Lucas 8:1-56
-
Huarmicunami Jesustaca cumbashpa rirca (1-3)
-
Tarpuj runagumanda parlaj comparación (4-8)
-
Jesusca comparaciongunata churashpami yachachirca (9, 10)
-
Tarpuj runagumanda parlaj comparaciondami Jesusca intindichirca (11-15)
-
Nipi na shuj micha lamparataca tapanllu (16-18)
-
Jesuspa mama y huauquicuna (19-21)
-
Jesusca huairata y mar yacutapashmi casilla quidachirca (22-25)
-
Jesusca demoniocuna cuchicunaman yaicuchunmi cacharca (26-39)
-
Jairopa ushi. Shuj huarmigumi Jesuspa ropata tacarirca (40-56)
8 Chai jipaca, shuj shuj llactacunapi y shuj shuj pueblocunapipashmi Jesusca Taita Diospa Gobiernomanda ali villaicunata yachachishpa y predicashpa purijurca. Jesustaca 12 apostolcunapashmi cumbashpa rinajurca.
2 Jesustaca huaquin huarmigucunapashmi cumbashpa rinajurca. Chai huarmigucunatami Jesusca jambishcarca. Demoniocunatapashmi** paicunamandaca llujchishcarca. Shujca María shutimi carca. Paitami Magdalena nishpa rijsin carca. Paica 7 demoniocuna jundami cashcarca. Chaimi Jesusca demoniocunata llujchishpa paitaca jambishcarca.
3 Cutin shujca Juanami carca. Paica Cuza shuti runagupa huarmimi carca. Chai runaguca Herodespa huasipa encargadomi* carca. Shinallata Susana shuti huarmigupash, shuj huarmigucunapashmi paicunapa charishca cosasgucunahuan Jesustapash y paipa apostolcunatapash ayudashpa purinajurca.
4 Jesusta catinajuj gentecunahuanmi shuj shuj llactamanda gentecunapash tandanajushpa Jesusta catinajurca. Chaipimi Jesusca shuj comparacionda churashpa nirca:
5 “Shuj runaguca trigota tarpungapami llujshirca. Tarpujujpica huaquin muyucunaca ñanbimi urmarca. Chaimi chai muyucunataca gentecunapash sarurca y jahua cielopi pajarocunapash micurca.
6 Cutin shuj muyucunaca rumi rumi alpapimi urmarca. Chai muyucunaca yacu faltaimandami viñashca jipalla chaquirirca.
7 Cutin shuj muyucunaca casha junda alpapimi urmarca. Chaimi cashacuna viñashpaca trigota taparca.*
8 Cutin shuj muyucunaca ali alpapimi urmarca. Viñashpaca alipacha fucushpami, shuj muyugumandalla 100 yalita fucurca” nishpa. Chai jipami Jesusca shinllita nirca: “Uyangapaj rinrita charishpaca ali ali uyaichi”.
9 Shinapash paipa discipulocunaca chai comparación ima cashcatami tapurca.
10 Chaimi Jesusca nirca: “Taita Diospa Gobiernomanda yachachishcacunaca quiquingunapaca pacalla charishca secretomi* can. Taita Diosmi chai yachachishcacunata intindichun ayudashca. Pero shuj gentecunamanga comparaciongunata churashpami parlashcani. Ricushpapash na ricujunshna cachun, uyashpapash na intindi ushachunmi shina nircani.
11 Shinaca, chai comparacionbi muyucunaca Taita Diospa shimitami ricuchin.
12 Ñanbi urmashca muyucunaca, Taita Diospa shimita uyajcunami can. Shinapash paicuna ama crichun y Taita Dios ama salvachunmi Diabloca chai muyuta anchuchinshna paicunapa shungumandaca Taita Diospa shimita anchuchin.
13 Rumi rumi alpapi urmashca muyucunaca, Taita Diospa shimita uyashpa cushijushpa chasquijcunami can. Shinapash, na sapiyashca yuracunashnami can. Paicunaca asha tiempotalla crishpami, pruebacuna ricurijpica crinata saquin.
14 Casha junda alpapi urmashca muyucunaca, Taita Diospa shimita uyashpapash preocupacionguna, cai causaipi ima munashcata ruranacuna y ashtahuan charina munaicuna pandachishcamandami imahuanbash tapajpishna aliguta fucuitaca na ushan.
15 Ali alpapi tarpushca muyucunaca Taita Diospa shimita ali shunguhuan uyashpa, paicunapa shungupi chasquijcunami can. Shinallata llaquicunata charishpapash aguantashpa aliguta fucuita ushajcunami can.
16 ”Micha lamparaguta prindishca jipaca, nipipash na imahuanbash tapanllu o cama ucupipash na churanllu. Sino huasi ucuman yaicujcunata punchayachichunmi, micha lamparagutaca meza jahuapi churan.
17 Porque imata pacalla rurashcapash ima horaca ricuringallatami. Imata pacalla parlashcapash ima horaca yachaj chayaringallatami. Imatapash para siempre pacaitaca na usharinllu.
18 Shinaca ñuca imata nijujtaca aliguta uyaichi. Porque imatapash charijmanga ashtahuanmi cunga. Pero ashagutalla charijtaca, charinimi yashcacunatapashmi quichunga” nirca.
19 Chai jipaca, Jesuspa mamapash y Jesuspa huauquicunapashmi paita ricungapaj rirca. Shinapash ashtaca gentecuna chaipi cajpimi paipaman quimiritaca na ushanajurca.
20 Chaimi gentecunaca cashna nishpa Jesusmanga villarca: “Quiquinba mamapash y quiquinba huauquicunapashmi quiquinda ricungapaj shamushca canllapi shayanajun”.
21 Chaimi Jesusca paicunataca nirca: “Taita Diospa shimita uyashpa pactachijcunami ñuca mama y ñuca huauquicuna can” nishpa.
22 Shuj punllaca, paipa discipulocunahuan shuj canoaman vitsashpami* Jesusca cashna nirca: “Mar yacu chaishuj ladoman chimbashunchi”. Shina nishpami paicunaca ri callarirca.
23 Shina rinajushpami Jesusca puñushpa quidarca.* Chai mar yacupica, ushashcata huairashpami yacupash canoapi jundai callarirca. Chaimi canoaca ña pambarigrijurca.
24 Ña pambarigrijujpimi, Jesuspa discipulocunaca cashna nishpa paitaca rijchachirca: “Yachachij, Yachachij huañugrinchimari” nishpa. Shina nijpimi, Jesusca jatarishpa huairatapash y caiman chaiman manllanaita cuyurijuj mar yacutapash rimarca. Chaimi huairapash, mar yacupash casilla quidarca.
25 Chai jipami Jesusca paicunataca nirca: “¿Imamandata Taita Dios ayudanataca na confiarcanguichi?” nishpa. Shinapash, paipa discipulocunaca ninanda manllarishpami paicunapura ninajurca: “Paica ¿pipachatayari? Pai rimajpica huairapash y mar yacupash cazunllamari” nishpa.
26 Shinami paicunaca Gadara nishca llacta manñaman chayarca. Chai llactaca Galilea llacta chimba ladomanmi carca.
27 Canoamanda Jesús uriajujhuanmi, demonio catishca shuj runaca shuj ladolla llactamanda tuparimurca. Chai runaca ña unaitami lluchulla purin carca. Huasipica na causashpami pantionbi causan carca.
28 Jesusta chai runa ricushpaca caparishpa, paipa ñaupapi cungurishpami shinllita cashna nirca: “Jahua cielopi Taita Diospa Churi Jesús ¿imapata caimanga shamurcangui? Ñucata ama llaquichihuaichu nishpami rogani” nircami.
29 Chai runamanda chai demoniota* llujshi nishpa mandajujpimi, Jesustaca chashna nishcarca. Chai demonioca cutin cutinmi chai runamanga yaicun carca.* Chaimi gentecunaca cutin cutin paitaca chaquicunata y maquicunata cadenacunahuan huatan carca. Paita ricuriachunmi maijandapash mingan carca. Shinapash paica siempremi cadenacunataca fitishpa saquin carca. Demonio catishca caimandami chai runaguca shitashca pushtucunaman rin carca.
30 Chai jipami Jesusca paitaca tapurca: “¿Ima shutita cangui?”. Chaimi chai demonioca nirca: “Legión* shutimi cani” nishpa. Ashtaca ashtaca demoniocuna chai runapi yaicushcamandami shina shuti carca.
31 Chai demoniocunaca ama ucu ucu utujuman* shitahuaichu nishpami Jesustaca roganajurca.
32 Chai pushtupica ashtaca cuchicunami lomapi micunajurca. Chaimi demoniocunaca chai cuchicunapi yaicuchun saquihuai nishpa roganajurca. Shina ninajujpimi Jesusca cuchicunapi yaicuichilla nirca.
33 Chaimi chai demoniocunaca chai runamanda llujshishpa cuchicunapi yaicurca. Chai jipami tucuilla cuchicunaca jahua jahuamanda mar yacuman shitarishpa chaipi ahogarirca.
34 Shinapash ima pasashcata ricushpami cuchicunata cuidadorcunaca calpashpa rirca. Paicunaca ima pasashcatami chai llactapipash y llacta muyundi ladocunapipash parlanajurca.
35 Chaimi shuj gentecunapash ima pasashcata ricungapaj rinajurca. Jesús maipi cashca pushtuman chayashpaca, ashtaca ashtaca demoniocunahuan jundashca runa ña ali tucushca, yaipi y ropatapash* churajushca Jesushuan tiajujtami ricurca. Chaita ricushpami gentecunaca ninanda manllarinajurca.
36 Ima pasashcata ricushca gentecunaca, demonio catishca runagu imashina ali tucushcatami paicunamanga parlanajurca.
37 Chaimi tucuilla gentecunaca, cai Gadara llactamanda ripai nishpa Jesusta roganajurca. Ninanda manllaimandami paicunaca shina ninajurca. Chaimi Jesusca canoaman vitsashpa chai llactamanda rigrijurca.
38 Shina rigrijujpimi demoniocunata llujchi tucushca runaguca, pushahuai nishpa rogajurca. Shinapash Jesusca na pushashpami chai runagutaca nirca:
39 “Canba huasiman tigrailla. Taita Dios canmanda imatalla rurashcataca tucuicunaman villagri”. Shina nijpimi chai runaguca Jesús imatalla paimanda rurashcataca llacta entero villajurca.
40 Galilea llactaman Jesús tigrajpica, tucuilla gentecuna paita shuyanajuimandami ninanda cushijushpa chasquirca.
41 Chaipimi Jairo shuti runagu shamurca. Paica sinagoga huasipi shuj presidentemi carca. Paica Jesuspa ñaupapi cungurishpami, ñuca huasiman ripashun nishpa rogajurca.
42 Paica más o menos 12 huatacunata charij shujlla ushigutami* charirca.
Chai ushiguca ñami huañugrijurca. Jesustaca ashtaca gentecunami saruripi catishpa rinajurca.
43 Chaipica 12 huatacunata yahuar urai shamujuj unguita charij huarmigupashmi carca. Paica pipash na jambi ushajpimi shina causajurca.
44 Chai huarmiguca huashata shamushpami Jesustaca paipa jahualla churajushca ropa pundagupi tacarirca. Chai ratomi yahuarca ñana urai shamushpa chaquirirca.
45 Jesusca tapurcami: “¿Pita tacarihuarcanguichi?”. Shina tapujpimi tucui gentecunaca, ñucaca na tacaripashcanichu ninajurca. Shinapash Pedroca nircami: “Yachachij, ashtaca gentecunamari tangaripi, saruripi quiquindaca catimunajun”.
46 Chaimi Jesusca nirca: “Maijanllarimi tacarihuarca. Ñucamanda poder llujshijtami sintircani” nishpa.
47 Jesús cuenta japijta ricushpami chai huarmiguca, manllaimanda chujchushpa Jesuspaman quimirirca. Jesuspa ñaupapi cungurishpami, imamanda tacarishcata, imashina ñapash ali tucushcatapash tucui gentecunapa ñaupapi villarca.
48 Shinapash Jesusca nircami: “Ñuca huahualla. Tucui shunguhuan crishcamandami ali tucushcangui. Ripailla, ama pinarijuichu” nirca.
49 Jesús parlajujpillatami, Jairopa huasimanda shuj runagu shamushpa Jairotaca nirca: “Yachachijtaca yangami quiquinba huasiman jacu nijungui. Quiquinba ushiguca ñami huañushca”.
50 Shina nijujta uyashpami Jesusca Jairotaca nirca: “Ama pinarichu. Tucui shunguhuan critallami crina cangui. Canba ushiguca causaringami” nirca.
51 Jairopa huasiman chayashpaca, chai cuitsagupa* taitamamata, Pedrota, Juanda y Santiagotallami Jesusca yaicuchun saquirca.
52 Chai cuitsagu huañushcamandami tucuilla gentecuna huacanajurca. Ninanda llaquirishpami pechotapash huactarinajurca. Chaimi paicunataca nirca: “Ama huacanajuichichu. Cuitsaguca na huañushcachu, puñuitallami puñujun” nishpa.
53 Chaita uyashpami gentecunaca Jesusmanda burlarishpa asi callarirca. Paicunaca chai cuitsagu huañushcata yachashpami shina ruranajurca.
54 Shinapash chai cuitsagutaca maquita japishpami Jesusca shinllita cashna nirca: “Cuitsagu, jatari ninimi”.
55 Shina nijpimi chai cuitsaguca causarishpa* ñapash jatarirca. Chaimi Jesusca cai cuitsaguman imapash micunaguta carapaichi nirca.
56 Chaita ricushpami chai cuitsagupa taitamamacunaca ninanda cushijunajurca. Shinapash Jesusca, ima pasashcataca nipiman na parlanachu canguichi nishpami mandarca.
Notacuna
^ O “ayacunatapashmi”.
^ Griego shimipica “nali angelcunatapashmi” nijunmi.
^ O “mayordomomi”.
^ O “quilparca”.
^ O “secreto sagradomi”. Glosariopi “secreto sagrado” shimita ricupangui.
^ O “sicashpami”.
^ O “saquirirca”.
^ Griego shimipica “nali angelta” nijunmi.
^ O talvez “unai tiempotami chai runapi yaicushca carca”.
^ Glosariopi “ucu ucu utuju” shimita ricupangui.
^ O “llachapatapash”.
^ O “hijagutami”.
^ O “huarmi huambragupa”.
