Esdras 1:1-11
1 Persia llactamanda rey Ciroca nara shuj huatata* mandajurcachu. Chai huatapimi Jehová Diosca Persia llactamanda rey Cirotaca pai mandajushca tucuilla llactacunapi shuj leyta llujchina munaita, paipa shungupica churarca.* Chaitaca mediante Jeremías Jehová Dios villachishca shimicuna pactarichunmi shina rurarca. Reyca chai leytaca escribichitapashmi escribichirca. Chai leypica cashnami nijurca:
2 “Persia llactamanda rey Ciroca cashnami nin: ‘Jahua cielomanda* Jehová Diosca cai alpapi tucuilla llactacunata mandana autoridadtami ñucamanga cuhuashca. Shinallata Judá llactapi tiaj Jerusalenbi templo huasita rurachunbashmi mingahuashca.
3 Cangunapuramandaca ¿picunallata paipa llacta canguichi? Cangunapa Taita Diosca cangunahuan cachun. Judá llactapi tiaj Jerusalenman vichai richi. Chaipica israelitacunapa Taita Jehová Diospa templo huasita cutin shayachigrichi. Paica Taita Diospachami* can. Paipa templo huasica Jerusalenbimi* carca.
4 Maijan cashpapash shuj llactamanda shamushpa caipi causanajujcunataca, maipi cajpipash paicunapa vecinocuna* ayudachun. Paicunamanga orota, plata materialta, huaquin charishca cosascunata, animalcunatapash cuchun. Chai jahuapash Jerusalenbi caj Taita Diospa* templo huasipapashmi ofrendacunataca paicunapa munai carana can’” nijurcami.
5 Chaimandami Judapa jatun familiacunamanda jefecuna, Benjaminba jatun familiacunamanda jefecuna, sacerdotecunapash, levitacunapash* y shuj israelitacunapash Jerusalén llactaman ringapaj prepararirca. Paicunamanmi Taita Diosca,* Jerusalenman vichai rishpa Taita Diospa huasita shayachina munaita curca.* Chaipimi Jehová Diospa huasita cutin shayachigrinajurca.
6 Shinallata paicunapa vecinocunaca oro cosascunata, platahuan rurashca cosascunata, paicuna charishca huaquin cosascunata, animalcunata y shuj valishca cosascunatapashmi cushpa ayudanajurca.* Chai jahuapash paicunapa munaimi shuj ofrendacunatapash Taita Diospa huasipa caranajurca.
7 Nabucodonosorca Jerusalenbi Jehová Diospa templo huasimandami cosascunata apashcarca. Chai cosascunataca paipa diospa huasipimi churashcarca. Chaimandami rey Ciroca chai cosascunata Jerusalenman tigrachichun mandarca.
8 Chai cosascunata llujchichunmi Persia llactamanda rey Ciroca, Mitrídates shuti tesorero runata mandarca. Shinallata shuj listata rurashpa Sesbazar* shuti runaman cuchunmi mandarca. Sesbazarca Judá jatun familiapa jefemi carca.
9 Chai cosascunaca, orohuan rurashca 30 canastacunami carca. Shinallata plata materialhuan rurashca mil canastacunapashmi carca. Y reponingapaj 29 platocunapashmi tiarca.
10 Shinallata orohuan rurashca uchilla 30 tazonguna, platahuan rurashca 410 tazonguna y mil cosascunapashmi carca.
11 En totalca orohuan y plata materialhuan rurashca 5 mil 400 cosascunami carca. Chai tucui cosascunatami Sesbazar shuti runaca aparca. Chaicunataca Babiloniamanda llujshinajushca judiocunahuan Jerusalenman tigranajushpami aparca.
Notacuna
^ Caipica rey Ciro Babilonia llactata primer huatapi mandajushcamandami parlajun yarin.
^ Hebreo shimipica “espirituta cuyuchirca” nijunmi.
^ Hebreo shimipica “cielocunamanda” nijunmi.
^ O “Dios verdadero”. Glosariopi “Dios verdadero” shimita ricupangui.
^ O talvez “Taita Diosca Jerusalenbimi can”.
^ Hebreo shimipica “chaimanda jaricuna” nijunmi.
^ O “Dios verdadero”. Glosariopi “Dios verdadero” shimita ricupangui.
^ O “Dios verdadero”. Glosariopi “Dios verdadero” shimita ricupangui.
^ Hebreo shimipica “paipa espirituta cuyuchishcarca” nijunmi.
^ Hebreo shimipica “maquicunata shinllichirca” nijunmi.
^ Caipi parlashca Sesbazarca Esdras 2:2 y 3:8pi parlashca Zorobabelmi yarin.
