Juan 2:1-25
2 Natanaelhuan Jesús parlashcamanda quimsa punllahuanmi, Galilea llactapi Caná shuti pueblopica shuj cazamiento fiesta tiarca. Jesuspa mamaca chai fiestapimi carca.
2 Chai cazamiento fiestamanga Jesustapash y paipa discipulocunatapashmi invitashcarca.
3 Jesuspa mamaca vino ña tucurijujpimi paitaca nirca: “Vinoca ñamari tucurigrijun”.
4 Pero Jesusca nircami: “Ñucanchica ima ricunatapash na charipanchichu. Ñuca imagutapash rurana tiempoca* nara chayamushcachu” nishpa.
5 Jesuspa mamaca vinota purichinajuj runacunataca nircami: “Tucui pai ima nishcata ruranguichilla” nishpa.
6 Chaipica yacuta churangapaj 6 rumi jatun jarracunami tiarca. Chai jatun jarracunaca judiocunapa leycunapi nishcashna, nara micushpallata paicunapa maquita maillarichunmi churashca carca. Cada jarrami más o menos 44 a 66 litrocunata* apan carca.
7 Jesusca paicunataca nircami: “Chai jarracunapi yacuta jundachipaichi”. Shina nijpimi yacutaca junda jundata jundachirca.
8 Chai jipami vinota purichinajuj runagucunataca nirca: “Cunanga ashaguta japishpa, cazamiento fiestapa encargado runaguman apapaichi”. Shina nijpimi paicunaca chai runagupaman aparca.
9 Chaimi cazamiento fiestapa encargado ricujuj runaguca vinoman tigrachishca yacuta ashaguta ufiarca. Shinapash paica chai vino maimanda llujshishcataca na yacharcachu. Pero yacuta vishishpa churajcunaca alimi yacharca. Cazamiento fiestapa encargado runaguca noviota cayashpami nirca:
10 “Tucuicunami cazarashpaca, ali vinotara primeroca carai callarin. Pero gentecuna ña machashca cajpica yangalla vinotami caranata yachan. Shinapash quiquinga ultimoman carangapami ali vinotaca alichishpa o huacaichishpa charijushcangui” nirca.
11 Chaimi Jesuspa primer milagro carca. Chai milagrotaca Galilea llactapa Caná shuti pueblopimi rurarca. Shinami paica poderta charishcata ricuchirca. Chaimi paipa discipulocunapash paipi crirca.
12 Chai jipaca paipa mamandi, paipa huauquicunandi, paipa discipulocunandimi Jesusca Capernaúm llactaman urai rirca. Shinapash paicunaca na tauca punllacunata chaipi quidarcachu.*
13 Judiocunapa Pascua* Fiestata rurangapaj ashalla punllacuna faltajpimi, Jesusca Jerusalén llactaman vichai rirca.
14 Taita Diospa templo huasiman* Jesús yaicujuj horasmi gentecunaca huagracunata, llamacunata y palomacunata jatunajurca. Culquita cambiaj gentecunapashmi tianajurca.
15 Jesusca azialta rurashca jipami llamacunata, huagracunata y animalcunata jatudorcunatapash Taita Diospa templo huasimanda llujchishpa cacharca. Culquita cambiashpa tiajujcunapa monedacunatapash alpaman shitashpami, paicunapa mezacunatapash vultiachishpa saquirca.
16 Palomacunata jatudorcunatapash nircami: “Tucui caicunata caimanda anchuchishpa saquichi. Ñuca Taitapa huasica, canguna negociocunata rurana huasica na canllu” nishpa.
17 Chaita ricushpami Jesuspa discipulocunaca Taita Dios escribichishca cai shimicunata yarirca:* “Quiquinba huasitaca tucui shunguhuanmi juyani. Chai juyaimi ñuca shungu ucupica ninashna rupajunga” nishcata.
18 Chaita ricushpami judiocunaca Jesustaca tapunajurca: “¿Ima milagrota rurashpata cai cosascunata rurangapaj derechota charishcataca ricuchigringui?”.
19 Shina nijpimi Jesusca nirca: “Taita Diospa cai templo huasita urmachishpa saquichilla. Ñucaca quimsa punllacunahuanga shayachishallami”.
20 Chaimi judiocunaca nirca: “¿46 huatacunapi huasichishca cai templo huasitachu quimsa punllapillami shayachisha nijungui?” nishpa.
21 Shinapash templo nishpaca paipa cuerpomandami Jesusca parlajurca.
22 Huañushcacunapuramanda Jesús causachi tucujpimi* paipa discipulocunaca Jesús chashna nishcata yarirca. Shinallata Taita Dios escribichishca shimipi imata nijujtapash y Jesús imata nishcatapashmi paicunaca crirca.
23 Pascua Fiestapa Jerusalenbi cashpa milagrocunata Jesús rurajta ricushpami, tauca gentecunaca paipi crinajurca.
24 Shinapash gentecuna imashina cajta rijsimandami Jesusca paicunapica na confiarca.
25 Jesusca gentecunapa shungutaca ali alimi rijsirca. Chaimandami, gentecuna imata pensanajujta pipash intindichichunga na minishtirca.
Notacuna
^ Griego shimipica “horasca” nijunmi.
^ Chaica más o menos 12 a 17 galongunami can.
^ O “saquirircachu”.
^ Glosariopi “Pascua Fiesta” shimita ricupangui.
^ Glosariopi “Taita Diospa templo huasi” shimita ricupangui.
^ O “yuyarirca”.
^ Griego shimipica “jatarichi tucujpimi” nijunmi.
