Jueces 15:1-20
-
Sansonga filisteo gentecunamandami vengarin (1-20)
15 Huaquin tiempo jipaca trigota cosechana punllacunapimi Sansonga paipa huarmita ricungapaj shuj maltun chivota apashpa rishpa cashna nirca: “Ñuca huarmipa cuartomanmi yaicungapaj munani” nircami. Pero chai huarmipa taitaca cuartoman yaicuchunga na saquircachu.
2 Chai huarmipa taitaca Sansondaca cashnami nirca: “Paitaca nimamanda na ricunayachinguichu yashpami, canda jatun micuipi cumbashca runaman curcani. Pero canba ricuipica ¿nachu paipa jipa ñaña ashtahuan juyaillagu ricurin? Paipa randica paipa jipa ñañahuan quidachunmi candaca rogapani” nircami.
3 Shina nijpimi Sansonga cashna nirca: “Cai viajeca paicunata llaquichigrijushcamandaca filisteocunaca na imamandapash culpai ushahuangachu” nircami.
4 Chaimanda rishpaca Sansonga 300 zorro animalcunata japishpami ishcai ishcai chupapura huatarca. Chai huatashca chupacunapimi Sansonga michongunata huatarca.
5 Chai jipaca chai michongunata ninahuan prindishpami chai zorro animalcunataca filisteocunapa trigo pambacunapi cacharirca. Shinami trigo huangucunata,* trigo pambacunata, uvas pambacunata y olivos yuracunatapash gulpita rupachishpa saquirca.
6 Filisteocunaca “¿pita caitaca rurarca?” nishpami tapurca. Shina tapujpimi cashna nishpa tigrachirca: “Timná llactamanda runapa masha Sansonmi shina rurashca. Paipa huarmita quichushpa paita jatun micuipi cumbashca runaman cushcamandami shina rurashca” ninajurcami. Chaita uyashpami filisteocunaca vichai rishpa chai huarmitaca paipa taitandi rupachishpa saquirca.
7 Sansonga paicunataca nircami: “Canguna chashna rurashcamandaca, cangunamanda vengaringacamanga na tranquilo cashachu” nircami.
8 Chaimi Sansonga cada unota macai callarirca. Ashtacacunami huañurca. Chai jipaca urai rishpami Etam shuti jacapi tiashca shuj cueva* ucupi quidarca.
9 Jipamanga filisteocuna Judá llactaman vichai rishpami carpacunataca chaipi shayachirca. Paicunaca Lehí pushtutami caiman chaiman purinajurca.
10 Chaimi Judá llactamanda jaricunaca “¿imashpata ñucanchihuan macanajungapaj shamushcanguichi?” nishpa tapurca. Shina tapujpimi paicunaca cashna nirca: “Sansonda japingapami* vichai shamushcanchi. Paitaca ñucanchita rurashcashnallatami ruragrinchi” ninajurcami.
11 Chaimi Judá llactamanda 3 mil jaricunaca Etam shuti jacapi tiashca cuevaman urai rishpa Sansondaca cashna tapurca: “¿Imashpata ñucanchitaca chashnapacha rurashcangui? ¿Nachu filisteocuna ñucanchita mandashpa charijujtaca yachangui?” ninajurcami. Shina ninajujpimi Sansonga “paicunataca ñucata rurashcashnallatami rurarcani” nishpa tigrachirca.
12 Chaimi chai jaricunaca Sansondaca cashna nirca: “Ñucanchica canda japishpa* filisteocunaman entregangapami urai shamushcanchi” nircami. Shina nijpimi Sansonga paicunataca cashna nirca: “Canguna ñucata napacha llaquichigrinajushcata jurahuaichi” nircami.
13 Shina nijpimi chai jaricunaca Sansondaca cashna nirca: “Na, ñucanchica canda huatashpa filisteocunaman entregangapallami munanchi. Candaca na huañuchigrinchica” ninajurcami.
Chaimi paicunaca Sansondaca ishcai mushuj cabiacunahuan huatashpa, jacamanda llujchishpa paihuan vichai rirca.
14 Lehí pushtuman ña chayanajujta ricushpami filisteocunaca ninanda cushijushpa caparinajurca. Shinapipachami Jehová Diospa espíritu santoca* Sansonmanga poderta curca. Chaimi Sansonda huatashca cabiacunapash rupashca lino puchashna fitirirca. Shinallata maquicunapi churashca cadenacunapash yacuyanshnami maquimandaca urmarca.
15 Sansonga burropa fresco quijada tullutami tarirca. Chai quijadahuanmi paica mil jaricunata huañuchirca.
16 Shinapimi Sansonga cashna nirca:
“Shuj burropa quijadahuanmi contracunataca huañuchishpa mundun mundunda tandachishcani.
Shuj burropa quijadahuanmi mil jaricunata huañuchishcani” nircami.
17 Parlai tucuchishca jipaca chai quijada tullutaca shitashpami saquirca. Y chai pushtutaca Ramat-Lehí* shutitami churarca.
18 Shinapimi Sansonga ninanda yacunayachirca. Chaimi paica Jehová Diostaca cashna nishpa ninanda mañarca: “Ñuca Taita Dioslla, ñucaca canba sirvijmi capani. Canmi cai jatun salvaciondaca ñucaman cuhuashcangui. Cunanga ¿yacunayaimanda huañushpachu circuncisionda* na rurashca runacunapa maquipi japi tucuna cani?” nircami.
19 Chaipimi Taita Diosca Lehí pushtupi tiashca utujuta yacu llujshimuchun pascarca. Chai yacuta Sansón ufiashpami cutin fuerzata japishpa* shinlli tucurca. Chaimandami chai yacu utujutaca En-Hacore* nishca shutita churarca. Chaica cunan punllacamanmi Lehí pushtupi can.
20 Sansonga filisteocunapa punllacunapica 20 huatacunatami Israel llactapica juez* carca.
Notacuna
^ O “gavillacunata”.
^ O “utuju”.
^ O “huatangapami”.
^ O “huatashpa”.
^ Glosariopi “espíritu santo” shimita ricupangui.
^ Cai shutica “quijada loma” nijunmi.
^ Glosariopi “circuncisión” shimita ricupangui.
^ Cai shutica “cayajpa pujyu” nijunmi.
