Apocalipsis 7:1-17
7 Chai jipaca, chuscu angelcuna shayanajujtami ricurcani. Chai angelcunaca, cai alpapa chuscundi ladocunapimi shayanajurca. Paicunaca, ni cai alpatapash ni mar yacutapash ni maijan yuratapash ama huaira huactamuchunmi, cai alpapi chuscundi ladocunamanda shamujuj huairata trancanajurca.
2 Shinallata indi llujshimuj ladomandami shuj ángel llujshimujujta ricurcani. Paica causajuj Taita Diospa sellota apashcami llujshimujurca. Cai alpatapash, mar yacutapash llaquichina autoridadta chasquishca chuscu angelcunatami chai angelca paipa tucui fuerzahuan cashna nishpa caparirca:
3 “Ñucanchi Taita Diospa esclavocunata frentepi sellangacamanmi, cai alpata, mar yacuta y yuracunataca na llaquichina canguichi” nishpa.
4 Chai jipaca, sellai tucushcacuna mashna cashcatami uyarcani. Sellai tucushcacunaca 144 mil gentecunami carca. Paicunaca Israelpa gulpi jatun familiacunamandami carca.
5 Judapa jatun familiamandaca 12 milcunami sellai tucurca.Rubenba jatun familiamandaca 12 milcunami sellai tucurca.Gadpa jatun familiamandaca 12 milcunami sellai tucurca.
6 Aser shuti runagupa jatun familiamandaca 12 milcunami sellai tucurca.Neftalipa jatun familiamandaca 12 milcunami sellai tucurca.Manasespa jatun familiamandaca 12 milcunami sellai tucurca.
7 Simeonba jatun familiamandaca 12 milcunami sellai tucurca.Levipa jatun familiamandaca 12 milcunami sellai tucurca.Isacarpa jatun familiamandaca 12 milcunami sellai tucurca.
8 Zabulonba jatun familiamandaca 12 milcunami sellai tucurca.Josepa jatun familiamandaca 12 milcunami sellai tucurca.Benjaminba jatun familiamandaca 12 milcunami sellai tucurca.
9 Chai jipaca, pipash na cuentai ushanalla ashtaca ashtaca gentecunatami ricurcani. Paicunaca tucui llactacunamanda, tucui jatun familiacunamanda, tucui pueblocunamanda, tucui idiomacunamandami carca. Chai gentecunaca mandangapaj tiarina pushtu* ñaupapi y Maltun Llamagupa ñaupapimi uracaman largo yura ropata* churajushca y maquipipash palmera ramacunata chariria shayanajurca.
10 Paicunaca shinllitami cashna nishpa caparinajurca: “Mandangapaj tiarinapi tiajuj ñucanchi Taita Diosmandapash y Maltun Llamagumandapashmi ñucanchica salvarita ushashcanchi” ninajurcami.
11 Gulpi angelcunami mandangapaj tiarina pushtu muyundipi, shinallata ancianocunapa y chuscu querubingunapa* muyundipi shayanajurca. Paicunaca mandangapaj tiarina pushtu ñaupapi cungurishpami Taita Diosta adoranajurca.
12 Paicunaca cashnami ninajurca: “Amén. Ñucanchi Taita Diosca ali yachaitapash* podertapash, fuerzatapashmi charin. Paimi para siempre alabai tucuna, respetai tucuna, agradici tucuna y alipi churai tucunapash can. Amén” ninajurcami.
13 Chaipimi ancianocunapuramanda shuj ancianoca tapuhuarca: “Uracaman largo yura ropata churajushcacunaca ¿picunata can? Paicunaca ¿maimandata shamun?” nishpa.
14 Chaimi ñapash cashna nircani: “Quiquinmari chaitaca yachapangui” nishpa. Chaimi paica nihuarca: “Paicunami ninan manllanai llaquimanda* llujshishcacuna can. Paicunapa largo ropacunataca tajshashcami. Shinallata Maltun Llamagupa yahuarhuanmi yurayachishca.
15 Chaimandami paicunaca Taita Dios mandangapaj tiarina ñaupapi shayanajun. Paicunaca tuta y punllami paipa templopi paita sirvinajun. Mandangapaj tiarinapi tiajuj Taita Diosmi paicunataca cuidanga.*
16 Paicunaca ñana yarjachingachu y ñana yacunayachingachu. Ni indipash na paicunataca yapata rupachingachu.
17 Porque mandangapaj tiarina pushtu chaupipi caj Maltun Llamagumi paicunataca michinga y causaita cuj pugyu yacucunamanbashmi pushanga. Taita Diosmi paicunapa ñavimandaca tucuilla viquita fichanga” nihuarcami.
Notacuna
^ Griego shimipica “trono” nijunmi.
^ O “llachapata”.
^ Querubingunaca importantepacha angelcunami can.
^ O “sabiduriatapash”.
^ Glosariopi “ninan manllanai llaqui tiempo” shimita ricupangui.
^ O “paicunapa jahuapi paipa carpa huasitaca mirachinga”.
