Juan 21:1-25
21 Chai jipaca cutinmi Jesusca paipa discipulocunaman mar de Tiberíades* ladopi ricurirca. Chaipica cashnami pasarca:
2 Chaipica Simón Pedro, Tomás, Natanael, Zebedeopa churicuna y shuj ishcai discipulocunapashmi carca. Tomastami Gemelo nishpa rijsin carca. Natanaelca Galilea llactapi Caná pueblomandami carca.
3 Chaipimi Simón Pedroca paicunataca nirca: “Pescadocunata japingapami rijuni”. Chaimi paicunaca nirca: “Ñucanchipash canhuan rishunllami”. Shina nishpami paicunaca canoaman vitsashpa* rirca. Pero chai tutaca shuj pescadotallapash na japircachu.
4 Ña punllayajujtaca Jesusca mar yacu manñapimi carca. Pero paipa discipulocunaca, Jesús cajtaca na cuenta japircachu.
5 Chaipimi Jesusca paicunataca nirca: “Ñuca huahuacunalla, micungapaca ¿imagutapash charinguichichu?”. Chaimi paicunaca nirca: “Na imagutapash charipanchichu”.
6 Chaimi Jesusca paicunataca nirca: “Redtaca canoa ali ladoman shitaichi. Chaiman shitashpaca, huaquin pescadogucunatallapash japinguichimi”. Shina nijpi redta shitajpica, ashtaca ashtaca pescadocunami redpica jundarca. Redtaca llujchitapash na ushanajurcachu.
7 Chaipimi Jesuspa juyashca discipuloca Pedrotaca nirca: “Señor Jesusmari” nishpa. Señor Jesús cajta uyashpami Simón Pedroca, ropata* cutin churajushpa yacuman shitarirca.
8 Pero chaishuj discipulocunaca, red junda pescadocunata canoapi aisashpami mar manñaman llujchirca. Paicunaca yacu manña ladolla caimandami shina rurarca. Cazi 90 metro* carupillami carca.
9 Ña manñaman chayashpaca, nina rupajujtami paicunaca ricurca. Nina jahuapica pescado cusarijujta y tanda tiajujtapashmi ricurca.
10 Jesusca paicunataca nircami: “Chairalla japishca pescadocunamanda huaquingunata apamupaichi”.
11 Chaimi Simón Pedroca canoaman vitsashpa, jatun pescadocunahuan junda redta chaquishca alpaman llujchimurca. 153 pescadocuna tiajpipash, redca na liquirircachu.
12 Jesusca paicunataca nircami: “Micungapaj shamupaichi”. Pero “¿pita cangui?” nishpa tapungapaca ni maijan discipulopash na atrivircachu. Porque paicunaca, Señor Jesús cajtaca yacharcami.
13 Jesusca tandata japishpami paicunaman cararca. Pescadotapashmi paicunamanga cararca.
14 Huañushca gentepuramanda causarishca jipaca, caihuanga ña quimsa viajetami, Jesusca paipa discipulocunamanga ricurishcarca.
15 Ña desayunashca jipaca, Jesusca Simón Pedrotaca tapurcami: “Juanba churi Simón ¿caicunatapash yalichu ñucataca juyahuangui?”. Chaimi Simón Pedroca nirca: “Ari, Señor Jesuslla, quiquinda juyajtaca yachapanguimi”. Shina nijpimi Jesusca nirca: “Ñuca llamagucunaman micunaguta carapangui”.
16 Jesusca cutinmi Simón Pedrotaca tapurca: “Juanba churi Simón ¿ñucata juyahuanguichu?”. Chaimi paica nirca: “Ari ñuca Señor Jesuslla, quiquinda juyajtaca yachapanguimi”. Shina nijpimi Jesusca nirca: “Ñuca llamagucunata michipangui”.
17 Jesusca ña quimsa viajetami Simón Pedrotaca cashna tapurca: “Juanba churi Simón ¿ñucata juyahuanguichu?”. Ña quimsa viajeta “ñucata juyahuanguichu” nishpa tapujpimi, Simón Pedroca llaquirishpa Jesustaca nirca: “Señor Jesuslla, quiquinga tucuitami yachapangui. Ñuca quiquinda juyajtaca yachapanguimi”. Shina nijpimi Jesusca nirca: “Ñuca llamagucunaman micunaguta carapangui.
18 Ciertopachami nini, ashtahuan joven cashpaca quiquinllatami mudarin carcangui. Quiquin maita munashcatapashmi purin carcangui. Pero rucuyashpaca, ishcandi maquitami chutangui. Shujmi quiquindaca mudachinga. Na ringapaj munashca pushtucunamanmi quiquindaca pushanga”.
19 Shina nishpaca, Pedro imashina huañunata y Taita Diosta alipi saquinatami Jesusca villajurca. Chai jipami Jesusca Pedrotaca nirca: “Ñucata catijuhuailla”.
20 Pedroca tigrarishpami, paicunapa huashataca Jesuspa juyashca discípulo shamujujta ricurca. Chai discipulomi micunajushpaca, Jesuspa ladoman* quimirishpa Jesustaca “Señor Jesuslla ¿pita quiquindaca traicionagrijun?” nishpa tapushcarca.
21 Chaimi chai discipulota ricushpaca Pedroca cashna nishpa Jesustaca tapurca: “Señor Jesuslla paica ¿imashi tucunga?”.
22 Shina nijpimi Jesusca nirca: “Ñuca munajpica ñuca shamungacaman paica caipi cangallami. ¿Imapata canga chaitaca yachangapaj munangui? Canga ñucata catijuhuailla” nirca.
23 Chaimandami Jesuspa discipulocunaca, chai discipuloca na huañungachu nishpa parlarinajurca. Pero Jesusca chai discípulo na huañuna cashcataca na nijurcachu. Sino “ñuca munajpica ñuca shamungacaman paica caipi cangallami. ¿Imapata canga chaitaca yachangapaj munangui?” nijushcarcami.
24 Cai discipulomi caicunataca villajun y paillatami caicunataca escribishca. Pai villashca shimicuna cabal cashcataca alimi yachapanchi.
25 Ashtahuangarin, Jesusca ashtaca shuj cosascunatapashmi rurarca. Chai cosascunata tucui tucuita rollocunapi escribishpa churajpica, chai rollocunata cai mundopi maipi churaitapash na usharinmanllu yanimi.
Notacuna
^ O “mar de Galilea”.
^ O “sicashpa”.
^ O “llachapata”.
^ Griego shimipica “pecho ladoman” nijunmi.
