Jueces 13:1-25
13 Israelitacunaca cutinmi Jehová Diospa ricuipi nali cosascunata rurai callarirca. Chaimandami Jehová Diosca paicunataca 40 huatacunata filisteocunapa maquipi saquirca.
2 Chai tiempopica Zorá shuti llactamanda Manóah shuti runami causarca. Paica danita gentecunapa familiapurami carca. Paipa huarmica huahuacunata na chari ushaimandami huahuacunataca na charirca.
3 Shuj punllami Jehová Diospa angelca chai huarmiguman ricurishpa cashna nirca: “Canga huahuacunata na chari ushaimandami huahuacunataca na charishcangui. Shinapash vijsayu tucushpami shuj churiguta charigringui.
4 Vinotapash, shuj tragocunatapash ama ufianguichu. Shinallata Taita Diospa ricuipi mapa* ricurij micunacunataca ama micunguichu.
5 Ricui, vijsayu tucushpami shuj churiguta charigringui. Paica pai nacirishca punllamandapachami* nazareo* canga. Paica Taita Diosta sirvishpa causachun separashcami canga. Chaimandami paitaca ajchatapash nunca na muchuna can. Paimi israelitacunataca filisteocunapa maquimanda salvanga” nircami.
6 Chai jipami chai huarmiguca ima pasashcata paipa cusaman villashpa cashna nirca: “Taita Diosta* sirvij shuj runagumi shamurca. Chai runagupa ñavica punchapamba, Taita Diospa* angelshnami carca. Paitaca maimanda shamujujtapash na tapurcanichu. Paipash paipa shutitaca na villahuarcachu.
7 Paica cashnami nihuarca: ‘Ricui, vijsayu tucushpami shuj churiguta charigringui. Chai huahuaca nacirishca punllamandapacha, huañungacamanmi nazareo canga. Paica Taita Diosta sirvishpa causachun separashcami canga. Chaimandami vinotapash, shuj tragocunatapash na ufianachu cangui. Shinallata Taita Diospa ricuipi mapa ricurij micunacunataca na micunachu cangui’ nihuarcami” nircami.
8 Chaimi Manóah runaca Jehová Diosta cashna nishpa rogarca: “Jehová Dios disculpahuai. Ama shinagu cashpa, can chairalla cachamushca canda sirvij runaguta cutin cachamupai. Nacirina huahuaguhuan imata rurana cashcata explicachun cachamupai” nircami.
9 Taita Diosca* Manóah runapa mañashcataca uyarcami. Manoahpa huarmigu pambapi tiajujpimi Taita Diospa* angelca cutin chai huarmigupaman shamurca. Pero paipa cusa Manoahca na paihuan carcachu.
10 Chai huarmiguca calpashpami paipa cusaman ima pasashcata villangapaj rirca. Cashnami nirca: “Ricui, chaishuj punlla shamushca runagullatami cutin shamushca” nircami.
11 Chaimi Manóah runaca jatarishpa paipa huarmiguhuan chai runa cashca pushtuman rirca. Chaipimi chai runataca “¿quiquinllu ñuca huarmiguhuan parlaparcangui?” nishpa tapurca. Chaimi chai runaca “ari, ñucami capani” nirca.
12 Shina nijpimi Manóah runaca cashna nirca: “Quiquin nishcashna pactaripachun. Pero huahuaguca ¿ima laya causaitata charigripan? Paica ¿imatata ruragripan?” nishpami tapurca.
13 Chaimi Jehová Diospa angelca Manóah runamanga cashna nirca: “Canba huarmiguca ñuca imata nishcatami rurana can.
14 Paica uvastapash, uvasmanda imapash llujchishca micunacunatapash na micunachu can. Shinallata vinotapash y shuj tragocunatapash na ufianachu can. Taita Diospa ricuipi mapa ricurij micunacunatapash na micunachu can. Paica tucui ñuca ima nishcatami rurana can” nircami.
15 Shina nijpimi Manóah runaca Jehová Diospa angeltaca cashna nirca: “Por favor amara ripaichu. Quiquinmanmi shuj maltun chivota huañuchishpa yanugripanchi” nircami.
16 Pero Jehová Diospa angelca Manóah runamanga cashnami nirca: “Ñuca caipi quidashpapash can carashca micunataca na micushachu. Carangapapacha munashpaca Jehová Diosman shuj rupachina ofrendata* carai” nircami. Manoahca chai runa Jehová Diospa ángel cashcataca na yacharcachu.
17 Chaimi Manóah runaca Jehová Diospa angeltaca cashna nirca: “¿Ima shutita capangui? Quiquinba nishcacuna pactarijpi quiquinda alipi churangapami shina tapunajupanchi” nircami.
18 Shinapash Jehová Diospa angelca cashnami nirca: “Ñuca shutica alipacha juyailla shutimari can. ¿Imashpata ñuca shutitaca tapuhuangui?” nircami.
19 Manóah runaca maltun chivota y grano ofrendata* japishpami shuj rumi jahuapi churashpa Jehová Diosmanga cararca. Chaimi Taita Diosca Manoahpash y paipa huarmipash ricujta pipash na rurai ushanalla cosascunata rurashpa ricuchirca.
20 Altar jahuapi nina jahua cielocaman rupajujpimi Manoahpash y paipa huarmipash Jehová Diospa ángel nina chaupimanda jahuaman rijta ricurca. Chaita ricushpami paicunaca enseguida cungurishpa alpacaman cumurirca.
21 Chaipimi Manóah runaca chai runa Jehová Diospa ángel cashcata cuenta japirca. Jehová Diospa angelca Manóah runaman y paipa huarmimanbash ñana cutinga ricurircachu.
22 Chaimi Manoahca paipa huarmigutaca cashna nirca: “Taita Diostamari ricushcanchi. Cunangarinbash huañuitami huañugrinchi” nircami.
23 Shina nijpimi Manoahpa huarmiguca cashna nirca: “Jehová Dios ñucanchita huañuchingapaj munashca cashpaca ñucanchi rupachina ofrendata y grano ofrendatapash na chasquinmanllu carca. Shinallata cashna rurashcacunatapash na ricuchinmanllu carca. Ñucanchiman parlashca shimicunatapash na ninmanllu carca” nircami.
24 Tiempo jipaca chai huarmiguca shuj churigutami charirca. Chai huahuagutaca Sansón shutitami churarca. Huahuagu viñashpa catijujpica Jehová Diosca bendiciashpami catijurca.
25 Tiempohuanga Zorá y Estaol llactacuna chaupipi tiaj Mahané-Dan shuti pushtupimi Sansonga Jehová Diospa espíritu santota* chasquirca. Chaimi paica Taita Diospa pueblopa favor macanajuna yuyaita japirca.
Notacuna
^ Hebreo shimipica “vijsa ucumandapachami” nijunmi.
^ O “Dios verdadero”. Glosariopi “Dios verdadero” shimita ricupangui.
^ O “Dios verdadero”. Glosariopi “Dios verdadero” shimita ricupangui.
^ O “Dios verdadero”. Glosariopi “Dios verdadero” shimita ricupangui.
^ O “Dios verdadero”. Glosariopi “Dios verdadero” shimita ricupangui.
^ O “ofrenda quemada”. Glosariopi “ofrenda quemada” shimita ricupangui.
^ O “ofrenda de grano”. Cai ofrendacunaca harina fina, camllashca cebada o trigo, redondo tortacuna y galletacunapashmi caita usharca.
^ Glosariopi “espíritu santo” shimita ricupangui.
