Esdras 3:1-13
3 Israelitacuna ña paicunapa llactacunapi cajpi y séptimo quilla* chayajpica, tucuilla israelitacunami* Jerusalenbi tandanajurca. Paicunaca shujlla yuyaihuanmi tandanajurca.
2 Jehozadac runapa churi Jesúa runa, shuj sacerdotecunapash, Zorobabelpash y paipa huauquicunapashmi israelitacunapa Taita Diospa altarta cutin shayachi callarirca. Zorobabelca Sealtiel runapa churimi carca. Moisesman Cushca Leypi nishcashna rupachina ofrendacunata* rurangapami altartaca cutin shayachirca. Moisesca Taita Diospa* sirvijmi carca.
3 Ladolla llactacunamanda gentecunata manllashpapashmi, paicunaca punda maipi cashca pushtupillata altartaca shayachirca. Jipamanga chai altarpimi rupachina ofrendacunata Jehová Diosman cui callarirca. Paicunaca cada tutamanda y cada tutami chai ofrendacunataca cunajurca.
4 Shinami Leypi nishcashna Fiesta de las Cabañas* nishcata rurarca. Cada punllapa mashna rupachina ofrendacunata rurana cashcatami tucui punllacuna ruranajurca.
5 Cada punllapa rupachina ofrendacunata cushca jahuapash, llullu luna* fiestapi cuna ofrendacunata y Jehová Diospa tucui sagrado fiestacunapi cuna ofrendacunatapashmi cunajurca. Shinallata shujcuna paicunapa munai carashca ofrendacunatapashmi Jehová Diosmanga cunajurca.
6 Séptimo quillapa* primer punllamanda callarishpami, Jehová Diosmanga rupachina ofrendacunata cui callarirca. Jehová Diospa templo huasipa cimientocunata nara churashca cashpapashmi ofrendacunataca cui callarirca.
7 Rumicunata picajcunaman, carpinterocunamanbashmi culquita curca. Shinallata sidonio gentecunaman y tirio gentecunamanga micunata, vinota y aceitetapashmi curca. Chaicunataca Líbano pushtumanda mar yacuta rishpa Jope llactacaman cedro racu caspicunata apamuchunmi curca. Persia llactamanda rey Ciro mandashcashnami chaitaca ruranajurca.
8 Ña ishcai huatacunata Jerusalenbi Taita Diospa* huasiman chayashca cashpami Zorobabelpash, Jesuapash, paicunapa huauqui sacerdotecunapash, levitacunapash Taita Diospa huasita shayachi callarirca. Paicunahuanga prezo cashpa Jerusalenman tucuilla tigrashcacunapashmi carca. Paicunaca segundo quillapimi* chaitaca rurai callarirca. Paicunaca más de 20 huatacunata charij levitacunatami Jehová Diospa huasita cutin shayachina obrata ricuriachun churarca. Zorobabelca Sealtiel shuti runapa churimi carca. Jesuaca Jehozadac runapa churimi carca.
9 Shinallata Jesúa, paipa churicuna, Jesuapa huauquicuna, Cadmiel y paipa churicunapashmi tandanajurca. Paicunaca Judá shuti runapa churicunami* carca. Paicunaca Taita Diospa* huasita cutin shayachishpa trabajajcunata ricuriashpa ayudangapami tandanajurca. Paicunahuanga Henadad runapa huahuacuna, chai huahuacunapa churicuna y paicunapa familiacunapashmi tandanajurca. Paicunapashmi levitacuna carca.
10 Jehová Diospa templo huasipa cimientocunata churai tucuchishca jipami, sacerdotecunaca templo huasipi churajuna ropata churajurca. Shinallata trompetacunatapashmi charinajurca. Cutin Asaf runapa churi levitacunaca tocangapaj platillocunatami charinajurca. Paicunaca, Israel llactapa rey David mandashcashnami Jehová Diosta alabangapaj shayarinajurca.
11 Paicunaca pagui nishpami Jehová Diostaca alabanajurca. Shinallata turnarishpami candanajurca. Paicunaca, “Taita Diosca ali alimi can. Israelitacunataca siempremi juyashpa* catinga” nishpami candanajurca. Jipamanga Jehová Diospa templo huasipa cimientocunata ña churashcamandami tucuilla israelitacunaca caparishpa Jehová Diosta alabanajurca.
12 Shinapash punda templo huasi imashina cashcata ricushca mayorlla sacerdotecuna, levitacuna y familiapa jefecunaca templo huasipa cimientocunata churajta ricushpaca ninandami huacai callarirca. Shinapash ashtacacunaca cushijuimandami ninanda capari callarirca.
13 Chaimandami picunalla cushijuimanda caparinajushcata o picunalla llaquiyaimanda caparinajushcata cuenta japitaca na usharirca. Gentecuna shina ninanda caparinajushcamandami caru carucaman uyarijurca.
Notacuna
^ Caipi séptimo quilla nishpaca mediados de septiembremanda a mediados de octubrecamanmi parlajun. Apéndice B15ta ricupangui.
^ Hebreo shimipica “Israelpa churicunami” nijunmi.
^ O “ofrenda quemada”. Glosariopi “ofrenda quemada” shimita ricupangui.
^ O “Dios verdadero”. Glosariopi “Dios verdadero” shimita ricupangui.
^ Caicunaca shuj tiempotalla causangapaj pushtucunami carca. Glosariopi “Fiesta de las Cabañas” shimita ricupangui.
^ O “luna nueva”. Glosariopi “luna nueva” shimita ricupangui.
^ Caipi séptimo quilla nishpaca mediados de septiembremanda a mediados de octubrecamanmi parlajun. Apéndice B15ta ricupangui.
^ O “Dios verdadero”. Glosariopi “Dios verdadero” shimita ricupangui.
^ Caipi segundo quilla nishpaca mediados de abrilmanda a mediados de mayocamanmi parlajun. Apéndice B15ta ricupangui.
^ Cai capitulopi churicuna nishpaca descendientecunamandapashmi parlajun yarin.
^ O “Dios verdadero”. Glosariopi “Dios verdadero” shimita ricupangui.
^ O “amor leal”.
