Romanos 12:1-21
12 Shinaca huauquicuna, Taita Diosca ninandami cangunataca llaquin. Chaimandami cangunapa cuerpota y cangunapa causaitaca, Taita Diosman shuj sacrificiota* caranshna cuchun rogapani. Chai sacrificiota Taita Dios chasquichunga, sin pecadomi cana can. Shinami Taita Diostaca aliguta pensarishpa sirvita ushapanguichi.
2 Cai mundopi* gentecunashnaca ñana causanachu canguichi. Chaipa randica, cangunapa yuyaicunata cambianami canguichi. Shinami Taita Diospa voluntad maijan cashcataca cangunallata ricunguichi. Porque Taita Diospa voluntadca ali, paita cushichij, perfectomi can.
3 Taita Diosca ninanda juyashpami* ñucataca tratahuashca. Chaimi quiquingunataca cada unota nipani, importantepachami cani nishpaca na pensajunachu capanguichi. Taita Diosca cada unotami crichun ayudashca. Chaimi imashina crichun ayudashcashnallata, aliguta yuyashpa, quiquingunamandaca minishtirishcatalla pensarina capanguichi.
4 Ñucanchi cuerpoca ashtaca partecunatami charin. Shinapash na tucui partecunachu chaitallata ruran.
5 Shinallatami ñucanchicunapash taucacuna cashpapash, Cristohuan shujllashna caimandaca shujlla cuerposhna capanchi. Pero tucuicunallatami randimanda minishtiripanchi.
6 Taita Diosca ñucanchitaca cada unota ninanda juyashpami* shuj shuj ruraicunata pactachichun ushaita cushca. Shinaca, Taita Dios imata nishcata villangapaj ushaita chasquishca cashpaca, crichun imashina Taita Dios ayudashcashnallatami predicana capanchi.
7 Shujcunata ayudangapaj ushaita chasquishca cashpaca, ayudashpa catipashunchi. Shujcunaman yachachingapaj ushaita chasquishca cashpaca, yachachishpa catipashunchi.
8 Shujcunata animana ushaita chasquishca cashpaca, animashpa catipashunchi. Shujcunaman carana ushaita chasquishca cashpaca, tucui shunguhuan carashpa catipashunchi. Ñaupaman pushana ushaita chasquishca cashpaca, aliguta ñaupaman pushashpa catipashunchi. Llaquina ushaita chasquishca cashpaca, cushijuihuan llaquishpa catipashunchi.
9 Shujcunataca tucui shunguhuanmi juyana capanguichi. Nalita ruranataca millanayachinami capanguichi. Alita rurangapami esforzarina capanguichi.
10 Familiapurashna juyarishpami, huauqui propiota juyanshna caishuj chaishuj juyarina capanguichi. Shujcunata respetohuan tratangapami cangunara siempre listo cana capanguichi.
11 Ali trabajadorcunami cana capanguichi. Na ociozocuna cana capanguichichu. Taita Diospa espíritu santo cangunaman fuerzata cuchunmi, saquina capanguichi. Jehová* Diospa esclavocunami cana capanguichi.
12 Shamuj punllacunapi imata japinataca cushijushpa shuyapaichi. Llaquicunata charishpaca aguantapaichi. Taita Diosta mañanatapash ama saquipaichichu.
13 Taita Diospa separashcacunataca* imapi ayudachun minishtijujta ricushpa ayudapaichi. Shujcunataca aligutami chasquishpa catina capanguichi.
14 Quiquingunata catiriashpa llaquichij gentecunamandaca, Taita Dios bendiciachunmi mañana capanguichi. Paicunamanda nalicunataca na parlanajunachu capanguichi.
15 Cushilla cajcunahuanga cushijupaichi. Cutin huacanajujcunahuanga huacapaichi.
16 Imashinami quiquingunamanda preocuparinguichi, shinallatami shujcunamandapash preocuparina capanguichi. Na jariyashcacuna cana capanguichichu. Sino humildecunami cana capanguichi. Shinaca, shujcunamanda yali alipachami yachani yashpaca, na pensarijunachu capanguichi.
17 Pipash cangunata nalita rurajpica, na chashnallata tigrachinachu capanguichi. Tucui gentecunapa ricuipi ima ali cajta rurangapaj esforzaripaichi.
18 Shujcunahuan tranquilo aliguta causangapaca, tucui rurai ushashcata rurapaichi.
19 Juyashca huauquicuna, pipash quiquingunata llaquichijpica, na chashnallata nalita rurashpa tigrachinachu capanguichi. Chaipa randica, Taita Dios culirashcata ricuchichunmi, paipa maquipi saquina capanguichi. Porque Taita Dios escribichishca shimipica nijunmi: “‘Ñucami vengarisha. Ñucami paicunamanga paicuna imata miricishcata cusha’ ninmi Jehová* Diosca”.
20 Shinaca “quiquinba contra yarjachijujpica, micunaguta carapangui. Yacunayachijujpica, yacuguta carapangui. Shina rurashpami, paipa uma jahuapi nina carbonda mundunajunshna canga”.*
21 Shuj gentecuna cangunata nalita rurajpipash, cangunaca alitami rurana capanguichi. Shinami nali ruraicunataca ali ruraicunahuan mishai ushanguichi.
Notacuna
^ Glosariopi “sacrificio” shimita ricupangui.
^ Glosariopi “cai tiempo” shimita ricupangui.
^ Glosariopi “bondad inmerecida” shimita ricupangui.
^ Glosariopi “bondad inmerecida” shimita ricupangui.
^ Glosariopi “Taita Diospa separashcacuna” shimita ricupangui.
^ Imashinami rupa rupa nina carbonhuan jirrutaca yacuyachin carca, shinallatami ali ruraicunaca gentecunapa shunguta amujyachishpa culirata yalichin carca.
