Esdras 4:1-24
4 Judá y Benjaminba jatun familiacunapa contracunaca, Babiloniamanda tigramushcacuna, Israel llactapa Jehová Diosman shuj templo huasita shayachinajujtami uyarca.
2 Uyashcandimi Zorobabelpaman y familiacunapa jefecunapamanbash quimirishpa cashna ninajurca: “Ñucanchipashmi cangunahuan trabajangapaj munapanchi. Ñucanchipashmi cangunapa Diosta adoranchi.* Asiriamanda rey Esar-Hadón ñucanchita caiman apamushca punllacunamandapachami paimanga sacrificiocunata ruranajupashcanchi” ninajurcami.
3 Shina ninajujpimi Zorobabelpash, Jesuapash y israelitacunapa familiacunapa chaishuj jefecunapash cashna ninajurca: “Cangunaca ñucanchihuan, ñucanchi Taita Diosman shuj huasita shayachina derechotaca na charinguichichu. Persia llactamanda rey Ciro mandashcashnami ñucanchillata Jehová Diosmanga shuj huasita shayachigripanchi. Paimi Israel llactapa Taita Dios can” ninajurcami.
4 Chaimandami ladolla llactacunamanda gentecunaca, judiocunataca imacunatapash nishpa desanimachinajurca.* Paicunaca templo huasita ama shayachichunmi manllachinajurca.
5 Shinallata judiocuna templo huasita ama huasichishpa catichunmi consejerocunatapash contratarca. Chaitaca Persia llactamanda rey Ciropa punllacunamandapacha, Persia llactata rey Darío mandai callaringacamanmi shina ruranajurca.
6 Asuero mandai callarishca tiempopica, Judá llactapi y Jerusalén llactapi causajcunata juchachingapami shuj cartata escribinajurca.
7 Cutin Persia llactata rey Artajerjes mandajushca punllacunapica, Bislam shuti runapash, Mitrídates runapash, Tabeel shuti runapash y paicunapa chaishuj cumbacunapashmi rey Artajerjesmanga shuj cartata escribirca. Paicunaca arameo shimimanmi traducirca y arameo letracunapimi* escribirca.
8 * Rehúm shuti runa, Simsái secretario* runapashmi Jerusalenbi causaj gentecunata juchachingapaca, cai cartata rey Artajerjesmanga escribirca. Rehumga gobiernopa funcionario principalmi carca.
9 (Cartataca gobiernopa funcionario principal Rehúm, Simsái shuti secretario,* paicunapa cumba juezcuna, menos autoridadta charij gobernadorcuna, secretariocuna, Erec llactamanda gentecuna, babiloniocuna y Susa llactamanda elamitacunami escribirca.
10 Shinallata ninanda rijsi tucushca, jatun Asnapar shuti reyca shuj llactacunatami prezo apashpa, Samaria llactacunapi causachun churarca. Chai llactacunamanda gentecunapashmi chai cartataca escribirca. Shinallata río Éufrates indi huashajujuj ladocunaman causaj gentecunapashmi chai cartataca escribirca.
11 Paicuna cachashca cartapa copiapica cashnami nijurca).
“Rey Artajerjes, ñucanchicunaca quiquinba sirvijcunami capanchi. Río Éufrates indi huashajuj ladocunamandami capanchi.
12 Ñucanchi reylla, quiquin cashca pushtumanda ñucanchi cashca pushtucaman judiocuna chayamushcatami quiquinmanga villangapaj munapanchi. Paicunaca Jerusalenmanmi chayamushca y chai llactatami cutin shayachinajun. Chai llactapi causajcunaca na cazuj, nalipacha nali gentecunami can. Paicunaca cimientocunatami arreglanajun y llactapa pircacunatapashmi shayachishpa tucuchinajun.
13 Shinallata reymanga caitapashmi villangapaj munapanchi, paicuna cai llactata cutin shayachishpa y pircacunatapash shayachi tucuchishpaca, paicunaca ima impuestocunatapash, rey imata mañashcatapash na pagangachu. Shina pasajpica asha culquitallami reycunapaca tandachinga.
14 Ñucanchi pagoca reypa palaciomandami shamun.* Reyta nalipi quidachichunga, na munapanchichu. Chaimandami villachingapaj cai cartata escribishpa cachapanchi.
15 Shinallata quiquin nara rey cajpi, punda mandashca reycunapa* registro libropipash investigachunmi cai cartataca cachapanchi. Chai libropica cai llactamanda gentecuna na cazujcuna cashcatami cuenta japipangui. Shinallata reycunata, llactacunata llaquichij cashcata, pundamandapacha reycunapa contra shayarij gentecuna cashcatapashmi cuenta japipangui. Chaimandallata tucuchi tucushcatapashmi cuenta japipangui.
16 Shinaca ñucanchi reylla, caigutapashmi yachachun munapanchi, judiocuna cai llactata cutin shayachijpi y pircacunatapash shayachi tucuchijpica, quiquinga río Éufrates indi huashajujuj ladocunata* mandaitaca na ushapanguichu” nishpami escribishca carca.
17 Rey Artajerjesca gobiernopa funcionario principal Rehúm runata, Simsái shuti secretariota,* Samariapi causanajuj chaishuj cumbacunata shinallata río Éufrates indi huashajujuj ladocunamanda gentecunatapashmi cashna nishpa contestarca:
“Alillachu capanguichi.
18 Quiquinguna cachamushca cartatami ñucamanga clarito liihuashca.*
19 Ñuca autorizacionda cujpimi ñucapa sirvijcunaca shuj investigacionda rurashca. Chaimandami pundamandapacha chai llacta na cazuj llacta cashcata y reycunapapash contra shayarishpa ashtaca problemacunata rurashcatapashmi cuenta japipashcani.
20 Jerusalén llactataca tauca shinlli jatun reycunami mandashca. Paicunaca río Éufrates indi huashajujuj lado tucuilla pushtucunatami mandan cashca. Shinallata chai reycunamanga impuestocunatapash y paicuna imata mañashcatapashmi paganlla cashca.
21 Shinaca chai jaricuna ama trabajashpa catichun jarcaichi. Chai llactataca ñuca ima hora autorizacionda cungacaman ama shayachichun jarcaichi.
22 Ñuca imata mandashcata uchalla pactachichunmi cangunaca ricuriana canguichi. Shinami reycunaca imapipash na perjudicai tucushun” nircami.
23 Rey Artajerjes cachamushca cartapa copiataca, Rehúm runaman, Simsái shuti secretarioman* y paicunapa cumbacunamanbashmi liishpa uyachirca. Chaita uyashca jipami paicunaca Jerusalenman uchalla rishpa judiocunataca, ama trabajashpa catichun a la fuerza jarcarca.
24 Shina jarcajpimi, Jerusalenbi Taita Diospa huasita cutin shayachinaca chaipi quidarca. Chaica Persia llactata rey Darío ishcai huatata mandangacamanmi chaipi quidarca.
Notacuna
^ Hebreo shimipica “mascanchi” nijunmi.
^ Hebreo shimipica “maquicunata debilyachinajurca” nijunmi.
^ O talvez “arameo shimipimi escribishcanga y jipaman traducishcanga”.
^ Esdras 4:8manda 6:18camanga primeropica arameo shimipimi escribishca carca.
^ Arameo shimipica “Ñucanchica palaciomanda cachitami micunchi” nijunmi.
^ Arameo shimipica “canba taitacunapa” nijunmi.
^ O “ni shuj parteta”.
^ O talvez “ñucaman traducishca y liihuashca”.
