Esdras 10:1-44
10 Esdrasca chai pecadocunata villashpami Taita Diospa* huasi ñaupapica huacashpa urai singa chutarishpa Taita Diostaca mañajurca. Chaicamanga paipa muyundipimi Israel llactamanda ashtaca jaricuna, huarmicuna y huahuacunapash tandanajurca. Gentecunaca ushashcatami huacanajurca.
2 Esdras mañai tucuchishca jipaca, Elam runapa churicunamanda,* Jehiel shuti runapa churi Secaniasmi Esdrastaca cashna nirca: “Ñucanchicunaca, ñucanchi Taita Diosta na cazushpami ladolla llactacunamanda huarmicunahuan cazarashcanchi.* Shinapash Taita Dios israelitacunata perdonana esperanzaca tianrami.
3 Shinaca ñucanchi Taita Dioshuan shuj tratota* rurashun. Y chai huarmicunata y paicunapa huahuacunatapash paicunapa llactacunamanllata tigrachishpa cachashunchi. Chaita rurashpami Jehová Diospa guiata catishun y ñucanchi Taita Diospa mandamientocunata tucui shunguhuan respetajcunapa guiatapash catishun. Shinaca Leypi imata nishcata pactachishunchi.
4 Jatari, caica canba responsabilidadmi can. Ñucanchicunaca canhuanmi cashun. Imata rurana cashpapash na manllashpa rurailla” nircami.
5 Shina nijpimi Esdrasca jatarishpa sacerdotecunapa jefecunata, levitacunata y tucui israelitacunatapash, Secanías runa imata nishcata pactachingapaj jurachirca. Chaimi paicunaca jurarca.
6 Esdrasca Taita Diospa* huasi ñaupapimi carca. Chai pushtumandami Eliasib runapa churi Jehohanán runa templopi charishca cuartoman* rirca. Chai cuartoman rishpapash nimata na micurcachu y yacutapash na ufiarcachu. Porque Esdrasca Babiloniamanda tigramushcacuna pecadota rurashcamandami llaqui llaqui carca.
7 Chaimi Judá y Jerusalén llacta enteropi Babilonia llactamanda tucuilla tigramushcacuna Jerusalén llactapi tandanajuna cashcata villanajurca.
8 Chaimandami principecuna y Israel llactapi ñaupaman pushaj jaricuna* decidishcashna, Babiloniamanda tigramushcacunapuramanda* pipash quimsa punllapi na ricurijpica, llujchishpa cachai tucuna carca. Y paipa tucui charishcacunatapash quichui tucunami carca.
9 Chaimi Judá y Benjamín shuti jatun familiacunamanda jaricunaca quimsa punlla tucujpica Jerusalén llactapi tandanajurca. Paicunaca noveno quillapa* punlla 20pimi tandanajurca. Y tucuilla llactami Taita Diospa* huasipa shuj patiopi tiarishpa quidarca. Paicunaca culpablecuna sintirimanda y ushashcata tamiajushcamandami manllaimanda chujchunajurca.
10 Chaimi sacerdote Esdrasca jatarishpa paicunataca cashna nirca: “Cangunaca shuj llactamanda huarmicunahuan cazarashpaca pecadotami rurashcanguichi. Chaita rurashpami Israel llactapa pandarishcacunataca mirachishcanguichi.
11 Cunanga cangunapa punda taitacunapa Jehová Diosman cangunapa pecadocunata villaichi y paipa voluntadta ruraichi. Ladolla llactacunamanda y chai llactacunamanda huarmicunamandapash caruyanami canguichi” nircami.
12 Shina nijpimi chaipi tandanajushca tucuilla gentecunaca shinllita cashna nishpa contestarca: “Can nishcashnami tucuita rurapashun.
13 Shinapash ashtaca gentecunami canchi y tamia tiempopimi capanchi. Chaimandami canllapi quidaitaca na ushapanchi. Porque ñucanchicunamandaca taucacunami pecadota rurashcanchi. Y cai problemaca shuj o ishcai punllapillaca na arreglaringachu.
14 Shinaca ñucanchicunapa shutipi ñucanchi principecuna caipi quidachun y paicuna ñucanchipa randi imata rurana cashpapash rurachun saquipai. Shina rurajpimi ñucanchi llactacunamanda picunalla shuj llactamanda huarmicunahuan cazarashcacunaca, shuj agllashca fechapi caiman shamunga. Paicunaca ñaupaman pushaj jaricunahuan y cada llactamanda juezcunahuanmi shamunga. Shinami ñucanchi Taita Diosca ñucanchihuanga ñana ninanda culirashca canga” ninajurcami.
15 Shinapash chaihuanga Asahel runapa churi Jonatán y Ticvá runapa churi Jahzeya shuti runapash na de acuerdo carcachu. Mesulam y Sabetái shuti levitacunapashmi paicunapa lado tucurca.
16 Pero Babiloniamanda tigramushcacunaca imata rurangapaj decidishcatami ruranajurca. Cutin shutipi registrashca familiacunapa tucuilla jefecunaca, sacerdote Esdrashuanmi tandanajurca. Paicunaca décimo quillapa* primer punllapimi cai problemamanda parlaringapaj tandanajurca.
17 Paicunaca, primer quillapa* primer punllapimi shuj llactamanda huarmicunahuan picunalla cazarashcataca investigai tucuchirca.
18 Sacerdotecunapa huaquin churicuna shuj llactamanda huarmicunahuan cazarashcatami yachaj chayarca. Jehozadac shuti runapa churica Jesúa shutimi carca. Jesuapa huaquin churicuna y huauquicunami shuj llactamanda huarmicunahuanga cazarashca carca. Paicunaca: Maaseya, Eliezer, Jarib y Guedalías shuti runacunami carca.
19 Pero paicunaca paicunapa huarmicunata dispidishpa cachangapami prometirca.* Shinallata culpablecuna caimandami, paicunaca cada uno shuj jari llamata cungapaj quidarca.
20 Chai pecadota rurashca sacerdotecunapuramandaca caicunapashmi carca: Imer runapa churicunamandaca, Hananí y Zebadías shuti runacuna.
21 Harim runapa churicunamandaca, Maaseya, Elías, Semaya, Jehiel y Uzías shuti runacunami carca.
22 Pasjur runapa churicunamandaca, Elioenái shuti, Maaseya, Ismael, Netanel, Jozabad y Eleasá shuti runacunami carca.
23 Cutin levitacunapuramandaca cai jaricunapashmi pecadotaca rurashcarca: Jozabad, Siméi, Quelaya (o Quelitá), Petahías, Judá y Eliezer shuti runacunami carca.
24 Cutin candajcunamandaca, Eliasib runami carca. Pungucunata cuidajcunamandaca Salum, Télem y Urí shuti runacunami carca.
25 Israelitacunapuramandaca cai jaricunami pecadota rurashca carca. Parós shuti runapa churicunamandaca, Ramías, Izías, Malkiya, Mijamín, Eleazar, Malkiya y Benaya shuti runacunami carca.
26 Elam runapa churicunamandaca, Matanías, Zacarías, Jehiel, Abdí, Jeremot y Elías shuti runacunami carca.
27 Zatú shuti runapa churicunamandaca, Elioenái shuti, Eliasib, Matanías, Jeremot, Zabad y Azizá shuti runacunami carca.
28 Bebái shuti runapa churicunamandaca, Jehohanán, Hananías, Zabái y Atlái shuti runacunami carca.
29 Baní shuti runapa churicunamandaca, Mesulam, Maluc, Adaya, Jasub, Seal y Jeremot shuti runacunami carca.
30 Pahat-Moab shuti runapa churicunamandaca, Adná, Kelal, Benaya, Maaseya, Matanías, Bezalel, Binuí y Manasés shuti runacunami carca.
31 Harim shuti runapa churicunamandaca, Eliezer, Isiya, Malkiya, Semaya, Shimeón,
32 Benjamín, Maluc y Semarías shuti runacunami carca.
33 Hasum shuti runapa churicunamandaca, Matenái shuti, Matatá shuti, Zabad, Elifélet, Jeremái, Manasés y Simeí shuti runacunami carca.
34 Baní shuti runapa churicunamandaca, Maadái, Amram, Uel shuti,
35 Benaya, Bedeya, Kelúhi,
36 Vanías, Meremot, Eliasib,
37 Matanías, Matenái y Jaasú shuti runacunami carca.
38 Binuí shuti runapa churicunamandaca, Simeí,
39 Selemías, Natán, Adaya,
40 Macnadebái shuti, Sasái shuti, Sharái,
41 Azarel, Selemías, Semarías,
42 Salum, Amarías y José shuti runacunami carca.
43 Nebo shuti runapa churicunamandaca,* Jeiel, Matitías, Zabad, Zebiná, Jadái, Joel y Benaya shuti runacunami carca.
44 Tucui chai jaricunami shuj llactamanda huarmicunahuan cazarashca carca. Cai huarmicunatami paicunapa huahuacunandi dispidishpa cacharca.
Notacuna
^ O “Dios verdadero”. Glosariopi “Dios verdadero” shimita ricupangui.
^ Cai capitulopi churicuna nishpaca descendientecunamandapashmi parlajun yarin. Shinallata huaquin versiculocunapica maijan llactamanda cashcata ricuchingapapashmi parlaita ushan.
^ O “huarmicunataca ñucanchi huasicunaman apashcanchi”.
^ O “pactota”.
^ O “Dios verdadero”. Glosariopi “Dios verdadero” shimita ricupangui.
^ O “comedorman”.
^ Hebreo shimipica “congregacionmanda” nijunmi.
^ Caipi noveno quilla nishpaca mediados de noviembremanda a mediados de diciembrecamanmi parlajun. Apéndice B15ta ricupangui.
^ O “Dios verdadero”. Glosariopi “Dios verdadero” shimita ricupangui.
^ Caipi décimo quilla nishpaca mediados de diciembremanda a mediados de enerocamanmi parlajun. Apéndice B15ta ricupangui.
^ Caipi primer quilla nishpaca mediados de marzomanda a mediados de abrilcamanmi parlajun. Apéndice B15ta ricupangui.
^ Hebreo shimipica “paicunapa maquicunata curca” nijunmi.
^ O talvez “Nebo llactamandacunaca”.
