Jueces 7:1-25
7 Jerubaal nishca Gedeón runapash y paihuan cashca gentecunapash madrugadota jatarishpami Harod shuti pugyu ladopi carpacunata shayachirca. Madianita soldadocunaca paicuna cashca norte ladoman, Moré shuti loma lado pambacunapimi carpacunataca shayachishca carca.
2 Jehová Diosca cashnami Gedeondaca nirca: “Ashtaca soldadocunatami charingui. Shina cashcamandami madianita gentecunataca cangunapa maquipica na cushachu. Porque si madianita gentecunata cangunapa maquipi saquijpica israelitacunaca ‘ñucanchipa ushaihuanmi salvarircanchi’ nishpami talvez jariyanajunga.
3 Shinaca por favor, canba soldadocunamanga ‘pipash ninanda manllajushpaca paipa huasiman tigrachunlla’ ningui” nircami. Chaimi Gedeonga manllanajuj soldadocunata separangapaj chaita nirca. Chaita uyashpami 22 mil soldadocunaca huasiman tigrarca. Y 10 mil soldadocunallami quidarca.
4 Shinapash Jehová Diosca Gedeondaca cashnami nirca: “Todaviami ashtaca soldadocunata charinguira. Paicunataca yacuman urai richun mandai. Chaipimi picuna quidanataca ñuca agllasha. Si ñuca ‘paimi canhuan ringa’ nijpica, paimi canhuanga ringa. Pero ‘paica na canhuan ringachu’ nijpica, paica na canhuanga ringachu” nircami.
5 Gedeonga soldadocunataca yacuman urai richunmi mandarca.
Chai jipaca Jehová Diosca Gedeondaca cashnami nirca: “Maquihuan yacuta japishpa ufiajcunataca* urai cumurishpa yacuta ufiajcunamanda separangui” nircami.
6 Tucuillamandaca 300 soldadocunami yacuta maquihuan japishpa ufianajurca. Cutin chaishujcunaca urai cumurishpami yacutaca ufianajurca.
7 Jehová Diosca Gedeondaca cashnatapashmi nirca: “Cangunataca yacuta maquihuan japishpa ufiashca 300 soldadocunahuanmi madianitacunapa maquimanda salvasha. Paicunataca cangunapa maquipimi churasha. Chaimandaca chaishuj soldadocunaca paicunapa huasiman tigrachunlla” nircami.
8 Chai jipaca chai 300 soldadocunaman gentecuna micunacunata y huacachina cachocunata cushca jipaca Gedeonga tucuilla resto soldadocunatami huasiman cacharca. Gedeonga 300 soldadocunahuanllami quidarca. Madianita gentecunapa shayachishca carpacunaca ura pambacunapimi carca.
9 Chai tutami Jehová Diosca Gedeondaca cashna nirca: “Madianita gentecunata mishachunmi canba maquipi saquigrini. Paicunata atacangapaj ri.
10 Pero si paicunata atacanata manllajushpaca canba ayudante Purá shuti runahuan shayachishca carpacunaman urai ri.
11 Paicuna imata parlanajujta uyashpaca paicunata atacanataca na manllanguichu”* nircami. Shina nijpimi Gedeonga paipa ayudante Purá shuti runahuan madianita gentecunapa shayachishca carpa manña ladocaman quimirirca.
12 Madianita gentecuna, amalequita gentecuna, indi llujshimuj ladomanda gentecunaca saltamonte* jurucunashnami pambapi fuyushna jundariarca. Paicunapa camellocunapash mar manñapi arena cuenda ashtacacunapacha caimandami cuentaitapash na cuentai ushanalla carca.
13 Gedeón chaiman chayashpaca shuj runa pai muscushcata shuj runaman parlajushcatami uyarca. Chai runaca cashnami parlajurca: “Ñucaca cebadahuan rurashca redondo tanda ñucanchi shayachishca carpacunaman bolashpa yaicushpa shuj carpa huasihuan chocarijtami muscurcani. Shinllita chocarijpi carpa huasi tucuilla urmajtami muscurcani” nijurcami.
14 Shina nijpimi chaishuj runaca cashna nirca: “Chaica Israel llactamanda Joás runapa churi Gedeonba espadatami ricuchijun. Taita Diosmi madianita gentecunata y tucuilla soldadocunata Gedeonba maquipi entregagrin” nircami.
15 Gedeonga chai muscuimanda ima nijta uyashpaca Taita Diosta adorangapami cungurirca. Chai jipaca israelitacunapa shayachishca carpacunaman tigrashpami cashna nirca: “Jacuchi, madianita soldadocunataca Jehová Diosmi cangunapa maquipi entregashca” nircami.
16 Chaimi Gedeonga 300 soldadocunataca quimsa grupopi separashpa, tucuillacunaman huacachina cachocunata, alpa jarracunata, chai alpa jarracunapica shuj rupajuj michonda churashpa curca.
17 Chai jipaca Gedeonga cashnami nirca: “Ñuca imata rurajta ricushpaca chaitapachami rurana canguichi. Shayachishca carpacunaman chayashpaca ñuca imata rurashcatami rurana canguichi.
18 Ñuca y ñucahuan rinajuj soldadocunapash cachocunata huacachijpimi cangunapash madianita soldadocunapa shayachishca carpacuna muyundipi shayarishpa cachocunata huacachina canguichi. Shinallata ‘Jehová Diospa y Gedeonba macanajuimi can’ nishpami caparina canguichi” nircami.
19 Ña chaupi tuta tucugrijujpi* soldadocunapa turnopash chairalla cambiashca jipami, Gedeonga paihuan cashca 100 soldadocunahuan madianita soldadocunapa carpacuna manña ladoman chayarca. Chai horascunapimi paicunaca cachocunata huacachishpa, maquipi apanajuj alpa jarracunatapash urmachishpa faquirca.
20 Chaipica quimsandi grupocuna tandanajushpami cachocunata huacachishpa, alpa jarracunatapash urmachishpa faquinajurca. Paicunaca lluqui lado maquihuanmi rupajuj michonda charinajurca. Cutin ali lado maquihuanga cachocunata huacachishpami “Jehová Diospa y Gedeonba macanajuimi can” nishpa caparinajurca.
21 Soldadocunaca madianita gentecunapa shayachishca carpacuna muyundimandaca maimanbash na anchurircachu. Pero contra soldadocunaca paicunapa carpacunamandaca ninanda caparishpami pacajungapaj calpanajurca.
22 Chai 300 soldadocunaca cachocunata huacachinataca na saquircachu. Jehová Diosca carpacunapi cashca tucuilla soldadocunataca paicunapuratallatami espadahuan macanajuchirca. Chaimi contra soldadocunaca Bet-Sitá llactacaman, shinallata Zererá pushtucaman calpashpa rirca. Paicunaca Tabat pushtu lado Abel-Meholá pushtu canllacamanmi calpashpa rirca.
23 Chaimi Neftalipa, Aserpa y Manasespa jatun familicunamanda tucuilla israelita jaricunata tandachirca. Shinami paicunaca madianita soldadocunata ninanda catirca.
24 Gedeonga Efraín urcucunapi tucuilla causajcunamanmi mensajerocunata cashna nichun cacharca: “Madianita gentecunata atacangapaj uriajuichi. Río Jordanmanda Bet-Bará pushcaman yalijuj tucuilla ñangunata jarcaichi. Shinallata tucuilla chaita yalijuj yacu pushtupipash tucuilla ñangunata jarcaichi” nichunmi cacharca. Shina nijpimi Efrainba jatun familiamanda tucuilla jaricunaca tandanajushpa, Río Jordanmanda Bet-Bará pushtucaman yalijuj tucuilla ñangunata jarcarca. Shinallata tucuilla chaita yalijuj yacu pushtupipash tucuilla ñangunatami jarcarca.
25 Shinallata Madián llactamanda Oreb y Zeeb shuti ishcai mandajcunatami japirca. Oreb runataca Oreb shuti jatun rumi jahuapimi huañuchirca. Cutin Zeeb runataca uvasta saruna Zeeb shuti pushtupimi huañuchirca. Israelitacunaca madianita soldadocunataca ninandami catinajurca. Paicunaca Oreb runapa y Zeeb runapa umacunatami Río Jordán pushtu ladoman apashpa Gedeonman curca.
Notacuna
^ Hebreo shimipica “Alcushna yacuta jalluhuan lambishpa ufiajcunataca” nijunmi.
^ Hebreo shimipica “canba maquicunaca shinlliyangami” nijunmi.
^ Hebreo shimipica “langosta” nijunmi.
^ Caipica más o menos 10 de la nochemanda 2 de la mañanacaman nijunmi.
