Jueces 3:1-31
3 Canaán alpacunapi nimahora na macanajushca israelitacuna cazujta o na cazujta ricungapami Jehová Diosca cai llactacuna quidachun saquirca.
2 (Jipa nacirishca israelitacuna macanajunata yachajuchunmi Taita Diosca chai llactacuna quidachun saquirca. Shinami paicunaca macanajunata yachajugrinajurca. Porque paicunaca nunca na shuj guerrapica cashcarcachu).
3 Cai llactacunami carca: Filisteocunapa 5 gobernantecuna, tucui cananeo gentecuna, sidonio gentecuna y heveo gentecuna. Paicunaca Líbano lomapimi causan carca. Chaica Baal-Hermón lomamanda, Lebó-Hamat pushtucamanmi* carca.
4 Jehová Diosca Moiseshuanmi israelitacunapa punda taitacunamanga mandamientocunata curca. Chai mandamientocunata israelitacunapash cazujta o na cazujta yachangapami chai llactacuna quidachun saquirca.
5 Chaimi israelitacunaca cananeo gentecunapurapi, hitita gentecunapurapi, amorreo gentecunapurapi, perizita gentecunapurapi, heveo gentecunapurapi y jebuseo gentecunapurapi causanajurca.
6 Israelitacunaca chai llactacunamanda huarmicunahuanmi cazaranajurca. Shinallata paicunapa ushicunatapash chai llactamanda churicunahuanmi cazarachinajurca. Y chai llactacunamanda yanga dioscunatapashmi sirvi callarirca.
7 Israelitacunaca Jehová Diospa ricuipi nali cosascunatami ruranajurca. Paicunapa Jehová Diosta cungashpami Baal yanga dioscunata y santocunata adorangapaj poste caspicunatapash adoranajurca.
8 Chaimandami Jehová Diosca israelitacunahuan ninanda culirashpa Mesopotamia* llactapa Cusán-Risataim shuti reypa maquipi saquirca.* Israelitacunaca Cusán-Risataim shuti runataca 8 añostami sirvishpa causarca.
9 Israelitacuna Jehová Diosta ayudahuai nishpa rogajpica, paicunata salvachunga Jehová Diosca shuj salvadortami churarca. Paica Quenaz shuti runapa churi Otniel runami carca. Quenazca, Calebpa menor huauquimi carca.
10 Jehová Diosca paipa espíritu santotami* Otniel runamanga curca. Chaimi paica israelitacunapa juez* tucurca. Otniel runa macanajungapaj llujshijpica Jehová Diosca Mesopotamia* llactamanda Cusá-Risataim shuti reytaca paipa maquipimi entregarca. Chaimi paica chai reytaca misharca.
11 Chai jipaca 40 huatacunatami chai alpacunapica tranquilo ali causai tiarca.* Chai jipami Quenaz runapa churi Otnielca huañurca.
12 Cutinmi israelitacunaca Jehová Diospa ricuipi nali cosascunata rurai callarirca. Chaimi Moab llactapa Eglón shuti reytaca israelitacunata yali shinlli tucuchun Jehová Diosca saquirca. Porque israelitacunaca Jehová Diospa ricuipi nali cosascunatami ruranajurca.
13 Shinallata Eglón shuti reyca ammonita gentecunahuan y amalequita gentecunahuan tandanajushpami israelitacunataca atacarca. Chaimi paicunaca palmeracuna tiaj llactata misharca.
14 Israelitacunaca Moab llactapa Eglón shuti reytaca 18 añostami sirvishpa causarca.
15 Chaimi israelitacunaca Jehová Diosta ayudahuai nishpa rogarca. Paicunata salvachunga Jehová Diosca shuj salvadortami churarca. Paica Guerá shuti runapa churi Ehúd shuti runami carca. Paica benjaminita runami carca. Paica tucuitami lluqui maquihuan ruran carca. Tiempo jipaca israelitacunaca Moab llactapa Eglón shuti reyman impuestota pagachunmi Ehúd runataca cacharca.
16 Ehúd runaca casi 40 centimetrocunata* midij ishcandi ladoman filo espadatami rurarca. Chai jipaca chai espadataca paipa ropa ucupi ali lado changapimi huatarirca.
17 Chai jipami Ehúd runaca Moab llactata mandaj Eglón shuti reyman impuestota curca. Chai reyca ushashca vira vira runami carca.
18 Impuestota cushca jipami Ehúd runaca, impuestota apamushca gentecunataca chaimanda cacharca.
19 Ehúd runaca Guilgal pushtupi maquihuan rurashca dioscuna tiaj pushtumandaca* reypaman cutin tigrashpami, reytaca cashna nirca: “Jatun mandajlla, pipash na yachanalla shuj mensajetami quiquinman charipani” nircami. Chaimi reyca paipa sirvientecunataca “caimanda richi” nirca. Chaimi tucuicuna chaimanda llujshishpa rirca.
20 Terrazapi frescolla tiaj shuj cuartopi rey Eglón pailla cajpimi, Ehúd runaca paipaman quimirishpa cashna nirca: “Taita Diosmanda shuj mensajetami quiquinman charipani” nirca. Chaita uyashpami reyca pai mandajushca asientomanda* jatarirca.
21 Chaipimi Ehúd runaca paipa ali lado changapi huatarishca espadata lluqui maquihuan llujchishpa reypa vijsapi satirca.
22 Espada enteromi maqui charinandi reypa vijsamanga yaicurca. Reyca vira vira cashcamandami espadaca pambarishca quidarca. Chaimandami Ehudca reypa vijsamandaca espadataca na llujchirca. Shinami reypa ishpacunapash llujshirca.
23 Chai jipami Ehúd runaca terrazapi cuartopa pungucunata llavishpa corredorta* escaparishpa rirca.
24 Ehúd runa rishca jipami, reypa sirvientecuna tigramushpaca terraza cuartopa pungucuna llavishcata ricurca. Chaimi paicunaca “frescolla cuartopimi paica bañopi tiajunga” ninajurcami.
25 Ña unaita shuyanajushpa, shinallata reypash terraza cuartopa pungucunata na pascajta ricushpami, paicunaca preocuparirca. Chaimi llaveta japishpa pungucunata pascarca. Chaipimi paicunapa rey alpapi huañushca sirijujta ricurca.
26 Sirvientecuna imata ruranata ricungacamanga, Ehúd runaca maquihuan rurashca dioscuna tiaj ladota* yalishpami, Seirá pushtuman sano y salvo chayarca.
27 Chaiman chayashpami Ehúd runaca Efraín urcucunapi cachota huacachirca. Chaimi israelitacunaca paihuan igual urai rirca. Ehúd runaca paicunata ñaupashpami rijurca.
28 Chaipimi israelitacunataca cashna nirca: “Jacuchi, Jehová Diosmi cangunapa contra moabita gentecunataca cangunapa maquipi churashca” nircami. Chaimi israelitacunaca Ehúd runata catishpa moabita jaricunapash ama maitapash escapari ushachun Río Jordán yalina ñangunataca jarcagrirca. Paicunaca ni shuj moabita jaricuna yalichunga na saquircachu.
29 Chai viajeca más o menos 10 mil moabita jaricunatami huañuchirca. Paicunaca shinlli y na manllaj jaricunami carca. Ni shujllapash na escaparircachu.
30 Chai punllamandapachami israelitacunaca moabita gentecunata mandashpa charirca. Chaimi chai alpacunapica 80 huatacunata tranquilo ali causanajurca.*
31 Ehúd runa huañushca jipaca, Anat shuti runapa churi Samgar shuti runami juez tucurca. Paimi israelitacunataca salvarca. Paica huagracunata tujsina varahuanmi 600 filisteocunata huañuchirca.
Notacuna
^ O “Hamat pushtupa entradacamanmi”.
^ Hebreo shimipica “Aram-Naharaim” nijunmi.
^ Hebreo shimipica “jaturca” nijunmi.
^ Glosariopi “espíritu santo” shimita ricupangui.
^ Hebreo shimipica “Aram” nijunmi.
^ O “chai alpaca samarca”.
^ Hebreo shimipica “shuj codo” nijunmi. O talvez “shuj uchilla codo”. Apéndice B14ta ricupangui.
^ O talvez “canteracunamandaca”.
^ Hebreo shimipica “tronomanda” nijunmi.
^ O talvez “huaira yaicuna ventanata”.
^ O talvez “canteracunata”.
^ O “alpaca samarca”.
