Juan 19:1-42
19 Pilatoca, Jesusta apashpa azialachunmi* soldadocunataca mandarca.
2 Soldadocunaca cashacunahuan coronata rurashpami Jesuspa umapi churachirca. Shinallata yanalla puca* telatapashmi churachirca.
3 Paicunaca Jesuspaman quimirishpa, burlarishpami ninajurca: “Ali punlla, judiocunapa rey” nishpa. Jesustaca ñavipipashmi huactanajurca.
4 Pilatoca cutin canllaman llujshishpami gentecunataca nirca: “Uyaichi, cai runaca na culpata charishcata cangunaman ricuchingapami, paitaca canllaman llujchimushcani”.
5 Chaimi Jesusca, casha coronatapash, yanalla puca telatapash churajushca canllaman llujshimurca. Shina llujshimujpimi Pilatoca nirca: “Cai runata ricuichi”.
6 Shinapash, importante sacerdotecunapash y guardiacunapash Jesusta ricushpaca cashna nishpami caparinajurca: “Paitaca, jatun racu caspipi* huarcushpa saquichi. Jatun racu caspipi huarcushpa saquichi” nishpa. Shina ninajujpimi Pilatoca paicunataca cashna nirca: “Paita apashpa, paitaca jatun racu caspipi huarcuilla. Porque ñucaca, cai runa imapash nalita rurashcataca na tarinichu”.
7 Chaimi judiocunaca nirca: “Ñucanchi leypica nijunmi, Taita Diosta na respetajcunaca huañuchi tucunami can nishpa. Jesusca Taita Diosta na respetashpami, Taita Diospa churimi cani nijun. Shinaca paica huañunami can”.
8 Judiocuna shina ninajujta uyashpami, Pilatoca ashtahuan manllanayachirca.
9 Chaimi Pilatoca, gobernadorpa huasiman cutin yaicushpa Jesustaca tapurca: “Canga ¿maimandata cangui?”. Shinapash Jesusca na imatapash nircachu.
10 Chaimi Pilatoca nirca: “¿Nachu imatapash nigrihuangui? Canda libre saquichun o canda huañuchichun mandai ushashcataca ¿nachu yachangui?”.
11 Pilato shina nijpimi Jesusca nirca: “Taita Dios saquijpillami quiquinga ñucata imatapash rurai ushangui. Chaimandami ñucata quiquinman entregashca runaca, quiquindapash yali pecadota charin” nirca.
12 Chaimi Pilatoca imashinapash Jesusta libre saquingapaj munashpa imata ruranata pensarijurca. Shinapash judiocunaca cashna nishpami caparinajurca: “Paita libre saquishpaca, Roma llactapa reypa* amigoca na canguichu. Porque reymi cani nijcunaca, Roma llactapa reypa contrami can”.
13 Shina ninajujta uyashpami Jesusta canllaman llujchishpa, Pilatoca juzgana asientopi tiarirca. Chai asientoca Empedrado nishca pushtupimi carca. Chai pushtutami hebreo shimipica Gábbatha nin carca.
14 Chai punllaca judiocunapa Pascua Fiestapa, Alistana* Punllami carca, ñami chaupi punlla tucujurca. Chai horasmi Pilatoca judiocunataca cashna nirca: “Ricuichi, cangunapa reyta”.
15 Shinapash judiocunaca cashna nishpami caparinajurca: “Paitaca huañuchishpa saquichi, huañuchishpa saquichi. Jatun racu caspipi* huarcuichi”. Chaimi Pilatoca paicunataca tapurca: “Shinaca ¿cangunapa reyta huañuchichunllu munanguichi?”. Shina nijpimi importante sacerdotecunaca nirca: “Roma llactapa reyllami ñucanchipa rey can” nishpa.
16 Chai jipami Jesustaca jatun racu caspipi* huarcushpa huañuchichun paicunaman curca.
Chaimi paicunaca Jesusta apashpa rirca.
17 Jesusca shuj jatun racu caspita* aparishpami, Calavera shuti pushtuman rirca. Chai pushtutami hebreo shimipica Gólgota nin.
18 Chaipimi Jesustaca shuj jatun racu caspipi* clavarca. Paipa ladopica ishcai runacunatapashmi clavarca. Shuj runataca ali ladoman y chaishuj runataca lluqui ladomanmi clavarca.
19 Shinallata, chai jatun racu caspipi* churangapami, Pilatoca shuj tablapi cashna escribichun mandarca: “Judiocunapa rey, Nazaret llactamanda Jesús” nishpa.
20 Jesusta jatun racu caspipi* clavashca pushtuca Jerusalén llacta ladollami carca. Shinallata hebreo shimipi, latín shimipi y griego shimipipashmi escribishca carca. Chaimi ashtaca judiocunaca chai tablapi imata escribishcataca liishcarca.
21 Pero judiocunapa importante sacerdotecunaca Pilatotaca nircami: “¿Imashpata ‘judiocunapa rey’ nishpa escribichircangui? Chaipa randica ‘ñucami judiocunapa rey cani’ nijushcatami escribichina carcangui” ninajurcami.
22 Chaimi Pilatoca nirca: “Ñuca imata escribichishcataca ñana cambiaita ushanichu” nishpa.
23 Jatun racu caspipi* Jesusta clavashca jipami, soldadocunaca Jesuspa jahualla churajunataca chuscupi liquishpa, shuj shuj partirinajurca. Soldadocunaca Jesuspa churajunatapashmi japirca. Shinapash chai churajunaca jahuamanda uracaman una sola rurashcami carca, na sirashcachu carca.
24 Chaimi soldadocunaca paicunapura ninajurca: “Caitaca ama liquishunchichu. Pi japinata ricungapaca, ñucanchipura suerteta rurashunchi” nishpa. Taita Dios escribichishca shimicuna pactarichunmi shina pasarca. Chaipica nijurcami: “Ñucapa churajushcacunatami paicunapura partirirca y ñucapa jahualla churajunata japingapami paicunapura suerteta rurarca” nishpa. Soldadocunaca chaitapachami rurarca.
25 Jesusta clavashca jatun racu caspi* ladopica, Jesuspa mamapash y Jesuspa mamapa ñañapashmi chaipi carca. Clopas shuti runagupa huarmi Mariapashmi chaipi carca. Shinallata María Magdalenapashmi chaipi carca.
26 Jesusca paipa mamata y paipa juyashca discipulotapash chai ladollapi shayanajujta ricushpami, paipa mamataca nirca: “Cunanmanda vichaimanga paimi quiquinba churi can”.
27 Chai jipaca paipa discipulotapashmi nirca: “Cunanmanda vichaimanga paimi canba mama can”. Chai punllamandapachami chai discipuloca, paipa huasipi causachun Mariataca pusharca.
28 Chai jipami Jesusca paipa Taita tucui imata mandashcata pactachishpa nirca: “Yacunayajunmi” nishpa. Shinami Taita Dios escribichishca shimicunaca pactarirca.
29 Chaipica agrio agrio vino junda jarrami tiajurca. Chaimi chaipi shayanajuj huaquin gentecunaca shuj esponjata chai vinopi satishpa shuj caspipi* churashpa, Jesuspa shimiman quimichirca.
30 Vinota malishca jipami Jesusca nirca: “Quiquinba munaitaca ñami pactachipashcani”. Shina nishca jipaca, umata huarcushpa huañurcallami.*
31 Chai punllaca sabadopa Alistana* Punlla nishca punllami carca. Chaimi jatun racu caspipi* huañushcacuna sábado punllata huarcushca quidachunga, judiocunaca na munarca. (Chai sábado punllaca jatun sabadomi* carca). Chaimi Pilatotaca, huañushcacunapa chaquita faquishpa, jatun racu caspimanda uriajuchipai nishpa mañarca.
32 Shina nijpimi soldadocunaca rirca y Jesuspa ladopi huarcurianajuj runacunapa chaquita faquirca.
33 Shinapash Jesuspaman chayashpaca, Jesustaca ña huañushca cashcatami ricurca. Chaimi Jesuspa chaquitaca na faquirca.
34 Pero shuj soldadoca shuj lanzatami Jesuspa costillaspi clavarca. Chai ratomi yahuarpash y yacupash llujshirca.
35 Chaitaca Jesuspa juyashca discípulo ricushpami villarca. Paica, paipa villashcacuna cierto cajtaca alimi yachan. Cangunapash crichunmi paica cabalta villarca.
36 Ashtahuanbash, “ni shuj tullutapash na faquingachu” nishpa Taita Dios escribichishca shimicuna pactarichunmi shina pasarca.
37 Shinallata, “paitaca shuj lanzahuan clavashcatami ricunga” nishca shimicuna pactarichunmi shina pasarca.
38 Chai jipami, Arimatea llactamanda José shuti runaguca, Jesuspa cuerpota apai ushanichu nishpa Pilatotaca tapurca. Pilato, ari apailla nijpimi Joseca rishpa Jesuspa cuerpotaca aparca. Joseca judiocunata manllaimandami, pai Jesuspa discípulo cashcataca shujcunamanga na villarca.
39 Chaimanga Nicodemo shuti runagupashmi chayamurca. Paica mirra* nishcatapash y shuj mishquilla ashnajuj jihuagucunatapash chapushcatami, cazi 100 librata apashpa chayamurca. Nicodemomi shuj tutaca Jesusta ricungapaj rishcarca.
40 Paicunaca Jesuspa cuerpota apashpami, lino telagupi mishquilla ashnajuj jihuacunata churashpa, chai telaguhuan Jesustaca pilluchirca. Judiocunaca huañushcacunata chashna pambana costumbretami charirca.
41 Jesusta jatun racu caspipi* huarcushpa huañuchishca pushtupica, shuj huertami tiarca. Chai huertapica, cuevashnalla shuj mushuj bovedami tiarca. Chaipica ni maijan huañushcata nara churashcarcachu.
42 Judiocunapaca sabadopa Alistana* Punlla nishca punllami carca. Bovedapash ladollami carca. Chaimi Jesuspa cuerpotaca chaipi churarca.
Notacuna
^ Griego shimipica “púrpura” nijunmi. Chai colorca charij cashcata, respetashca cashcata, reypa familia cashcata ricuchingapami carca.
^ Glosariopi “jatun racu caspi” shimita ricupangui.
^ Sabadopa punda punllatami “Alistana Punlla” nishpa rijsin carca. Chai punllapimi judiocunaca sabadopa tucuita alistashpa saquin carca. Glosariopi “Alistana Punlla” shimita ricupangui.
^ Glosariopi “jatun racu caspi” shimita ricupangui.
^ Glosariopi “jatun racu caspi” shimita ricupangui.
^ Glosariopi “jatun racu caspi” shimita ricupangui.
^ Glosariopi “jatun racu caspi” shimita ricupangui.
^ Glosariopi “jatun racu caspi” shimita ricupangui.
^ Glosariopi “huañuchingapaj jatun racu caspi” shimita ricupangui.
^ Glosariopi “huañuchingapaj jatun racu caspi” shimita ricupangui.
^ Glosariopi “huañuchingapaj jatun racu caspi” shimita ricupangui.
^ Griego shimipica “hisopo” nijunmi. Chaica, Palestina llactapi tiaj plantamandami parlajunga. Chaica cazi ishcai metro altotami viñan. Glosariopi “hisopo” shimita ricupangui.
^ Sabadopa punda punllatami “Alistana Punlla” nishpa rijsin carca. Chai punllapimi judiocunaca sabadopa tucuita alistashpa saquin carca. Glosariopi “Alistana Punlla” shimita ricupangui.
^ Glosariopi “huañuchingapaj jatun racu caspi” shimita ricupangui.
^ Levadura Illa Tandata Rurana Fiestapa callari punllataca siempremi sábado punlla o samana punlla nin carca. Chai punlla, sábado o samana punllapipacha urmajpica, jatun sábado ninmi carca.
^ Glosariopi “jatun racu caspi” shimita ricupangui.
^ Sabadopa punda punllatami “Alistana Punlla” nishpa rijsin carca. Chai punllapimi judiocunaca sabadopa tucuita alistashpa saquin carca. Glosariopi “Alistana Punlla” shimita ricupangui.
