Esdras 5:1-17
5 Jipamanga Idó shuti runapa nieto profeta* Zacarías y profeta Ageopash Judá y Jerusalenbi cashca judiocunahuanmi parlai callarirca. Paicunaca Israel llactapa Taita Diospa shutipimi parlanajurca. Taita Diosca judiocunahuanmi carca.
2 Paicunahuan parlashcamandami Sealtiel shuti runapa churi Zorobabel y Jehozadac runapa churi Jesuapash, Jerusalenbi Taita Diospa huasita cutin shayachi callarirca. Paicunataca Taita Diospa profetacunami ayudanajurca.
3 Chaimi río Éufrates indi huashajujuj ladocunamanda Tatenái shuti gobernador, Setar-Bozenái shuti runa y paicunapa cumbacunapash judiocunapaman rishpa cashna tapunajurca: “¿Picunata cangunamanga cai huasita cutin shayachichun y cai obrata tucuchichunga* permisota curca?” nishpami tapunajurca.
4 Shinallata, “cai obrapi trabajaj jaricunaca ¿ima shuticunata can?” nishpapashmi tapunajurca.
5 Shinapash Taita Diosca judiocunata ñaupaman pushaj jaricunataca* cuidajurcami.* Chaimi Tatenái y chaishuj jaricunapash chai obrata rurashpa catichunga na jarcai usharca. Chaipa randica rey Dariomanga shuj informetami cacharca. Y rey Darío paipa respuestata shuj cartapi contestachunbashmi shuyanajurca.
6 Río Éufrates indi huashajujuj ladocunamanda Tatenái shuti gobernador, shinallata Setar-Bozenái runa y paicunapa cumbacunapashmi rey Dariomanga shuj cartata cacharca. Chai cumbacunaca menos autoridadta charij gobernadorcunami carca. Chai cachashca cartapa copiaca caimi can.
7 Chai escribishca informepica cashnami nijurca:
“Rey Darío:
”Ali causaiguta charipangui.
8 Reymanga Judá llactapi, jatun Diospa huasiman rishcatami villangapaj munapanchi. Chai huasitaca jatun jatun rumicunahuan shayachinajujtami ricuparcanchi. Shinallata pircacunapica racu caspicunatami churanajurca. Chai llactapi causajcuna chai huasita shayachingapaj shinllita trabajanajushcamandami, chai obraca ninanda avanzajushca.
9 Chaimi paicunata ñaupaman pushaj jaricunataca cashna nishpa tapurcanchi: ‘¿Picunata cangunamanga cai huasita cutin shayachichun y cai obrata tucuchichunga* permisota curca?’ nishpami tapurcanchi.
10 Shinallata paicunapa jefecunapa shuticunata tapushpami escribircanchi. Shinami quiquinga picunalla encargadocuna cashcataca yachapangui.
11 ”Paicunaca cashna nishpami tigrachirca: ‘Ñucanchicunaca jahua cielopi* y cai alpapi Taita Diospa sirvijcunami capanchi. Ñucanchicunaca tauca huatacuna huashaman, Israel llactamanda shuj jatun rey rurashca huasitami cutin shayachinajunchi.
12 Ñucanchi punda taitacunaca jahua cielomanda* Taita Diostami ninanda culirachirca. Chaimandami Babilonia llactamanda caldeo rey Nabucodonosorpa maquipi saquirca. Chai reymi cai huasita tucuchishpa saquirca y gentecunatapash Babiloniaman prezo aparca.
13 Shinapash Babiloniamanda rey Ciro* primer huatata mandajushpami, rey Ciroca Taita Diospa huasita cutin shayachichun shuj permisota curca.
14 Shinallata rey Ciroca Babiloniapi tiashca templomanda orohuan y platahuan rurashca cosascunata* llujchichunmi mandarca. Chai cosascunatami Nabucodonosorca Jerusalenbi tiashca Taita Diospa templomanda japishpa, Babiloniapi tiashca temploman apashcarca. Chai cosascunatami rey Ciroca Sesbazar* runaman cuchun mandashcarca. Paitami Ciroca gobernador cachun churarca.
15 Paitami Ciroca cashna nishcarca: “Cai cosascunataca Jerusalenbi tiashca temploman apai. Shinallata Taita Diospa huasitaca punda tiajushca pushtupillata cutin shayachi” nishcarcami.
16 Chai Sesbazar runa chayashpaca, Jerusalenbi Taita Diospa huasipa cimientocunatami churarca. Chai punllamandapachami huasichinajushcanchi, pero nara tucuchinchichu’ ninajurcami.
17 ”Chaimandami reypa ñaupapi ali cajpica, Babiloniapi tiashca ninan valishca cosascunata y documentocunata alichina* pushtupi shuj investigacionda rurachun mañapanchi. Y Jerusalenbi Taita Diospa huasita cutin shayachichun rey Ciro ciertopacha mandashcata o na mandashcata ricuchichunbashmi mañapanchi. Shinallata rey imata decidishcata shuj cartapi contestachunbashmi mañapanchi” ninajurcami.
Notacuna
^ O “cai viga caspicunata churachunga”.
^ Arameo shimipica “paicunapa Taita Diospa ñavica paicunapa jahuapimi carca” nijunmi.
^ O “viga caspicunata churachunga”.
^ Hebreo shimipica “cielocunapi” nijunmi.
^ Hebreo shimipica “cielocunamanda” nijunmi.
^ “Babiloniamanda rey Ciro” nishca titulotaca, Persiamanda rey Cirollatami Babiloniata conquistashca jipaca churarishca yarin.
^ Caipi cosascuna nishpaca copacunamanda y tazongunamandami parlajun yarin.
^ Caipi parlashca Sesbazarca Esdras 2:2 y 3:8pi parlashca Zorobabelmi yarin.
^ O “huacaichina”.
