Jueces 1:1-36
1 Josué huañushca jipami israelitacunaca* Jehová Diostaca “¿ñucanchipuramandaca picunata primero cananeo gentecunahuan macanajungapaj vichai ringa?” nishpami tapunajurca.
2 Shina tapujpimi Jehová Diosca cashna nirca: “Judapa jatun familiami vichai ringa. Ricuichi, paicunapa maquipimi chai alpacunataca cusha”* nircami.
3 Chaimi Judapa jatun familiaca paicunapa huauqui Simeonba jatun familiataca cashna nirca: “Ñucanchiman por sorteo cushca alpacunaman ñucanchihuan vichai rishpa cananeo gentecunahuan macanajushunchi. Chai jipaca can japina alpacunamanmi rishun” ninajurcami. Chaimi Simeonba jatun familiaca, Judapa jatun familiataca cumbashpa rirca.
4 Judapa jatun familia vichai rijpimi Jehová Diosca cananeo gentecunata y perizita gentecunataca paicunapa maquipi entregarca. Chaimi paicunaca Bézec pushtupi 10 mil jaricunata misharca.
5 Paicunaca cananeo gentecunata y perizita gentecunatapash mishanajujpimi, Bézec pushtupica Adoni-Bézec shuti runatapash tarirca. Chaimi paihuanbash macanajurca.
6 Adoni-Bézec shuti runa escaparijujpimi paita catiriashpa japirca. Chai jipami paipa maquimanda y chaquimanda mama dedota cuchushpa saquirca.
7 Chaimi Adoni-Bézec shuti runaca cashna nirca: “Ñucaca 70 reycunapa maquimanda y chaquimandapashmi mama dedotaca cuchurcani. Paicunami ñuca mesamanda urmashca micunataca micun carca. Cunanmi Taita Diosca paicunata rurashcashnallata rurahuashca” nircami. Chai jipaca Adoni-Bézec runataca Jerusalén llactamanmi aparca. Chaipimi paica huañurca.
8 Shinallata Judá jatun familiapa churicunaca Jerusalén llactahuan macanajushpami misharca. Paicunaca chai llactata espadahuan atacashpami rupachishpa saquirca.
9 Chai jipami Judá jatun familiapa churicunaca urcucunapi causanajuj cananeo gentecunahuan macanajungapaj urai rirca. Chaica Négueb y Sefelá pushtucunapimi carca.
10 Judá jatun familiapa churicunaca Hebrón llactapi causanajuj cananeo gentecunahuanmi macanajungapaj rirca. Chaipimi Sesái, Ahimán, Talmái* nishcacunatapash misharca. (Pundaca Hebrón llactataca, Quiryat-Arbá nishpami rijsin carca).
11 Chaimandaca Debir llactamanda gentecunahuanmi macanajungapaj rirca. (Pundaca Debir llactataca, Quiryat-Séfer nishpami rijsin carca).
12 Chaimi Calebca cashna nirca: “Quiryat-Séfer llactata atacashpa mishaj runamanmi, Acsá shuti ñuca ushitaca paipa huarmi tucuchun cusha” nircami.
13 Quenaz runapa churi Otniel shuti runami llactataca misharca. Quenaz runaca Calebpa menor huauquimi carca. Calebca, Otniel runamanmi paipa ushi Acsataca paipa huarmi tucuchun curca.
14 Acsá shuti huarmica ña huasiman rinajushpami Otnieltaca, ñuca taitataca alpata mañapai nishpa rogarca. Chai huarmigu burromanda uriajujpimi* Calebca “¿imatata munangui?” nishpa tapurca.
15 Shina nijpimi paica cashna nirca: “Por favor, can ñucata bendiciajushcata ricuchingapaj ñucaman shuj regalota carahuai. Ñami sur ladopica* shuj alpaguta carahuarcangui. Pero Gulot-Maim* llactatapash carahuai” nishpami mañarca. Chaimi Calebca Gulot Alto y Gulot Bajo pushtucunatapash cararca.
16 Moisespa suedropa huahuacunaca* quenita runacunami carca. Paicunaca Judapa jatun familiahuanmi palmeracuna tiaj llactamanda* vichai rirca. Paicunaca Arad shuti pushtupi sur ladoman Judapa jatun familiapa desiertomanmi* rirca. Chaiman rishpami quenita gentecunaca chaipi causanajuj gentecunahuan causangapaj quidarca.
17 Pero Judapa jatun familiaca paicunapa huauqui Simeonba jatun familiahuan rishpami Zefat llactapi causaj cananeo gentecunahuan macanajungapaj rirca. Y chai llactataca tucuchitapacha tucuchishpami saquirca. Chaimandami chai llactataca Hormá* nishpa shutichirca.
18 Chai jipaca Judapa jatun familiaca Gaza, Asquelón, Ecrón shuti llactacunata y chai llactacunapa alpacunatapashmi misharca.
19 Jehová Dios Judapa jatun familiata ayudajpimi paicunaca urcucunataca misharca. Shinapash ura pambacunapi causaj gentecunaca guerrapa fierro carretacunatami* charirca. Chaimandami Judapa jatun familiaca paicunata chai pambacunamanda llujchitaca na usharca.
20 Moisés prometishcashnami Caleb runamanga Hebrón llactata curca. Chaimi Calebca Anac shuti runapa quimsa churicunata chai llactamanda llujchishpa cacharca.
21 Pero Benjaminba jatun familiaca Jerusalén llactapi causaj jebuseo gentecunataca na chaimanda llujchishpaca cacharcachu. Chaimandami jebuseo gentecunaca cunangaman benjaminita gentecunahuan Jerusalenbi causashpa catijun.
22 Cutin Josepa familiacunaca Betel llactahuan macanajungapami vichai rirca. Jehová Diosmi paicunataca ayudajurca.
23 Josepa familiacunaca Betel llactata pacalla chapachunmi huaquin jaricunata cacharca. (Pundaca Betel llactataca Luz nishpami rijsin carca).
24 Chai jaricunaca chai llactamanda shuj runa llujshijujta ricushpami, chai runataca cashna nirca: “Chai llactaman maijan ladota yaicunata ricuchihuai. Shina rurajpica candaca na llaquichishunllu”* nircami.
25 Chaimi chai runaca chai llactaman maijan ladota yaicunata ricuchirca. Chaimi paicunaca espadahuan chai llactataca atacarca. Pero chai runata y paipa tucuilla familiataca escaparichunmi saquirca.
26 Chai runaca hitita gentecunapa alpacunaman rishpami chaipi shuj llactata shayachirca. Chai llactataca Luz nishpami shutichirca. Y cunangamanmi chai shutitallata charin.
27 Manasespa jatun familiaca Bet-Seán, Taanac, Dor, Ibleam y Meguidó llactacunata y chai llactacunapa ladolla pueblocunatapash na dueñoyai usharcachu. Cananeo gentecunaca chai llactacunamanda llujshingapaca nimamanda na munarcachu.
28 Israelitacuna shinlli tucushpami cananeo gentecunataca shinllita trabajachishpa charirca. Pero paicunaca na tucui cananeo gentecunatachu llujchishpa cacharca.
29 Efrainba jatun familiapashmi Guézer llactapi causaj cananeo gentecunataca na llujchishpa cacharca. Chaimandami cananeo gentecunaca paicunapurapi Guézer llactapi causashpa catirca.
30 Zabulonba jatun familiaca, Quitrón y Nahalol llactacunapi causaj gentecunataca na llujchishpa cacharcachu. Chaimi cananeo gentecunaca paicunapurapi causashpa catirca. Shinallata cananeo gentecunataca shinllita trabajachishpami charirca.
31 Aserpa jatun familiaca Akkó, Sidón, Ahlab, Aczib, Helbá, Afic y Rehob llactacunapi causaj gentecunataca na llujchishpa cacharcachu.
32 Chai alpacunapi causanajuj cananeo gentecunata na llujchishpa cachaimandami aserita gentecunaca paicunapurapi causanajurca.
33 Neftalipa jatun familiaca Bet-Semes y Bet-Anat llactacunapi causanajuj gentecunataca na llujchishpa cacharcachu. Paicunaca chai alpacunapi causanajuj cananeo gentecunapurapimi causanajurca. Shinallata Bet-Semes y Bet-Anat llactacunamanda gentecunataca shinllita trabajachishpami charirca.
34 Amorreo gentecunaca, Dan jatun familiataca ura pambacunaman uriajuchunga na saquircachu. Paicunataca urcucunapi causachunmi amorreo gentecunaca obligarca.
35 Amorreo gentecunaca Heres lomamandapash, Ayalón y Saalbim llactacunamandapash llujshingapaca nimamanda na munarcachu. Pero Josepa familiacunaca ashtahuan shinlli tucushpami amorreo gentecunataca shinllita trabajachishpa charirca.
36 Amorreo gentecunapa alpa fronteraca Acrabim subidamanda y Sela llactamandami vichai rijurca.
Notacuna
^ Hebreo shimipica “Israelpa huahuacunaca” nijunmi.
^ O “cushcani”.
^ Sesái, Ahimán y Talmái nishpaca talvez paicunapa familiacunamandami parlajun.
^ O talvez “burro jahuapi maquita huactajpimi”.
^ O “Négueb pushtupica”.
^ Cai shutica “yacu pujyucuna” nijunmi.
^ O “descendencia”.
^ Caipica Jericó llactamandami parlajun.
^ Caipica huaquin gentecunalla causaj, ima horapash na tarpushca chaquishca pambacunatami shina nijun.
^ Cai shutica “tucuchi tucungapaj entregashca” nijunmi.
^ O “guerrapa fierro hocescunata charij llantacunahuan carretacunatami”.
^ Hebreo shimipica “amor lealtami ricuchishun” nijunmi.
