Hebreos 1:1-14
1 Punda tiempocunapica profetacunata* cachashpami, Taita Diosca ñucanchi punda taitamamacunamanga tauca viajecunata parlarca y shuj shuj formacunapimi paicunamanga villarca.
2 Cai tiempopica paipa Churita utilizashpami Taita Diosca ñucanchihuan parlashca. Paitami tucuita herenciatashna japichun churarca. Paihuanmi Taita Diosca, cai alpapipash jahua cielopipash* tucuita rurarca.
3 Paica Taita Diospa podertaca alipachami ricuchin y Taita Diosman parecidopachami can. Paipa shimipa ninan ushaihuanmi tucui cosascuna tiashpa catichun ayudan. Ñucanchi pecadocunamanda ñucanchita limpiota rurashca jipami, paica jahua cielopi Jatun Taita Diospa ali ladopi tiarirca.
4 Shinami paica, angelcunamandapash ashtahuan yali importante tucurca. Porque paicunamandapash yali alipacha shutitami paica chasquishca.
5 Por ejemplo ¿maijan angeltata Taita Diosca, “canmi ñucapa churigu cangui, cunanmi ñucaca canba taita tucushcani” nishca? O ¿“ñucami paipa taita casha y paimi ñucapa churi tucunga” nishca?
6 Paipa primer Churita cutin cai alpaman cachamushpami nin: “Taita Diospa tucui angelcunami paipa ñaupapi cungurina can” nishpa.
7 Ashtahuanbash angelcunamanda parlashpaca ninmi: “Paipa angelcunataca huairashna shinlli cachunmi ruran. Y paipa sirvijcunataca, rupajuj ninatashnami ruran” ninmi.
8 Cutin paipa Churimanda parlashpaca ninmi: “Taita Diosmi canmanga, para siempre mandana autoridadta cunga. Canba Gobiernoca alita rurashpami* mandanga.
9 Canga alita ruranatami* juyarcangui. Nalita ruranataca na ricunayachircanguichu. Chaimi canba Taita Diosca, aceiteta talishpa candaca agllarca. Shinami canmanga shuj reycunatapash yali cushijuita curca” ninmi.
10 Shinallata ninmi: “Quiquinmi* callaripica cai alpapa cimientocunataca shayachircangui. Jahua cielopash quiquinba maquihuan rurashcami can.
11 Alpapash, cielopash tucuringami. Pero canga para siempremi causangui. Alpapash, cielopash churajuna ropashnami* maucayanga.
12 Chaicunataca jatanatashnami* pillungui. Shinallata alpapash, cielopash churajuna ropashnami cambiai tucunga. Pero quiquinga nunca na cambianguichu. Quiquinba causaipash nunca na tucuringachu” ninmi.
13 Y ¿maijan angeltata Taita Diosca nirca: “Canba tucuilla contracunata canba chaquihuan saruchun ñuca churangacamanmi, canga ñuca ali ladopi tiajuna cangui” nishpa?
14 ¿Nachu tucui angelcuna* Taita Diosta sirvinajun? ¿Nachu salvai tucuna gentecunata ayudachun, Taita Diosca paicunataca cacharca?
Notacuna
^ O “cai tiempocunatapash”. Glosariopi “cai tiempo” shimita ricupangui.
^ Griego shimipica “Kýrios” nijunmi. “Kýrios” nishpaca “Señor” nijunmi.
^ O “llachapashnami”.
^ O “jatatashnami”.
