Jueces 10:1-18
10 Abimélec runapa jipaca Tolá shuti runami israelitacunata mandai callarirca. Tolá runaca Pua runapa churi, Dodó shuti runapa nietomi carca. Paica Isacar jatun familiamandami carca. Tolá runaca Efraín jatun familiapa urcucunapi, Samir shuti pushtupimi causan carca.
2 Tolá runaca 23 huatacunatami Israel llactapica juez* carca. Jipaman huañujpimi paitaca Samir shuti pushtupi pambarca.
3 Tolá runapa jipaca Jaír shuti galaadita runami Israel llactapica 22 huatacunata juez carca.
4 Jairca 30 churicunatami charirca. Paicunaca 30 burrocunata, shinallata 30 llactacunatami charirca. Chai llactacunataca cunangamanmi Havot-Jaír nishpa rijsin. Chaica Galaad alpacunapimi can.
5 Jipamanga Jaír runa huañujpimi paitaca Camón pushtupi pambarca.
6 Israelitacunaca cutinmi Jehová Diospa ricuipi nali cosascunata rurai callarirca. Israelitacunaca Baal yanga dioscunata, Astoret shuti yanga dioscunata, Aram,* Sidón, Moab llactacunapa yanga dioscunatami sirvi callarirca. Shinallata ammonita gentecunapa, filisteocunapa yanga dioscunatapashmi sirvi callarirca. Israelitacunaca Jehová Diosmanda caruyashpami paita sirvinataca saquirca.
7 Chaimandami Jehová Diosca israelitacunahuan culirashpa filisteocunapa y ammonita gentecunapa maquipi saquirca.*
8 Chai huatapica paicunaca israelitacunataca ninanda llaquichishpami charirca. Río Jordán lado alpacunapi causaj israelitacunataca 18 huatacunatami ninandapacha llaquichishpa charinajurca. Pundaca chai alpacunaca amorreo gentecunapami carca. Chai alpacunaca Galaadpimi carca.
9 Ashtahuanbash ammonita gentecunaca Judapa, Benjaminba y Efrainba jatun familiahuan macanajungapami Río Jordanda yalin carca. Chaimandami israelitacunaca llaquipipacha causanajurca.
10 Chaimandami israelitacunaca Jehová Diosta ayudahuai nishpa cashna roganajurca: “Taita Dioslla canda saquishpa, Baal yanga dioscunata sirvishpami canba ñaupapica pecadota rurapashcanchi” ninajurcami.
11 Shina nijpimi Jehová Diosca israelitacunataca cashna nirca: “Ñucami cangunataca Egipto llactamanda, amorreo gentecunamanda, ammonita gentecunamanda, filisteocunamanda,
12 sidonio gentecunamanda, amalequita gentecunamanda y madianita gentecunamandaca cangunata ninandapacha llaquichinajujpi salvarcani. Canguna ayudahuai nishpa caparinajujpica ñucami cangunataca paicunapa maquimandaca salvarcani.
13 Pero cangunaca ñucata saquishpami shuj yanga dioscunata sirvi callarircanguichi. Chaimandami cangunataca ñana cutinga salvashachu.
14 Cunanga llaqui tiempocunamanda cangunata salvachunga, canguna agllashca dioscunata ayudahuai nichiyari” nircami.
15 Chaimi israelitacunaca Jehová Diostaca cashna nirca: “Pecadotamari rurashcanchi. Can munashcata ñucanchihuan rurapailla. Shinapash cai viajeca ñucanchita salvahuai por favor” ninajurcami.
16 Shinami israelitacunaca shuj llactacunamanda dioscunata saquishpa Jehová Diosta cutin sirvi callarirca. Taita Diosca israelitacuna sufrinajujta ricushpami ninanda llaquirirca.
17 Tiempo jipaca ammonita gentecunaca guerraman tandanajushpami Galaad alpacunapi paicunapa carpacunataca shayachirca. Cutin israelitacunaca tandanajushpami Mizpá shuti llactapi carpacunataca shayachirca.
18 Galaad alpacunamanda gentecuna y mandajcunapash cashna nishpami parlarinajurca: “¿Pita ñucanchitaca ammonita gentecunahuan macanajuipica diriginga? Macanajuipi dirigij personami Galaadpi causaj gentecunapa jefe tucunga” ninajurcami.
