Jueces 14:1-20
14 Sansonga Timná llactamanmi urai rirca. Chaipimi paica shuj filistea* huarmita ricurca.
2 Chai jipaca paipa taitamamapaman vichai rishpami paicunataca cashna nirca: “Timná llactapica shuj filistea huarmitami ricurcani. Paihuan cazarangapami paita apamuchun munani” nircami.
3 Chaimi paipa taitamamaca Sansondaca cashna nirca: “¿Pero nachu ñucanchi familiapurapillata o cai llactapillata huarmicunaca tian? ¿Imashpata circuncisionda* na rurashca filisteocunapurapi cazarangapaj huarmita mascajungui?” ninajurcami. Pero Sansonga paipa taitataca “paimi ñucapaca ali can. Paihuan cazarachihuai” nircami.
4 Shinapash Sansonba taitamamaca chashna pasachun Jehová Dios munajushcataca na cuenta japircachu. Taita Diosca filisteocunahuan macanajungapami shuj oportunidadta mascajurca. Porque chai tiempopica filisteocunami israelitacunataca mandashpa charijurca.
5 Sansonga paipa taitamamahuanmi Timná llactaman urai rirca. Sansón Timná llactapi uvas pambacunaman chayajpica shuj leonmi* paipaman huacashpa shamurca.
6 Chai horasmi Jehová Diospa espíritu santoca* Sansonmanga poderta curca. Chaimi paica chai leondaca maquicunahuanlla chaupirca. Shuj maltun chivoguta chaupinshnami chaupirca. Pero chaita rurashcataca ni paipa taitamanbash ni paipa mamamanbash na villarcachu.
7 Chai jipaca Sansonga chai huarmihuan parlangapami Timná llactaman rirca. Paipaca chai huarmica ali cashpami catijurca.
8 Jipamanga chai huarmita mascashpa paipa huasiman pushangapaj rijushpami Sansonga león maipi huañushcata ricushpandi yalingapaj rirca. Chaimi león huañushca cuerpo ucupica abejacunapash y mielpash junda tiajushcata ricurca.
9 Chaipimi Sansonga mieltaca paipa maquihuan japishpa ñandaca chai mielta micushpandi rijurca. Ña paipa taitamamapaman chayashpaca chai mieltaca paicunamanbashmi micuchun cararca. Pero chai mielta leonba huañushca cuerpomanda japishcataca na villarcachu.
10 Sansonba taitaca chai huarmi maipi cashca pushtumanmi urai rirca. Chaipimi Sansonga tucui joven jaricuna rurashcashnallata paipash shuj jatun micuita rurarca.
11 Gentecuna Sansonda ricushpaca 30 jaricunatami paita cumbachun pushamurca.
12 Chaipimi Sansonga chai jaricunataca cashna nirca: “Shuj adivinanzata rurachun saquihuaichi. Cai jatun micui 7 punllacunapi cai adivinanzata canguna adivinajpica ñucaca linohuan rurashca 30 ropacunata y 30 fino ropacunatami cangunaman cusha.
13 Pero si chai adivinanzata na adivinashpaca cangunami ñucamanga linohuan rurashca 30 ropacunata y 30 fino ropacunata cuhuana canguichi” nircami. Chaimi paicunaca “chai adivinanzata nilla, uyangapaj munanchimi” nishpa tigrachirca.
14 Shina nijpimi Sansonga cashna nirca:
“Micujmandami micunaca llujshircay fuerzata charijmandami mishquica llujshirca. Chaicunaca ¿imata can?” nircami.
Shina nishcamanda quimsa punllacuna ña yalijpipash paicunaca chai adivinanza ima cashcataca na atinashpallatami catirca.
15 Pero ña chuscu punllacuna yalijpica chai jaricunaca Sansonba huarmitaca* cashnami nirca: “Chai adivinanza ima cashcata canman nichun canba cusata umachi. Si na chaita ruranguica canda y canba taitapa huasipi cajcunatapashmi tucuillata rupachishun. ¿O cangunaca ñucanchi charishcacunata quichungapachu ñucanchita invitashcanguichi?” ninajurcami.
16 Chaimi Sansonba huarmica ninanda huacashpa Sansondaca cashna nirca: “Canga ñucataca ricuitami na ricunayachihuangui. Na juyahuanguichu. Canga ñuca llactamanda gentecunaman shuj adivinanzata rurashpapash chai adivinanza ima cajtaca ñucamanga na nihuashcanguichu” nircami. Chaita uyashpami Sansonga cashna nishpa tigrachirca: “Ni ñuca taitaman, ni ñuca mamamanbash chai adivinanza ima cajtaca na nishcanichu. ¿Imashpata canmanga nishayari?” nircami.
17 Pero chai huarmica chai jatun micui 7 punllacuna pactangacamanbash Sansonba ñaupapica cutin cutin huacajurcallami. 7 punlla ña pactajpica Sansonga paipa huarmi shina huacajujpilla ña shaijushca sintirishpami chai adivinanza ima cajtaca paimanga villarca. Chaimi chai huarmica paipa llactamanda gentecunaman villarca.
18 Ña 7 punllacuna pactajpica nara indi huashajujpillatami* chai llactamanda jaricunaca Sansondaca cashna nirca:
“¿Mieltapash yali ashtahuan mishquica tianllu?¿Leondapash yali ashtahuan shinllica tianllu?” nircami.
Shina nijpimi Sansonga cashna nishpa tigrachirca:
“Si canguna, ñuca vaquillaguhuanllata na yapushpacachai adivinanzataca na adivinanguichimanllu carca” nircami.
19 Chai jipami Jehová Diospa espirituca Sansonmanga poderta curca. Chaimi Sansonga Asquelón llactaman urai rishpa 30 jaricunata huañuchishpa paicunapa ropata quichushpa adivinanza ima cajta atinashca jaricunaman curca. Chai jipaca culirami Sansonga paipa taitapa huasiman tigrarca.
20 Sansonba huarmitaca, jatun micuipi Sansonda cumbañashca joven jaricunamanda shuj jovenhuanmi cazarachirca.
Notacuna
^ Hebreo shimipica “filisteocunapa ushicunapuramanda” nijunmi.
^ Glosariopi “circuncisión” shimita ricupangui.
^ O “maltun león”.
^ Glosariopi “espíritu santo” shimita ricupangui.
^ Hebreocunaca cazarangapaj comprometirishcacunataca cusa, huarmi ninmi carca.
^ O talvez “pai nara cuarto ucuman yaicujpillatami”.
