Hebreos 6:1-20
-
Ashtahuan alipacha yachajushpa ñaupaman catipashunchi (1-3)
-
Imata crishcata saquijcunaca cutinmi Churitaca shuj jatun racu caspipi clavan (4-8)
-
Shuyanajushca esperanzata japinataca seguromi caita ushapanguichi (9-12)
-
Pai imata prometishcataca Taita Diosca cumplingami (13-20)
-
Taita Dios imata prometishca y pai imata juramentushcapash nunca na cambianllu (17, 18)
-
6 Shinaca, Cristomanda primero yachajushcacunataca ñami huashaman saquishcanchi. Chaimandami ashtahuan alipacha yachajushpa ñaupaman catina* capanchi. Chaipaca primero yachajushcacunataca ñana cutin cutin yachajushpa catinachu canchi. Por ejemplo: Yanga ruraicunamanda arripintirinata, Taita Diospi crinata,
2 bautismocunamanda yachachishcacunata, uma jahuapi maquita churanacunata, huañushcacuna causarinata y nunca na cambiana juiciomandaca* cutin cutinga na yachajujunallachu capanchi.
3 Taita Diospa ayudahuanmi ashtahuan ñaupaman catita ushashun.
4 Huaquingunaca cabal yachachishcacunataca saquishcami. Chaimandami paicunata arripintirichun ayudaitaca nipi na ushan. Paicunaca cabal yachachishcacunapa michagutami chasquishcarca. Jahua cielomanda carashcatapash, shinallata espíritu santotapashmi paicunaca chasquishcarca.
5 Paicunaca Taita Diospa alipacha shimitapash y shamuj punllacunapi* tiana mushuj causaipi japina bendiciongunatapashmi chasquishcarca.
6 Shinapashmi paicuna imata crishcataca saquirca. Shina gentecunata arripintirichun ayudaitaca nimamanda na usharinllu. Porque paicunaca, Taita Diospa Churita cutin shuj jatun racu caspipi* clavashpami, gentecunataca paipa contra nalicunata rimachin.
7 Cutin cutin tamiajpimi alpaca, chai tamia yacuta chupashpa plantacunata aliguta viñachishpa, tarpudorcunataca gushtuta cozechachun ayudan. Shinami alpaca Taita Diospa bendición can.
8 Cashacunalla viñaj alpataca tarpudorcunaca na ricunayachinllu. Chai alpaca ñalla maldicishca cangapami tiajun. Ultimomangarin rupachitapashmi rupachi tucunga.
9 Juyashca huauquicuna, quiquingunaca imata crishcata saquijcunashnaca na capanguichichu. Chaimi cashnacunata nishpapash quiquinguna Taita Diospa ñaupapi ashtahuan ali ricurishcataca seguro capanchi. Porque quiquingunaca salvacionman apaj cosascunatami ruranajunguichi.
10 Taita Diosca siempre alita ruraj* Taita Diosmi can. Chaimandami quiquingunapa rurashcacunataca na cungan. Shinallata paipa shutita juyaimanda paipa separashcacunata* sirvishcata y cunangaman sirvishpa catinajushcatapash na cunganllu.
11 Imashinami callaripica, cada uno imatapash aliguta ruranajurcanguichi, shinallata rurashpa catichunmi munapanchi. Shinami quiquinguna shuyanajushca esperanzata japinataca, ultimocaman seguro caita ushapanguichi.
12 Ñucanchicunaca quiquinguna ociozocuna cachunga na munapanchichu. Chaipa randica feta y pacienciata charimanda, Taita Dios imata carasha nishpa prometishcata chasquishcacunapa ejemplota catichunmi munapanchi.
13 Bendiciashami nishpa Abrahanman prometishpaca, Taita Diosca paipa shutipillatami jurarca. Porque Taita Diosta yalica pipash na tianllu.
14 Taita Diosca Abrahandaca nircami: “Ciertopachami candaca bendiciasha. Canba huahuacunatapash ashtacatami mirachisha” nircami.
15 Abrahanga pacienciata ricuchishca jipami, Taita Dios imata prometishcataca chasquirca.
16 Ama imapash problema tiachunmi, gentecunaca paicunata yali importante gentecunamanda juran. Shinami paicuna imata ninajushca shimicuna cierto cashcata ricuchin.
17 Shinallatami Taita Diospash, pai imata prometishcata japigrinajujcunamanga, paipa voluntad na cambiashcata ashtahuan aliguta ricuchingapaca shuj juramentota rurarca.
18 Taita Dios imata carasha nishpa prometishcapash y pai imata juramentushcapash nunca na cambianllu. Taita Diosca nunca na llullanllu. Chaicunata yachanami ñucanchita ninanda animan. Chaimi Taita Diospi pacajushcacunaca, imata shuyanajushcataca imapipash charirinshna shuyashpa catita ushanchi.
19 Imashinami shuj ancla* gancho jirruca barcota shinllita charijun, shinallatami ñucanchi shuyanajushca esperanzapash ñucanchi causaitaca* shinllita charijun. Chai esperanzaca pactaringapachami. Y chai esperanzami ñucanchitaca cortinata* yalishpa ucuman yaicuchun ayudan.
20 Jesusmi chai ucumanga ñucanchicunamanda primero yaicurca. Shinami, paica ñucanchicunaman ñanda pascarca y ñandaca listomi saquirca. Jesusca Melquisedec shinami sacerdote tucurca. Y Jesusca para siempremi sacerdote principal* canga.
Notacuna
^ O “espiritualmente shinlli cana”.
^ Griego shimipica “juicio eternomandaca” nijunmi.
^ Glosariopi “cai tiempo” shimita ricupangui.
^ Glosariopi “jatun racu caspi” shimita ricupangui.
^ O “justo”.
^ Glosariopi “Taita Diospa separashcacuna” shimita ricupangui.
^ Caica llashaj gancho jirrumi can carca. Chai gancho jirrutami, barcota shayachingapaj o barco ama cuyurichunga mar yacu ucuman shitan carca.
^ Cortina nishpaca “tabernáculo nishca carpa huasipi tiaj Santo y Santísimo nishca ucucunata separajuj cortina telatami” shina nijun.
^ Glosariopi “sacerdote principal” shimita ricupangui.
