Esdras 8:1-36
8 Rey Artajerjes mandajushca tiempopimi huaquin familiacunapa jefecuna y shuj jaricunapash ñucahuan Babiloniamanda vichai rirca. Paicunapa shuticunaca familiacunapa listapi escribishcami carca. Familiacunapa jefecunapa shuticunaca caicunami can:
2 Finehás runapa churicunamandaca* Guersom shuti runa, Itamar runapa churicunamandaca Daniel runa, David runapa churicunamandaca Hatús shuti runapashmi vichai rirca.
3 Secanías runapa churicunamandaca Zacarías runami vichai rirca. Zacariashuanga 150 registrashca jaricunapashmi vichai rirca. Secaniasca Parós shuti runapa churicunamandami carca.
4 Pahat-Moab shuti runapa churicunamandaca, Zerahías shuti runapa churi Elieho-Enái shuti runami vichai rirca. Elieho-Enái runahuanga 200 jaricunapashmi rirca.
5 Zatú shuti runapa churicunamandaca, Jahaziel runapa churi Secanías runami rirca. Secaniashuanga 300 jaricunapashmi rirca.
6 Adín shuti runapa churicunamandaca, Jonatán runapa churi Ébed shuti runami rirca. Ébed runahuanga 50 jaricunami vichai rirca.
7 Elam runapa churicunamandaca, Atalía shuti runapa churi Jesayá runami rirca. Jesayá runahuanga 70 jaricunapashmi rirca.
8 Sefatías shuti runapa churicunamandaca, Miguel runapa churi Zebadías shuti runami rirca. Zebadiashuanga 80 jaricunapashmi rirca.
9 Joab runapa churicunamandaca, Jehiel shuti runapa churi Abdías runami rirca. Abdías runahuanga 218 jaricunapashmi rirca.
10 Baní runapa churicunamandaca, Josifías shuti runapa churi Selomit shuti runami rirca. Selomit runahuanga 160 jaricunapashmi rirca.
11 Bebái shuti runapa churicunamandaca, Zacarías runami rirca. Zacariasca Bebaipa churimi carca. Zacariashuanga 28 jaricunapashmi rirca.
12 Azgad shuti runapa churicunamandaca, Hacatán shuti runapa churi Johanán shuti runami rirca. Paihuanga 110 jaricunapashmi rirca.
13 Adonicam runapa churicunamandaca cai quimsa runacunami Judá llactamanga último tigrarca. Paicunaca Elifélet shuti runa, Jeiel shuti runa y Semaya shuti runacunami carca. Paicunahuanga 60 jaricunapashmi tigrarca.
14 Bigvái shuti runapa churicunamandaca, Utái shuti runa y Zabbud shuti runacunami rirca. Paicunahuanga 70 jaricunapashmi rirca.
15 Paicunataca Ahavá shuti pushtuman chayaj río manñapimi tandachircani. Chaipimi ñucanchi carpacunata shayachishpa quimsa punllacunata chaipi quidarcanchi. Pero llactamanda gentecunapurapi y sacerdotecunapurapi mascashpapash, ni maijan levitatallapash na tarircanichu.
16 Chaimandami Eliezer, Ariel, Semaya, Elnatán, Jarib, Elnatán, Natán, Zacarías y Mesulam shuti jefecunatapash cayachun cacharcani. Shinallata Joiarib y Elnatán shuti yachachij jaricunatapashmi cayachun cacharcani.
17 Paicunataca Casifía shuti pushtumanda Idó shuti liderhuan parlachunmi cacharcani. Paicunaca Idó shuti runata y paipa huauquicunataca cashnami nina carca: ‘Ñucanchi Taita Diospa huasiman sirvientecunata apamupaichi’ nishpa. Idó shuti runa y paipa huauquicunaca Casifía pushtupi templopa sirvientecunami* carca.
18 Taita Dios ñucanchihuan cashcamandami,* paicunaca Serebías shuti runagutaca paipa churicunandi y paipa huauquicunandi apamurca. En totalca 18 jaricunami carca. Serebiasca Mahlí shuti runagupa churicunamandaca aliguta pensarij jarimi carca. Mahlí shuti runaca Leví runapa nietomi carca. Levica Israelpa* churimi carca.
19 Shinallata merarita gentecunamanda Hasabías shuti runata y Jesayá shuti runatapashmi apamurca. Jesayá runataca paipa huauquicunandi y churicunandimi apamurca. En totalca 20 jaricunami carca.
20 Shinallata templopi sirvij 220 sirvientecunatapashmi* paicunaca cacharca. Chai tucuilla sirvientecunapa shuticunaca shuj listapi escribishcami carca. Chai sirvientecunaca punda tiempocunapi templopi sirvishca sirvientecunapa huahuacunami carca. Templopi sirvientecunataca Davidpash y principecunapashmi levitacunata ayudachun punda tiempopica agllashcarca.
21 Río Ahavá ladopica, ñucanchi Taita Diospa ñaupapi humillaringapami imatapash na micushpa ayunachun* mandarcani. Chaitaca ñucanchi huahuacunandi y ñucanchi cosascunandi viajanajujpi, maita rinata ricuchishpa Taita Dios ñucanchita cuidachunmi rurarcanchi.
22 Ñucanchica reymanga nishcarcanchimi: “Ñucanchi Taita Diospa ali ali maquica paita tucui mascajcunahuanmi can. Pero paita jichushpa saquijcunataca ushashcata culirashpami shinllita castigan” nishcarcanchimi. Chaita nishcamandami soldadocunata y caballocunapi tiarishca soldadocunatapash, ñanbi ñucanchita contracunamanda cuidachun reyta mañanataca ninanda pinganayarca.
23 Chaimandami imagutapash na micushpa ayunarcanchi* y ñucanchi Taita Diostaca ñanbi cuidahuangui nishpapashmi mañarcanchi. Ñucanchi mañashcacunataca Taita Diosca uyarcami.
24 Chai jipaca sacerdotecunapa jefecunamandaca 12 jefecunatami shicanyachircani: Serebías shuti jefeta, Hasabías shuti jefeta y paicunapa 10 cumbacunatapashmi separarcani.
25 Paicunapa ñaupapimi ñucanchi Taita Diospa huasipa carashca platata, orota y cosascunatapash pesarcani. Caicunataca reypash, paipa consejerocunapash, paipa principecunapash y chaipi cashca tucuilla israelitacunapashmi carashcarca.
26 Shinaca 22 mil 230 kilos* de platata shinallata platahuan rurashca 100 cosascunatami pesashpa curcani. Chai 100 cosascunaca en totalca 68 kilostami* pesarca. Shinallata 3 mil 420 kilos* de orotapashmi pesashpa curcani.
27 Orohuan rurashca uchilla 20 tazongunatapashmi pesashpa curcani. Chai tazongunaca mil monedas* de oromi valijurca. Shinallata alipacha broncehuan rurashca pucalla brillajuj ishcai cosastapashmi pesarcani. Chai cosascunaca orohuan rurashca cosascunashnallata ninan valishcami carca.
28 Paicunataca cashnami nircani: “Quiquingunaca Jehová Diospalla separashcacunami canguichi. Y chai cosascunapash paiman separashcacunami can. Cai platapash y oropash cangunapa punda taitacunapa Taita Dios Jehovaman carashca ofrendacunami can.
29 Cangunaca, Jerusalén llactaman chayashpa Jehová Diospa huasipa cuartocunapi* cai cosascunata pesangacamanmi ali ali cuidana canguichi. Chaitaca sacerdotecunapa, levitacunapa jefecunapa ñaupapi y Israel llactamanda familiacunata mandaj principecunapa ñaupapipashmi pesana canguichi” nircanimi.
30 Jerusalén llactapi ñucanchi Taita Diospa huasiman apangapaj pesashca platata, orota y shuj cosascunataca sacerdotecunapash y levitacunapashmi chasquirca.
31 Antsicarinmi primer quillapa* 12 punllapica Ahavá shuti riomanda, Jerusalenman ri callarircanchi. Ñucanchi Taita Diospa maquica ñucanchihuanmi carca. Paimi ñanbica ñucanchi contracunamanda y shuacunamandapash salvarca.
32 Jerusalenman chayashpaca quimsa punllacunatami chaipi quidarcanchi.
33 Y chuscu punllapica ñucanchi Taita Diospa huasipica platata, orota y cosascunatapashmi pesarcanchi. Chaicunatami Uriya runapa churi Meremot shuti sacerdotemanga entregarcanchi. Meremotca Eleazar runahuan, Jozabad shuti levitahuan y Noadías shuti levitahuanmi carca. Eleazarca Finehás runapa churimi carca. Jozabadca Jesúa runapa churimi carca. Noadiasca Binuí shuti runapa churimi carca.
34 Paicunaca tucuita contashpami pesarca. Y tucui mashna pesashcatami anotarca.
35 Shinallata prezo apai tucushcacunamanda tigramushcacunaca Israel llactapa Taita Diosmanmi rupachina ofrendacunata* curca. Tucuilla israelitacunamandami 12 torocunata curca. Shinallata 96 jari llamacunata, 77 maltun llamacunatapashmi curca. Y pecado ofrendapaca* 12 jari chivocunatami curca. Tucui chaicunami Jehová Diosman cushca rupachina ofrenda carca.
36 Chai jipaca rey cushca ordengunatami, reypa representante sátrapa* runacunaman y río Éufrates indi huashajujuj ladomanda gobernadorcunaman curcanchi. Chaimi paicunaca Taita Diospa* huasipa minishtirishcaguta curca y llactatapash apoyarca.
Notacuna
^ Cai capitulopi churicuna nishpaca descendientecunamandapashmi parlajun yarin.
^ O “netineocunami”. Hebreo shimipica “cushca gentecuna” nijunmi.
^ Hebreo shimipica “Ñucanchi Taita Diospa ali ali maqui ñucanchihuan cashcamandami” nijunmi.
^ Taita Diosmi Jacobmanga Israel shutita churarca.
^ O “netineocunatapashmi”. Hebreo shimipica “cushca gentecuna” nijunmi.
^ Hebreo shimipica “talentos” nijunmi. Talvez dos talentocunami cashca yarin. Apéndice B14ta ricupangui.
^ Hebreo shimipica “100 talentos” nijunmi. Apéndice B14ta ricupangui.
^ Hebreo shimipica “650 talentos” nijunmi. Apéndice B14ta ricupangui.
^ Hebreo shimipica “dáricos” nijunmi. Shuj daricoca persa llactamanda monedami carca. Apéndice B14ta ricupangui.
^ O “comedorcunapi”.
^ Caipi primer quilla nishpaca mediados de marzomanda a mediados de abrilcamanmi parlajun. Apéndice B15ta ricupangui.
^ O “ofrenda quemada”. Glosariopi “ofrenda quemada” shimita ricupangui.
^ O “ofrenda por el pecado”. Glosariopi “ofrenda por el pecado” shimita ricupangui.
^ ‘Llactata cuidajcunatami’ sátrapa nishpa rijsin carca. Caipica Persia llactapa provinciacunapa gobernadorcunamandami parlajun.
^ O “Dios verdadero”. Glosariopi “Dios verdadero” shimita ricupangui.
