Jueces 6:1-40
-
Madianita gentecunaca israelitacunataca ninandami llaquichin (1-10)
-
Shuj angelmi Gedeón shuti jueztaca Jehová Diosmi ayudanga nin (11-24)
-
Gedeonmi Baal yanga diospa altartaca urmachishpa saquin (25-32)
-
Jehová Diospa espíritu santomi Gedeonbamanga shamun (33-35)
-
Llama cara milmahuan ima pasajtami ricun (36-40)
6 Israelitacunaca cutinmi Jehová Diospa ricuipi nali cosascunata rurai callarirca. Chaimandami Jehová Diosca israelitacunata llaquichichunga 7 añoscunata madianita gentecunapa maquipi saquirca.
2 Chaimi madianita gentecunaca israelitacunata llaquichishpa causarca. Madianita gentecunapa culpamandami israelitacunaca urcucunapi, na fácil yaicunalla pushtucunapi y cuevacunapi pacajun carca.
3 Israelitacuna cada tarpushcami madianita gentecuna, amalequita gentecuna y indi llujshimuj ladomanda gentecunaca paicunata atacan carca.
4 Paicunaca israelitacunahuan macanajungapami carpacunata shayachin carca. Gaza llactacamanmi israelitacunapa gulpi cosechacunata tucuchishpa saquin carca. Israelitacuna micuchunbash nimata na saquinllu carca. Shinallata llamacunatapash, torocunatapash, ni burrocunatapash na saquinllu carca.
5 Paicunaca paicunapa animalcunandi, carpa huasicunandimi vichai rin carca. Paicunaca saltamonte* jurucunashnami ashtacacunapacha carca. Paicunapash y paicunapa camellocunapash ashtacacuna caimandami cuentaitallapash na usharin carca. Paicunaca llactata tucuchingapami chayan carca.
6 Shinami madianita gentecunaca israelitacunataca imapash illa, llaquinaita saquirca. Chaimandami israelitacunaca Jehová Diostaca ayudahuai nishpa ninanda roganajurca.
7 Madianita gentecunamanda liberachun israelitacuna Jehová Diosta mañanajujpimi,
8 Jehová Diosca shuj profetata cacharca. Chai profetaca cashnami israelitacunataca nirca: “Israel llactapa Jehová Diosca caitami nin: ‘Ñucami canguna esclavocuna cashca llactamanda llujchimurcani. Egipto llactamandami vichai llujchimurcani.
9 Egipto llactapa maquimandami cangunataca salvarcani. Shinallata cangunataca tucui llaquichij gentecunamandapashmi salvarcani. Paicunataca cangunapa ñaupamanda anchuchishpami, paicunapa alpacunatapash cangunaman curcani.
10 Caitami cangunamanga nircani: “Ñucami cangunapa Jehová Dios cani. Canguna causanajun alpacunapi causaj amorreo gentecunapa yanga dioscunataca na adoranachu* canguichi” nircanimi. Shinapash cangunaca na cazuhuarcanguichichu’* ninmi” nircami.
11 Jehová Diospa ángel chayamushpami Ofrá llactapi tiaj jatun quiru* ucupi tiarirca. Chai quiruca Joás shuti runapami carca, paica abí-ezritami carca. Joás runapa churi Gedeón runaca uvasta saruna pushtupimi trigotaca huactajurca. Madianitacuna granocunata ama ricuchunmi chaipi trigota huactajurca.
12 Jehová Diospa ángel ricurishpami Gedeondaca “poderoso guerrero, Jehová Diosca canhuanmi can” nirca.
13 Chaimi Gedeonga angeltaca cashna nirca: “Ñuca amolla disculpahuai, pero si Jehová Dios ñucanchihuan cajpica ¿imashpata shina llaqui pasanajunchiyari? ¿Ñucanchi punda taitacuna juyailla parlashca cosascunaca maipitayari? Paicunaca, ‘Jehová Diosmi ñucanchitaca Egipto llactamanda llujchirca’ nishpami parlan carca. Pero cunanga Jehová Diosca ñucanchita jichushpami madianita gentecunapa maquipi saquishca” nircami.
14 Chaimi Jehová Diosca Gedeondaca cashna nirca: “Ri, canga canba charishca fuerzahuanmi, israelitacunataca madianita gentecunapa maquimanda salvagringui. ¿Nachu ñuca candaca cachajuni?” nircami.
15 Gedeonga cashna nishpami contestarca: “Jehová Dios disculpahuai. Pero ñucaca ¿maitashi Israel llactataca salvashayari? Manasés jatun familiamandapash ñuca familiacunami menos importante can. Ñuca taitapa familiamandapash ñucami menos importante cani” nircami.
16 Chaimi Jehová Diosca cashna nirca: “Ñucami canhuan casha. Chaimandami madianita gentecunataca shujlla jarita mishanshnami mishangui” nircami.
17 Shina nijpimi Gedeonga cashna nirca: “Quiquinba ñaupapi ñuca ali ricurishca cajpica,* quiquin ñucahuan parlajushcata yachangapaj shuj señalta ricuchihuai.
18 Quiquinmanmi micunaguta carangapaj munapani. Ama shinagu cashpa, amara ripanguichu” nircami. Shina nijpimi chai angelca “can tigramungacamanmi caipi shuyasha” nirca.
19 Gedeonga ucuman yaicushpami shuj maltun chivota huañuchishpa yanurca. Shinallata 24 libra* harinamandami levadura illa asha tandata rurarca. Aichataca shuj canastapimi churarca. Cutin caldotaca shuj mangapimi churarca. Chai jipaca tucuita chai jatun quiruman apashpami micunataca angelman cararca.
20 Taita Diospa* angelca, Gedeondaca cashnami nirca: “Aichata y levadura illa tandataca chai jatun rumi jahuapi churai. Caldotapash chai jahuapi tali”* nircami. Chaitami Gedeonga rurarca.
21 Chaimi Jehová Diospa angelca, maquipi charijuj vara pundahuan aichata y levadura illa tandata tacarirca. Shinami rumimanda nina llujshijpi aichapash, levadura illa tandapash ruparca. Chai jipami Jehová Diospa angelca Gedeonba ñaupamanda chingarirca.
22 Chai ratomi Gedeonga Jehová Diospa ángel cashcata cuenta japirca.
Chaipimi cashna nirca: “Aij Tucuita Mandaj Jehová Dioslla imachari tucusha. Ñucaca Jehová Diospa angeltami ñavi ñavi ricushcani” nirca.
23 Pero Jehová Diosca “tranquilo* ama manllaichu, na huañugringuichu” nircami.
24 Chaimandami Gedeonga chai pushtupi Jehová Diosman shuj altarta rurarca. Chai pushtutaca Jehová-Salom* shutitami churarca. Cunangamanmi chai pushtuca chai shutita charin. Chai pushtuca cunangamanmi abí-ezrita gentecunapa Ofrá llactapi can.
25 Chai tutami Jehová Diosca Gedeondaca cashna nirca: “Canba taitapa 7 añosta charij segundo maltun torota japingui. Chai jipaca canba taitapa Baal yanga diospa charishca altarta urmachingui. Shinallata altarpa ladopi tiajuj santocunata adorangapaj poste caspitapash urmachingui.
26 Chai jipaca rumicunata aliguta en orden tandachishpa, shuj altolla seguro pushtupi canba Jehová Diosman shuj altarta rurangui. Chai jipaca rupachina ofrendata* cungapami chai maltun torota japishpa, can urmachishca postepa pedazo caspicuna jahuapi churangui” nircami.
27 Gedeonga paipa sirvientecunamanda 10 sirvientecunata cayashpami Jehová Dios mandashcashna rurarca. Pero Gedeonga paipa taitapa familiata y llactapa jaricunata manllaimandami Taita Dios mandashcata punllapi ruranapa randica tutapi rurarca.
28 Llactapa jaricuna tutamandata jatarishpaca Baal yanga diospa altarta pichari urmachishcatami ricurca. Chai altar ladopi tiajushca santocunata adorangapaj poste caspitapash urmachishcatami ricurca. Shinallata mushuj altarta rurashca jahuapi 7 añosta charij segundo maltun torota rupachishcatami ricurca.
29 Chaimi paicunaca “¿pishi caitaca rurashcanga?” nishpa tapurinajurca. Chai asuntota averiguashca jipaca “Joás runapa churi Gedeonmi chaitaca rurashca” ninajurcami.
30 Chai jipaca llactapa jaricunaca Joás runataca cashnami ninajurca: “Canba churita huañuchingapaj ñucanchiman cui. Paimi Baal diospa altarta, shinallata altarpa ladopi tiajushca santocunata adorangapaj poste caspitapash urmachishca” ninajurcami.
31 Joás runaca chai culirashca jaricunataca cashna nishpami tigrachirca: “¿Baal diosca canguna paita difindichunllu minishtin? ¿Canguna paita salvachunllu minishtin? Pipash paita difindijpica cai tutamandallatami huañuna can. Si Baal Diospacha cashpaca paipa altarta urmachishcamandaca paillata difindirichun” nircami.
32 Chai punllami Joás runaca Gedeondaca Jerubaal* shutita churarca. Joás runaca “Baal diosllata difindirichun. Porque paipa altartami urmachishca” nijurcami.
33 Madianita gentecuna, amalequita gentecuna, indi llujshimuj ladomanda gentecunapashmi tandanajurca. Paicunaca Río Jordanda yalishpami Jezreel pambacunapi* carpacunata shayachirca.
34 Jehová Diospa espíritu santomi* Gedeonbamanga shamurca.* Chaipimi Gedeonga cachota huacachirca. Shinami abí-ezrita gentecunaca paihuan tandanajushpa paita catirca.
35 Shinallata Gedeonga tucuilla Manasés jatun familiapa alpacunamanmi mensajerocunata cacharca. Chaimi paicunapash tandanajushpa paita catirca. Shinallata Aserpa, Zabulonba y Neftalipa jatun familiacunamanbashmi mensajerocunataca cacharca. Chaimi paicunapash Gedeonhuan tuparingapaj vichai rirca.
36 Jipamanga Gedeonga Taita Diostaca* cashnami nirca: “Quiquin prometishcashna ñucahuan Israel llactata salvagrijushpaca,
37 caita rurashpa ricuchihuai: trillana pushtupimi llama cara milmata saquigrini. Chai llama cara milma serenohuan mutiyashpapash,* llama cara milma tiajuj pushtu muyundi alpa chaquishca cajpica, can prometishcashna ñucahuan Israel llactata salvanatami yachasha” nircami.
38 Gedeón ricuchichun nishcashnami pasarca. Gedeonga caya tutamanda jatarishpaca, llama cara milmata japishpa llapijpica shuj jatun tazonbi jundangatashnami yacutaca llujchirca.
39 Shinapash Gedeonga Taita Diostaca* cashnami nirca: “Ama ñucahuan culirapanguichu. Caigutapashmi cutin mañangapaj munapani. Ama shinagu cashpa llama cara milmahuanllatami shuj pruebata rurangapaj munapani. Por favor cai viajeca tucuilla alpa serenohuan mutiyashca cashpapash, solo llama cara milmalla ama mutiyashca cachun” nircami.
40 Taita Diosca chai tutallatami chaitaca rurarca. Tucuilla alpa serenohuan mutiyashca cashpapash llama cara milmallami chaquishca quidarca.
Notacuna
^ Hebreo shimipica “langosta” nijunmi.
^ Hebreo shimipica “na manllanachu” nijunmi.
^ Hebreo shimipica “ñuca shimitaca na uyarcanguichichu” nijunmi.
^ O “jatun yura”.
^ Hebreo shimipica “quiquinba ñavicunapi ali ricurishca cajpica” nijunmi.
^ Hebreo shimipica “shuj efá” nijunmi. Apéndice B14ta ricupangui.
^ O “Dios verdadero”. Glosariopi “Dios verdadero” shimita ricupangui.
^ O “regai”.
^ Hebreo shimipica “tranquilo ali causaita charingui” nijunmi.
^ Cai shutica “Jehovami tranquilo ali causai can” nijunmi.
^ O “ofrenda quemada”. Glosariopi “ofrenda quemada” shimita ricupangui.
^ Cai shutica “Baal legalmente difindirichun” nijunmi.
^ O “Valle de Jezreel”.
^ Glosariopi “espíritu santo” shimita ricupangui.
^ Hebreo shimipica “forrarca” nijunmi.
^ O “Dios verdadero”. Glosariopi “Dios verdadero” shimita ricupangui.
^ O “jucushpapash”.
^ O “Dios verdadero”. Glosariopi “Dios verdadero” shimita ricupangui.
