Esdras 9:1-15
9 Cai tucui cosascunata rurashca jipami principecunaca ñucapaman quimirishpa cashna nihuarca: “Israelitacuna, sacerdotecuna y levitacunapash ladolla llactacunapa millanai ruraicunata rurashpami causanajun. Paicunaca cananeo gentecunapa, hitita gentecunapa, perizita gentecunapa, jebuseo gentecunapa, ammonita gentecunapa, moabita gentecunapa, egipcio gentecunapa y amorreo gentecunapa ruraicunamandapash na caruyashcachu.
2 Paicunapash y paicunapa churicunapash chai llactamanda huarmicunahuanmi cazarashca. Chaimandami sagrado llactaca chai llactamanda gentecunahuan chapurishca. Ashtahuangarin principecuna y autoridadta charij jaricunami chai pecadotaca primerito rurashca” ninajurcami.
3 Chaita uyashcandimi, ucuman churajuna ñuca ropata y sin mangas churajuna ropata liquishpa, ñuca uma ajchata y ñuca barbastapash pilarircani. Imatapash na ni ushashpami ninanda llaquirishpa tiarircani.
4 Babiloniamanda tigramushcacuna pecadota rurashcamandami, Israel llactapa Taita Diospa shimicunata ninanda respetajcunaca* tucuicunami ñuca muyundipi tandanajurca. Ñucaca imatapash na ni ushashpami ninanda llaquirishpa chishi grano ofrendata* cuna horascaman tiarishpa quidarcani.
5 Chishi grano ofrendata cuna horas chayajpica, llaquilla tiajushca pushtumandami ñucaca jatarircani. Liqui ropata* churajuriami cungurishpa, ñuca Taita Jehová Diostaca maquita alzashpa mañarcani.
6 Paitaca nircanimi: “Ñuca Taita Dioslla, ñucaca ninanda pingai tucushcami capani. Ñuca Taita Dioslla, ñucaca quiquinda mañanatapash na miricipanichu. Ñucanchi pecadocunaca ashtacacunapachami can. Ñucanchi pandarishcacunaca jahua cielocamanmi mundunarishca.
7 Ñucanchi taitacunapa punllacunamandapachami, cunangaman ninanda pandaripashcanchi. Chai pandarishcacunamandami ñucanchi reycunapash, ñucanchi sacerdotecunapash shuj llactacunamanda reycunapa maquipi entregai tucushca. Ñucanchitaca espadacunahuanmi huañuchishca, prezopashmi apashca. Ñucanchi charishcacunatapashmi shuashca, humillaitapashmi humillashca y cunanbipash chashnallatami pasajun.
8 Pero ñucanchi Jehová Dioslla, asha tiempogutaca canga ñucanchita llaquishpami tratashcangui. Ñucanchicunamandaca huaquingunallapash libre cachunmi saquishcangui. Y canba sagrado pushtupi ñucanchicuna seguro pushtuguta* charichunbashmi ayudashcangui. Chaitaca ñucanchi Taita Dioslla, ñucanchicuna cushilla* cachun y esclavocuna cajpipash ashatallapash samachunmi rurashcangui.
9 Ñucanchi Taita Dioslla, esclavocuna cajpipashmi canga ñucanchitaca na jichushcangui. Ñucanchitaca ninanda juyashcatapashmi* ricuchishcangui. Persia llactamanda reycuna ñucanchipa bien imagutapash rurachunmi ayudashcangui. Shinami llaquinaita huaglishca canba huasiguta cutin shayachichunga cutin fuerzata cushcangui. Shinallata Judá llactapi y Jerusalén llactapipash rumihuan rurashca pircatami* ñucanchimanga curcangui.
10 ”Y cai cosascuna pasashca jipaca, ñucanchi Taita Dioslla ¿imatata nipashunyari? Ñucanchica canba mandamientocunatami saquishcanchi.
11 Chai mandamientocunataca canda sirvij profetacunahuanmi ñucanchimanga curcangui. Quiquinga cashnami nircangui: ‘Canguna japigrinajushca alpacunaca mapami can. Porque chai alpacunapi causaj gentecuna, nali millanai ruraicunata rurashpa causanajuimandami chai alpacunaca mapa can. Paicunaca paicunapa nali ruraicunahuanmi chai alpacunataca jundachishca.
12 Shinaca cangunapa ushicunataca paicunapa churicunahuanga na cazarachinachu canguichi. Ni paicunapa ushicunatapash cangunapa churicunapaca na chasquinachu canguichi. Paicuna tranquilo causaiguta charichunbash y paicunapa bienbapash nunca na ayudanachu canguichi. Shinami cangunaca shinllicuna tucunguichi y alpapi ali fucushcacunatapash micunguichi. Chai alpacunataca cangunapa churicunapapashmi para siempre japinguichi’ nircanguimi.
13 Ñucanchi Taita Dioslla, ñucanchi pandarishcacunamandaca ñucanchi miricishcashnaca na tratapashcanguichu. Chaipa randica, caipi cashca tucui ñucanchicunatami libre cachun saquishcangui. Ñucanchipa nali rurashcacunamandallata y ñucanchipa culpamandallata cai tucui cosascuna ñucanchita pasajushca jipachu,
14 ¿cutin canba mandamientocunataca na cazushun? Y ¿chai nali millanai ruraicunata ruraj gentecunahuanllu cazaragrinchi? Quiquinga ninanda culirashpami pipash na escapari ushajpillata, ni salvari ushajpillata tucuchitapacha tucuchishpa saquinguiman.
15 Israel llactapa Jehová Dioslla, canga alita ruraj* Taita Diosmi capangui. Porque huaquingunaca cunan punllacamanmi salvarita ushapashcanchi. Ñucanchicunamandaca canba ñaupapi shayarina derechotaca nipipash na charipanchichu. Shinapashmi pecadorcuna cashpapash canba ñaupapi capanchi” nishpami mañarcani.
Notacuna
^ Hebreo shimipica “canba ñaupapi chujchunajujcunaca” nijunmi.
^ O “ofrenda de grano”. Cai ofrendacunaca harina fina, camllashca cebada o trigo, redondo tortacuna y galletacunapashmi caita usharca.
^ O “ucuman churajuna ñuca ropata y sin mangas churajuna ropata”.
^ Hebreo shimipica “estacata” nijunmi.
^ Hebreo shimipica “ñucanchi ñavicuna punchalla” nijunmi.
^ O “amor leal”.
^ O “cuidaj pircatami”.
