rirca.
3 Maltun Llamagu cati sellota pascajpica, cati querubinga “shamui” nircami.
4 Chaipica ninashna puca color caballomi llujshimurca. Chai caballopi tiajujca, cai alpapi gentecuna paicunapura huañuchirichunmi tranquilo ali causaita anchuchina autoridadta chasquirca. Shinallata shuj jatun espadatapashmi chasquirca.
5 Maltun Llamagu tercer sellota pascajpica, tercer querubinga “shamui” nircami. Chaipimi shuj yana caballota ricurcani. Yana caballopi tiajujca shuj balanzatami charijurca.
6 Chuscu querubingunapa chaupipica cashna nijujmi uyarirca: “Cazi kilo trigoca shuj denariomi* valin. Cutin cazi quimsa kilo cebadaca shuj denariomi valin. Aceite de olivata y vinotapash na desperdicianachu cangui” nijujmi uyarirca.
7 Maltun Llamagu cuarto sellota pascajpica, cuarto querubinga “shamui” nircami.
8 Chaipimi shuj plomolla caballota ricurcani. Chai caballo jahuapi tiajujca Huañui shutimi carca. Paitaca Pantión* nishcami huashalla catijurca. Paicunaca cai alpapa shuj jatun parteta* largo espadahuan, yarjaihuan, huañuchij plagahuan y sacha animalcunahuan huañuchingapami autoridadta chasquirca.
9 Maltun Llamagu quinto sellota pascajpica, altar* chaquipica Taita Diospa shimita cazuimanda y villachimanda huañuchi tucushcacunapa yahuartami* ricurcani.
10 Chaicunaca shinllitami cashna ninajurca: “Tucuita Mandaj Taita Dios, quiquinga santo, ciertopacha Taita Diosmi cangui. ¿Ima horacamanda cai alpapi causajcunatapash na juzgashpa jarcarigringui? ¿Ima horacamanda ñucanchita huañuchishcamandapash na imatapash rurashpa paicunataca saquigringui?”.
11 Tucui paicunamanga shuj largo yura ropatami* curca. Paicunataca ashaguta shuyanajuichira nircami. Quiquingunapa cumba esclavocuna completaringacamanmi samajuna canguichi. Paicunaca quiquingunashnallata ña huañuchi tucugrinajuj huauquicunami can nircami.
12 Maltun Llamagu sexto sellota pascajtami ricurcani. Chaipimi shuj jatun terremoto tiarca. Indipash yana ropashna* yana yanami tucurca. Lunapash yahuarshna puca pucami tucurca.
13 Jahua cielomandaca estrellacunapashmi urmarca. Imashinami shinllita huairajpica verde higoscuna yuramanda urman, shinallatami estrellacunaca urmarca.
14 Cielopash rollo pillurinshna pillurishpami chingarirca. Tucuilla urcucuna, tucuilla islacunapashmi maipi cashca pushtumandaca anchuchi tucurca.
15 Chaimi cai alpapi reycuna, ashtaca autoridadta charijcuna, soldadocunapa comandantecuna, charij gentecuna, ashtaca poderta charijcuna, tucuilla esclavocuna, tucuilla libre gentecunapash cuevacunapi y urcu jatun rumicunapipash pacajunajurca.
16 Paicunaca cutin cutinmi urcucunatapash y jatun rumicunatapash cashna ninajurca: “Mandangapaj tiarina pushtupi* tiajuj Taita Diosmandapash pacajungapaj y Maltun Llamapa culiramandapash pacajungapaca, ñucanchi jahuapi urmamuichi.
17 Paicuna culirashpa juzgana tiempoca ñami chayamushca. ¿Pita chai tiempopica salvarita ushanga?” ninajurcami.
Notacuna
^ Querubingunaca importantepacha angelcunami can.
^ Cai alpata chuscu partecunapi dividishpa y chai chuscu partecunamanda shuj parteta paicunaman cushcatami nijun.
^ O “llachapatami”.
^ Caica animal milmahuan rurashca yana ropami carca. Y chai milmaca chivo milmami cashcanga.
^ Griego shimipica “tronopi” nijunmi.
