Esdras 7:1-28
7 Cai cosascuna pasashca jipami Persia llactamanda rey Artajerjes mandajuj tiempopica, Esdras* runaguca Babilonia llactamanda Jerusalenman tigrarca. Paica Seraya runapa churimi* carca. Seraya runaca, Azarías runapa churimi carca. Azariasca, Hilquías runapa churimi carca.
2 Hilquiasca, Salum runapa churimi carca. Salum shuti runaca, Sadoc runapa churimi carca. Sadoc runaca, Ahitub runapa churimi carca.
3 Ahitub runaca, Amarías runapa churimi carca. Amariasca, Azarías runapa churimi carca. Azariasca, Merayot shuti runapa churimi carca.
4 Merayotca, Zerahías shuti runapa churimi carca. Zerahiasca, Uzí runapa churimi carca. Uzí runaca, Buquí shuti runapa churimi carca.
5 Buquí shuti runaca, Abisúa runapa churimi carca. Abisúa runaca, Finehás runapa churimi carca. Finehasca, Eleazar runapa churimi carca. Eleazarca, sacerdote principal* Aaronba churimi carca.
6 Cai Esdras runami, Babilonia llactaman vichai rirca. Paica Moisesman Cushca Leyta alipacha copiaj* runami carca. Chai Leytaca Israel llactapa Jehová Diosmi israelitacunaman cushcarca. Jehová Diospa maqui paihuan cashcamandami reyca pai tucui imata mañashcata curca.
7 Huaquin israelitacuna, sacerdotecuna, levitacuna, candajcuna, pungucunata cuidajcuna y templo huasipi sirvientecunapashmi* rey Artajerjes 7 huatacunata mandajuj tiempopica Jerusalenman vichai rirca.
8 Esdras runaguca rey Artajerjes 7 huatata mandajushca picha quillapimi* Jerusalén llactamanga chayarca.
9 Babilonia llactamandaca primer quillapa* primer punllapimi llujshirca. Paipa Taita Dios paihuan cashcamandami* picha quillapa primer punllapi Jerusalenmanga chayarca.
10 Esdrasca Jehová Diospa Leymanda yachajungapaj y yachajushcata pactachingapami paipa shunguta prepararca.* Shinallata Israel llactamanda gentecunaman Taita Diospa reglamentocunamanda y Taita Diospa decisiongunamandapash yachachingapami paipa shunguta prepararca.
11 Esdrasca Jehová Diospa mandamientocunamanda shinallata israelitacunaman cushca leycunamandapash* alipacha yachajushcami carca. Esdrasca Taita Diospa Leyta copiaj* y sacerdotepashmi carca. Rey Artajerjes Esdrasman cushca cartapa copiaca caimi can:
12 * “Ñucaca reycunapa rey Artajerjesmi cani. Jahua cielopi* Taita Diospa Leyta copiaj* sacerdote Esdrastaca ali causaiguta charipangui nipanimi.
13 Ñuca mandajushca llactapi tucuilla israelitacuna, sacerdotecuna y levitacunapash munashpaca canhuan Jerusalenman tigrachunmi autorizacionda cushcani.
14 Ñucapash y ñucapa 7 consejerocunapash Judapi y Jerusalenbi canba Taita Diospa Leyta pactachinajujta o na pactachinajujta ricuchunmi cachanajunchi. Chai Leytami canga alipacha yachangui.*
15 Shinallata Jerusalenbi causaj Taita Diosmanga ñuca y ñucapa consejerocunapash carangapaj munashca platata y orotapashmi apana cangui. Paimi Israel llactapa Taita Dios can.
16 Ashtahuanbash Babilonia llactapi canman cushca* tucuilla platata y orotapashmi apana cangui. Shinallata israelitacuna y sacerdotecunapash paicunapa Taita Diospa huasipa carangapaj munashcatapashmi apana cangui. Paicunapa Taita Diospa huasica Jerusalenbimi can.
17 Chai culquihuanga uchallami torocunata, jari llamacunata, maltun llamacunataca, grano ofrendacunandi* y vino ofrendacunandi* randina cangui. Chaitaca Jerusalenbi canba Taita Diospa huasi altarpimi cuna cangui.
18 ”Cutin puchushca plata materialhuan y orohuanga can y canba cumba sacerdotecunapash cangunapa Taita Diospa voluntadhuan de acuerdo cajpica, ima munashcata ruraichilla.
19 Ashtahuanbash canba Taita Diospa huasipi adorangapaj sirvichunmi, Jerusalenbi Taita Diospa ñaupapica copacunata, tazongunata y shuj cosascunatapash entregana cangui.
20 Shinallata canba Taita Diospa huasipa imapash minishtirishca cosascunata cuna cashpaca, reypa valishca cosascunamanda japishpami pagana cangui.
21 ”Ñucaca rey Artajerjesmi cani. Ñucami río Éufrates indi huashajujuj ladocunamanda tucuilla tesorerocunamanga cai ordenda cushcani: Jahua cielomanda* Taita Diospa Leyta copiaj sacerdote Esdrasmanga pai tucui imata mañashcata uchalla cuchunmi ordenashcani.
22 Paimanga 3 mil 420 kilos* de platata, 16 mil kilos* de trigota, 2 mil 200 litros* de vinota y 2 mil 200 litros* de aceitetami cuna canguichi. Chai yalitaca na cunachu canguichi. Pero cachitaca mashna minishtirishcatami cunalla canguichi.
23 Jahua cielomanda* Taita Dios paipa huasipa tucui imata mandashcataca uchallami rurana can. Shinami jahua cielomanda Taita Diosca ni ñucanchi gentecunahuan, ni ñucahuan, ni ñucapa churicunahuanbash na culiranga.
24 Chashnallata sacerdotecunata, levitacunata, musicocunata, pungucunata cuidajcunata y templo huasipa sirvientecunatapash* ima impuestocunatapash na cobrana cashcatami villani. Shinallata Taita Diospa huasipi shuj trabajadorcunatapash na cobranachu can.
25 Cutin Esdras, canga Taita Dios canman cushca ali yachaita utilizashpami* río Éufrates indi huashajujuj ladocunamanda, Taita Diospa leycunata yachaj gentecunata juzgachunmi juezcunata, juezcunata ayudaj shuj juezcunatapash* nombrana cangui. Shinallata cai leycunamanda nara yachajcunamanga cangunami yachachina canguichi.
26 Canba Taita Diospa Leyta y reypa leyta pipash na cazujpica, chai ratomi huañuchi tucuna can. Na cashpaca shuj llactamanmi llujchi tucuna can. O sinoca shuj multatami cobrai tucuna can. O carcelpimi churai tucuna can” nircami.
27 Jehová Diosca alabai tucushca cachun. Paimi ñucanchi punda taitacunapa Taita Dios can. Paimi reypa shungupica, Jerusalén llactapi Jehová Diospa huasita juyaillaguta rurana munaita churarca.
28 Taita Diosca ñucataca ninandami juyahuashca.* Paimi reypa, reypa consejerocunapa y reypa principecunapa ñaupapipash ali ricurichun ayudahuashca. Chaimi ñuca Jehová Diospa maqui ñucahuan cashcamandaca shinlli tucurcani. Y israelitacunapa huaquin jefecunatapashmi ñucahuan vichai richun tandachircani.
Notacuna
^ Cai shutica “ayuda” nijunmi.
^ Cai capitulopi churicuna nishpaca descendientecunamandapashmi parlajun yarin.
^ Glosariopi “sacerdote principal” shimita ricupangui.
^ O “netineocunapashmi”. Hebreo shimipica “cushca gentecuna” nijunmi.
^ Caipi picha quilla nishpaca mediados de juliomanda a mediados de agostocamanmi parlajun. Apéndice B15ta ricupangui.
^ Caipi primer quilla nishpaca mediados de marzomanda a mediados de abrilcamanmi parlajun. Apéndice B15ta ricupangui.
^ Hebreo shimipica “Paipa Taita Diospa ali ali maqui paipa jahuapi cajpimi” nijunmi.
^ O “paipa shungupi decidirishca carca”.
^ O “normas”.
^ Hebreo shimipica “cielocunapi” nijunmi.
^ Esdras 7:12manda versículo 26camanga primeropica arameo shimipimi escribishca carca.
^ Arameo shimipica “canba maquipimi” nijunmi.
^ Arameo shimipica “can tarishca” nijunmi.
^ O “ofrenda de grano”. Cai ofrendacunaca harina fina, camllashca cebada o trigo, redondo tortacuna y galletacunapashmi caita usharca.
^ O “ofrenda de vino”. Glosariopi “ofrenda de vino” shimita ricupangui.
^ Hebreo shimipica “cielocunamanda” nijunmi.
^ Arameo shimipica “100 talentos” nijunmi. Apéndice B14ta ricupangui.
^ Arameo shimipica “100 coros” nijunmi. Apéndice B14ta ricupangui.
^ Arameo shimipica “100 batos” nijunmi. Apéndice B14ta ricupangui.
^ Arameo shimipica “100 batos” nijunmi. Apéndice B14ta ricupangui.
^ Hebreo shimipica “cielocunamanda” nijunmi.
^ O “netineocunatapash”. Arameo shimipica “cushca gentecuna” nijunmi.
^ Arameo shimipica “canba Taita Diospa sabiduría canba maquipi cashcashnami” nijunmi.
^ O “magistradocunatapash”.
^ O “amor leal”.
