Colosenses 1:1-29
1 Ñucaca Pablomi capani. Taita Diospa voluntadmanda Cristo Jesuspa apostolmi* capani. Ñuca y ñucanchi huauqui Timoteondimi cai cartataca cachanajupanchi.
2 Colosas llactapi Taita Diospa separashca* quiquingunamanmi cai cartataca escribinajupanchi. Quiquingunaca Cristopa* discipulocunami capanguichi y paitaca tucui shunguhuanmi catinajupanguichi.
Quiquingunata ñucanchi Taita Dios ninanda juyapachun* y tranquilo ali causaigutapash quiquingunaman carachunmi Taita Diostaca mañapanchi.
3 Quiquingunamanda mañajushpaca siempremi Taita Diostaca agradicipanchi. Paimi ñucanchi Señor Jesucristopa Taita can.
4 Quiquinguna Cristo Jesuspi crijta, shinallata Taita Diospa tucuilla separashcacunata juyashpa causajtami uyapashcanchi.
5 Taita Dios jahua cielopi quiquingunaman cuna bendicionmandami shina rurashpa causanajupanguichi. Quiquingunaca ali villaicunapa cabal yachachishcacunata uyashpami, chai bendicionmandaca yachajuparcanguichi.
6 Chai ali villaigucunatami quiquingunaca ña uyapashcanguichi. Chai ali villaigucunami mirashpa tucuilla gentecunaman chayajun. Taita Diospa ninan juyai* imapacha cashcata uyashca y yachajushca punllamandapachami ali villaigucunaca quiquingunapurapipash mirashpa catijushca.
7 Chai ali villaicunatami Epafras huauquica quiquingunaman yachachirca. Paica ali catijuj ñucanchi juyashca huauquimi can. Paica ñucanchi beneficiopami Cristotaca esclavoshna sirvijun.
8 Taita Diospa espíritu santopa* ayudahuan quiquinguna juyarishpa causanajushcatapashmi paica ñucanchiman villarca.
9 Chaita uyashca punllamandapachami, ñucanchica quiquinguna Taita Diospa voluntadmanda cabalta yachajushpa ali yachajushca cachun y Taita Diospa espíritu santo ayudajpi aliguta intindichun mañanajupashcanchi.
10 Shinami quiquingunaca, Jehová* Dios munashcashna aliguta causashpa, paita cushichinguichi y ali ruraicunatapash ruranguichi. Shina rurashpami, Taita Diosmanda ashtahuan ashtahuan cabalta yachajushpa catinguichi.
11 Shinallata, Taita Dios paipa ninan poderhuan quiquingunata shinllichichunmi mañapanchi. Shinami cushijushpa, pacienciahuan tucuita aguantai ushapanguichi.
12 Taita Diostami pagui nina capanguichi. Paimi quiquinguna herenciata chasqui ushachunga ayudashca. Y chai herenciaca, michapi caj paipa separashcacunapami can.
13 Taita Diosmi yana yana tutamanda* ñucanchita salvashpa, paipa juyashca Churipa gobiernoman aparca.
14 Paimandami libre capanchi. Porque paimi shuj preciota paganshna ñucanchitaca libre saquirca. Y ñucanchi pecadocunamandapashmi perdonai tucurcanchi.
15 Cristoca, pipash na ricui ushanalla Taita Diosman parecidomi can. Tucui rurashcacunamandaca, paimi primero rurashca can.
16 Taita Diosca paita utilizashpami jahua cielopi ima tiashcacunatapash, cai alpapi ima tiashcacunatapash, ricunalla cosascunatapash, na ricunalla cosascunatapash, mandajcunatapash, reycunatapash, gobiernocunatapash, autoridadcunatapash rurashca. Tucui chaishuj cosascunata rurangapaca, paitami Taita Diosca utilizarca y paipami rurashca can.
17 Ashtahuangarin, tucui rurashca cosascunamandaca Jesusmi primero tiarca. Y paimandami tucui ima cashpapash tiai callarirca.
18 Jesusmi cuerpopaca umashna can. Y chai cuerpoca congregacionmi* can. Paimi callari can. Paimi huañushcacunapuramandaca primero causachi tucurca. Tucuipi primero cachunmi shina pasarca.
19 Porque Taita Diosca pai tucuipi completo cachunmi munan.
20 Shuj jatun racu caspipi* Cristo yahuarta jichashcamandami, Taita Diosca cai alpapi tiashca tucui cosascunahuanbash y jahua cielopi tiashca tucui cosascunahuanbash ali tucurca.
21 Quiquingunaca shuj tiempocunapica Taita Diosmandaca carupimi carcanguichi. Chaimi paihuanga contra cuenda caparcanguichi. Porque quiquingunaca nali ruraicunapillami pensarishpa causarcanguichi.
22 Pero cunanga paipa Churi huañushpa paipa cuerpota cushcamandami Taita Diosca quiquingunahuan ali tucushca. Taita Diosca quiquinguna paipa ñaupapi limpio, sin pecado, ima culpapash illa ricurichunmi shina rurashca.
23 Pero chaipaca Taita Diospimi crishpa catina capanguichi. Chai crishcapimi shinlli sapiyashcashna y shinlli shayarishcashna catina capanguichi. Shinallata, quiquinguna uyashca ali villaicunapa shuyanajushca bendiciongunamandapash na caruyanachu capanguichi. Chai ali villaicunaca mundo enteropimi predicashca can. Ñucaca Pablomi capani y Taita Diosmi ñucataca cai ali villaicunata predicachun agllahuashca.
24 Quiquingunapa ali cajpimi, sufrijushpapash cushilla sintiripani. Ñucaca Cristoshnami sufrijupani. Pero Cristopa cuerpopa alipallatami ñucaca sufrishpa catinara capani. Chai cuerpoca congregacionmi can.
25 Ñucaca Taita Diospa llactatami sirvijupani. Shina sirvichunmi Taita Diosca ñucata agllahuashca. Y quiquingunapa alipallatami shina sirvijupani. Chaimandami Taita Diospa shimimanda predicangapaj ninanda esforzarijupani.
26 Ari, ñucaca Taita Dios pacalla charishca secretotami* predicajupani. Pero chai secretoca cai tiempocunacamanbash* nara rijsishcachu carca, ni punda tiempomanda gentecunapash na rijsinllu carca. Pero cunanga chai secretotami Taita Diospa separashcacunaca rijsi ushashca.
27 Cai secretopa alipacha bendiciongunatami, Taita Diosca na judío gentecunamanbash rijsichingapaj munashca. Cai secretoca quiquingunahuan shujllashna caj Cristomi can. Chaimandami quiquingunaca paihuan alipi churai tucunata shuyanajunguichi.
28 Shinallata Cristomandami predicanajunchi, mundo enteropi gentecunamanbashmi advirtinajunchi y ali yachajushca shimicunatami mundo enteropi yachachinajunchi. Shinami Cristohuan shujllashna caj tucuilla gentecunataca completo cachun y Taita Diospa ñaupapi presentarichunbash ayudai ushashun.
29 Chaimandami ñucaca Taita Diospa ninan poder ayudajpi shinllita trabajajuni y shinllita esforzarijuni.
Notacuna
^ Glosariopi “Taita Diospa separashcacuna” shimita ricupangui.
^ O “Mesiaspa”, “Taita Dios agllashcapa”.
^ Glosariopi “bondad inmerecida” shimita ricupangui.
^ Glosariopi “bondad inmerecida” shimita ricupangui.
^ O “Taita Diospa poderpa”. Glosariopi “espíritu santo” shimita ricupangui.
^ Griego shimipica “yana yana tutata mandajpa autoridadmanda” nijunmi.
^ Glosariopi “congregación” shimita ricupangui.
^ Glosariopi “huañuchingapaj jatun racu caspi” shimita ricupangui.
^ O “secreto sagradotami”. Glosariopi “secreto sagrado” shimita ricupangui.
^ Glosariopi “cai tiempo” shimita ricupangui.
