Hebreos 8:1-13
8 Ñucanchi tucui imata nijushcamanda ashtahuan importante yuyaica caimi can, chashna sacerdote principaltami* ñucanchica charipanchi. Paica jahua cielopi jatun Taita Dios tiajuj pushtu* ali ladopimi tiajun.
2 Shinallata, shuj limpio santo pushtupimi sirvijun y Jehová* Dios shayachishca ciertopacha tabernáculo carpa huasipipashmi paica sirvijun. Chai tabernáculo carpa huasitaca gentecunaca na rurashcachu.
3 Tucuilla sacerdote principalcunami ofrendacunata cuna carca y sacrificiocunatapash rurana carca. Chaimi Jesuspash shuj sacrificiota rurana carca.
4 Pai cai alpapi cashpaca, na sacerdote canmanllu. Porque Leypi nishcashna ofrendacunata cuj jaricunaca ñami tian.
5 Taita Diosta sirvingapaj cai jaricunapa rurashcacunaca jahua cielopi cosascunatami ricuchijun y jahua cielopi cosascunapa shuj sombrashnami can. Chaimi tabernáculo carpa huasita rurachun Moisesta mandajushpaca, Taita Diosca Moisestaca cashna nirca: “Can urcupi cajpi, ñuca ricuchishca carpa huasitashna tucuita rurangapami aligutapacha ricuna cangui” nircami.
6 Shinapash cunanga, punda sacerdotecunatapash ashtahuan yali ali obratami Jesusca chasquishca. Porque paica, punda tiashca tratomandapash* shuj ashtahuan ali trato tiachunbashmi ayudan. Chai tratoca Leypi nishcashna rurashcami can. Ashtahuangarin, imata punda prometishcacunahuan ricujpica, ashtahuan yali ali prometishca shimicunahuan rurashca caimandami, chai tratoca legal can.
7 Primer trato tucuipi ali cashca cajpica, shuj tratota ruranaca na minishtirinmanllu carca.
8 Llactapa pandarishcacunata ricushpami nin: “‘Jehová* Dios ñucaca ninimi, Israel llactahuan y Judá llactahuan mushuj tratota rurana punllacunaca chayamujunmi.
9 Paicunapa punda taitacunata maquimanda japishpa Egipto llactamanda llujchishca punllapi, paicunahuan rurashca tratoshnaca na cangachu. Paicunaca ñucahuan rurashca tratotaca ladomanmi saquirca. Chaimi paicunamanda preocuparinataca saquircani’ ninmi Jehová* Diosca.
10 ”‘Shinallata Jehová* Diosca ninmi, cai tratotami Israel llactahuanga chai punllacuna jipa rurasha. Ñucapa leycunatami paicunapa yuyaipi churasha y paicunapa shungupipashmi escribisha. Ñucami paicunapa Taita Dios casha y paicunami ñucapa llacta canga.
11 ”’Ni llactapuratapash ni huauquipuratapash “Jehová* Diostami rijsina canguichi” nishpaca nipi na yachachingachu. Porque uchillamanda callarishpa jatungamanmi tucuillacuna ñucataca rijsihuanga.
12 Ñucaca paicunapa nalita rurashcacunataca perdonashami. Paicunapa pecadocunataca cutinga na yarishachu’”* ninmi.
13 “Mushuj tratota” rurajpica, punda tratoca imapash mauca cosas cuendami quidan.* Porque imapash ña antiguo cashpa y mauca cashpaca, ñallapachami imapapash na sirvij quidanga.
Notacuna
^ Glosariopi “sacerdote principal” shimita ricupangui.
^ Griego shimipica “trono” nijunmi.
^ O “yuyarishachu”.
^ O “saquirin”.
