Jueces 16:1-31
16 Shuj punllaca Sansonga Gaza shuti llactamanmi rirca. Chaipimi shuj prostituta huarmita ricushpa, paipa huasiman yaicurca.
2 Chaipimi shuj personaca Gaza llactamanda gentecunataca “Sansonga caipimi can” nirca. Chaimi chai llactamanda gentecunaca llacta muyundipi shayarirca. Shinallata gentecunaca pacallami tuta entero llacta pungu entradapi quidarca. Paicunaca tuta entero chaipi quidashpami “indi llujshijhuanmi Sansondaca huañuchishun” ninajurcami.
3 Shinapash Sansonga chaupi tutacamanmi chaipi puñushpa quidarca. Chaupi tutata jatarishpami Sansonga chai llacta entradapi jatun pungutaca ishcai pilarcunandi tucuillata* llujchishpa saquirca. Chaicunataca hombrospi churashpami Hebrón llacta ñaupapi tiashca urcu jahuacaman aparishpa rirca.
4 Chai jipaca Sorec shuti pambacuna* ladopi causaj Dalila shuti huarmitami Sansonga juyai callarirca.
5 Chaimi filisteocunata mandajcunaca chai huarmihuan parlangapaj rishpa cashna nirca: “Sansón maimanda chashnapacha fuerzata charishcata villachun paita umachi.* Paita mishashpa, huatashpa imashna controlai ushanata averiguai. Shina rurajpica ñucanchica cada unomi canmanga mil 100 piezas de platata* cushun” nircami.
6 Chai jipami Dalila huarmica Sansondaca cashna nirca: “Ama shinagu cashpa, maimanda chashnapacha fuerzata charishcata villahuai. Candaca ¿imahuanda huatashpa controlaita usharin?” nircami.
7 Shina nijpimi Sansonga cashna nishpa tigrachirca: “Nara ali chaquishca 7 fresco animalpa angucunahuan* ñucata huatajpica, ñucapash shuj gentecunashnami débil quidasha” nircami.
8 Chaimi filisteocunata mandajcunaca nara ali chaquishca 7 fresco animalpa angucunata apashpa rirca. Chai angucunahuanmi Dalila huarmica Sansondaca huatarca.
9 Chaicamanga filisteocunaca shuj cuarto ucupimi pacajushca tianajurca. Chaimi Dalilaca “Sansón filisteocunaca caipimi can” nishpa caparirca. Shina nijpica enseguidami Sansonga chai angucunataca lino puchata apenas nina tacarishpalla ñapash fitinshna fitirca. Shinami Sansón maimanda ashtaca fuerzata charishcataca na yachai usharirca.
10 Chaimi Dalilaca Sansondaca cashna nirca: “Canga llullashpami umachihuashcangui, por favor imahuan canda huatai ushanata villahuayari” nircami.
11 Chaimi paica cashna nishpa tigrachirca: “Trabajopi nara utilizashca mushuj huascacunahuan ñucata huatahuajpica shuj gentecunashnami ñucapash débil tucusha” nircami.
12 Shina nijpimi Dalila huarmica mushuj huascacunahuan Sansonda huatashpa “Sansón filisteocunaca caipimi can” nishpa caparirca. (Chaicamanga Sansonda mascajcunaca cuarto ucupimi pacajushca carca). Dalila huarmi shina caparijpica Sansonga enseguidami paita huatashca huascacunataca puchata fitinshna fitirca.
13 Chai jipaca Dalila huarmica cutinmi Sansondaca cashna nirca: “Canga cutinmi llullashpa umachihuajungui. Canda imahuan huatai ushanata villahuayari” nircami. Chaimi Sansonga cashna nishpa tigrachirca: “Shuj telarpa puchacunahuanmi ñucapa 7 trenzacunataca tejina cangui” nirca.
14 Sansonba trenzacunata telarpa estacapi huatashca jipaca, Dalila huarmica “Sansón filisteocunaca caipimi can” nishpa caparirca. Chaimi Sansonga enseguida rijcharishpa telarpa estacatapash puchacunandi llujchishpa saquirca.
15 Dalila huarmica cashnami Sansondaca nirca: “Canga ñucata juyani nishpapash ¿imashpata ñucapica na confiangui? Canga maimanda ashtaca fuerzata charishcata na villashpami caicamanga ña quimsa viajeta umachihuashcangui” nircami.
16 Dalila huarmica Sansondaca cada punllami villahuai nishpa nijunlla carca. Chaimi Sansonga ña shaijushpa huañungapaj munarca.
17 Chaimi Sansonga tucuita villashpa cashna nirca: “Ñucaca nacirishcamandapacha* Taita Diosta sirvingapaj separashca nazareo* cashcamandami ñuca ajchatapash nunca na muchushcani. Si ñuca ajchata muchunica fuerza illami quidasha. Chaimi shuj gentecunashna débil tucusha” nircami.
18 Chaimi Dalilaca Sansón tucuita villashcata cuenta japirca. Shinami paica enseguida filisteocunata mandajcunata cashna nishpa cayachun cacharca: “Cai rato shamuichi, cunansi Sansonga tucuitami villahuashca” nirca. Shina nijpimi filisteocunata mandajcunaca paipaman culquindi shamurca.
19 Dalila huarmica Sansonda paipa migllapi puñuchishca jipami Sansonba 7 trenzacunata muchuchun shuj runata cayarca. Sansonga asha asha fuerzata pirdijujpimi Dalila huarmica paita controlai callarirca.
20 Dalila huarmica “Sansón filisteocunaca caipimi can” nishpa caparirca. Sansonga rijcharishpami cashna pensarca: “Chaishuj viajecunashnallatami cai viajepash imapash na pasashpa escaparisha” nishpa pensarca. Shinapash paica Jehová Dios paita saquishcataca na yacharcachu.
21 Filisteocunaca Sansonda japishpami paipa ñavicunatapash llujchishpa Gaza llactaman urai aparca. Chaipica ishcai cadenacunandi huatashpami carcelpi molino jatun rumita muyuchichun churarca.
22 Shinapash paipa ajchata muchushca jipaca cutinmi ajchaca viñai callarirca.
23 Sansonda japishcamandami filisteocunata mandajcunaca paicunapa Dagón shuti yanga diosman shuj jatun ofrendata cushpa celebrangapaj tandanajurca. Paicunaca cashnami ninajurca: “Ñucanchi diosmi, ñucanchipa contra Sansón runataca ñucanchi maquipi churashca” ninajurcami.
24 Filisteocunaca paicunapa diosta ricushpami chai diosta alabai callarirca. Paicunaca cashnami ninajurca: “Sansonga ñucanchi llactata llaquichishpami, ñucanchipuramandaca ashtacacunata huañuchirca. Chaimandami ñucanchi diosca ñucanchipa contra Sansón runataca ñucanchi maquipi churashca” ninajurcami.
25 Filisteocunaca paicunapa shungu ucupi ninanda cushijushca sintirishpami “Sansonmanda burlaringapaj paita apamugrichi” nishpa ninajurca. Chaimi Sansonmanda burlaringapaj carcelmandaca llujchirca. Sansondaca ishcai columnacunapa chaupipimi churarca.
26 Sansonga paita maquimanda pushajuj jovendaca “cai huasipa columnacunapi apoyaringapaj pushahuai” nircami.
27 (Chai huasipica ashtaca jaricuna y huarmicunami carca. Shinallata filisteocunata tucuilla mandajcunami chaipica carca. Terrazamandaca 3 mil jaricuna y huarmicunami Sansonmanda burlarishpa ricunajurca).
28 Sansonga Jehová Diostaca cashna nishpami rogai callarirca: “Tucuita Mandaj Jehová Dioslla ñucata yarihuayari por favor. Taita Dioslla, cai viajella cutin fuerzata carahuai por favor. Ñucapa ñavicunamandami chai filisteocunamanda vengarichun ayudahuai” nircami.
29 Chai jipami Sansonga huasi chaupipi charijuj ishcai columnacunapi apoyarirca. Sansonga paipa lluqui lado maquitaca shuj columnapimi churarca, cutin ali lado maquitaca chaishuj columnapimi churarca.
30 Sansonga “Filisteocunandimi huañugrini” nishpami caparirca. Shina caparishpami Sansonga paipa tucui fuerzashuan chai columnacunata tangajpi chai huasica mandajcunapa y chaipi cashca tucuilla gentecunapa jahuapi urmarca. Sansonga chaipi huañushpaca pai causashpa huañuchishcacunatapash yalimi ashtacacunata huañuchirca.
31 Jipamanga Sansonba huauquicuna y paipa taitapa tucuilla familiacunami Sansonba cuerpota mascangapaj rirca. Sansondaca Zorá llacta y Estaol llactapimi pambarca. Paitaca paipa taita Manóah runata pambashca pushtupimi pambarca. Sansonga 20 huatacunatami Israel llactapica juez* carca.
Notacuna
^ O “pungupi churashca barracunandi”.
^ O “convinci”.
^ Shuj pieza de plataca shuj pedazo de plata materialmi carca y hebreocunapa pesana medidami carca y valortapash charinmi carca.
^ O “mushuj arcopa cuerdacunahuan”.
^ Hebreo shimipica “vijsa ucumandapachami” nijunmi.
