Jueces 12:1-15
12 Efraín jatun familiamanda soldadocuna tandanajushpami Zafón llactaman chimbarca.* Chaimi Jefté runataca cashna nishpa reclamarca: “Ammonita gentecunahuan macanajungapaj caita yalijushpaca ¿imashpata na ñucanchimanga villarcangui? Canhuan rinchimanmi carca. Candaca huasindimi rupachigrinchi” ninajurcami.
2 Shina nijpimi Jefté runaca cashna nirca: “Ñucapa soldadocunapash y ñucapashmi ammonita gentecunahuanga shuj jatun guerrapi carcanchi. Cangunataca ayudahuaichi nishpami mañarcani, pero cangunaca ammonita gentecunapa maquimanda salvangapaca na shamurcanguichichu.
3 Canguna ñucata salvangapaj na shamujta ricushpami, ñuca causaita peligropi* churashpa ammonita gentecunahuan macanajungapaj llujshircani. Jehová Diosmi ammonita gentecunataca ñuca maquipi entregarca. Shinaca ¿ima nishpata cunanga ñucahuan macanajungapaj shamunajunguichi?” nircami.
4 Chai jipaca Jefté runaca Galaad alpacunamanda tucuilla soldadocunata tandachishpami Efrainba jatun familiahuan macanajungapaj rirca. Galaad alpacunamanda soldadocunaca Efrainba jatun familiatami misharca. Efrainba jatun familiaca cashnami ninajushcarca: “Efrainba y Manasespa alpacunapi causaj galaadita gentecunaca Efrainba jatun familiamanda pacajushpa rishca gentecunami canguichi” ninajushcarcami.
5 Galaad alpacunamanda soldadocunaca Efrainba jatun familiamanda soldadocuna nara Río Jordanman chayajpillatami yalina ñangunapi shayarirca. Efrainba jatun familiamanda soldadocuna escaparingapaj munajushpaca “Yalichun saquihuai” ninmi carca. Chaimi Galaadmanda soldadocunaca cada unota “¿Canga efraimita runachu cangui?” nishpa tapunajurca. Paicuna “Na” nijpica,
6 cashnami nin carca “Shinaca shibolet ni”. Pero chai palabrata imashina pronuncianata na yachaimandami “Sibolet” ninajurca. Chaimi paicunata japishpa Río Jordanda yalina ñangunapi huañuchishpa saquinajurca. Chai viajeca 42 mil efraimita gentecunami huañurca.
7 Jefté shuti galaadita runaca 6 huatacunatami israelitacunapa juez* carca. Pai huañujpica pai causashca llactapillatami pambai tucurca. Chaica Galaad alpacunapimi carca.
8 Jefté runapa jipaca Belén llactamanda Ibzán shuti runami israelitacunapa juez tucurca.
9 Paica 30 churicunata y 30 ushicunatami charirca. Paipa ushicunataca shuj familiamanda jaricunahuan cazarachunmi cacharca. Shinallata paipa churicunahuan cazarachingapaca 30 huarmicunatami apamurca. Ibzán runaca 7 huatacunatami israelitacunapa juez carca.
10 Chai jipaca Ibzán runa huañujpimi Belén llactapi pambai tucurca.
11 Ibzán runapa jipaca zabulonita Elón shuti runami israelitacunapa juez tucurca. Elón shuti runaca 10 huatacunatami israelitacunapa juez carca.
12 Chai jipami zabulonita Elón shuti runaca huañurca. Paitaca Zabulón jatun familiapa alpacunapi Ayalón llactapimi pambarca.
13 Elón shuti runapa jipaca, Hilel shuti runapa churi Abdón runami israelitacunapa juez tucurca. Paica Piratón shuti pushtumandami carca.
14 Paica 40 churicunata y 30 nietocunatami charirca. Paicunaca 70 burrocunapimi purin carca. Abdón shuti runaca 8 huatacunatami israelitacunapa juez carca.
15 Piratón shuti pushtumanda Hilel runapa churi Abdón huañujpimi paitaca Piratón shuti pushtupi pambarca. Chai pushtuca Efrainba jatun familiapa pambacunapi, amalequita gentecunapa urcucunapimi carca.
Notacuna
^ O talvez “norte ladoman chimbarca”.
