Rut 3:1-18
3 Rutpa suedra Noemica paitaca cashnami nirca: “Can ali causachunmi shuj cusata* canman mascana cani.
2 Boazca ñucanchi parientemi can. Y cunan canhuan cozechashpa trabajashca huarmicunaca paipa sirvientacunami can. Jala, Boazca cunan tutami cebadataca trillana pambapi huairachingapaj rigrin.
3 Shinaca armashpa mishquilla ashnajuj aceiteta churarishpa y ropatapash* lo mejorta churajushpa trillana pambaman urai ri. Pero chaipi cashcata Boaz ama cuenta japichunmi, pai micushpa y ufiashpa tucuchingacaman pacalla cana cangui.
4 Pai maipi puñugrijujtaca ali ali ricungui. Ña puñujujpica paipa chaqui pundapi jatanata ashaguta alzachishpa chaipi siriringui. Chai jipaca paillatami imata ruranataca ninga” nircami.
5 Shina nijpimi Rutca “quiquin nishcashnami tucuita rurasha” nirca.
6 Chai jipami trillana pambaman rishpa paipa suedra tucui imata nishcata rurarca.
7 Cutin Boazca micushca y ufiashca jipaca, cushillami granocuna mundunashca ladopi puñungapaj siririrca. Chaimi Rutca upallaguta quimirishpa chaqui pundapi jatanata ashaguta alzachishpa chaipi siririrca.
8 Ña chaupi tutami Boazca chujchujushpa rijcharirca. Y ashaguta alzarishpaca paipa chaqui ladopi shuj huarmi sirijujtami ricurca.
9 Chaimi Boazca “¿pita canguiyari?” nirca. Shina nijpimi Rutca “ñucaca quiquinda sirvij Rutmi capani. Ñucatapash jatachihuai porque quiquinga ñuca cusapa parientemi capangui. Quiquinmi ñucanchipa situacionbica ayudaita ushapangui” nircami.
10 Shina nijpimi Boazca nirca: “Ñuca huahualla Jehová Dios bendiciapachun. Canba punda rurashcacunaca can ninanda juyashcatami* ricuchirca. Pero cunanmi ashtahuan juyashcata ricuchijungui. Porque charij cajpipash o pobre cajpipash shuj joven jaritaca na mascashcanguichu.
11 Ñuca huahualla ama preocuparichu. Can tucui ima nishcatami rurasha. Porque cai llactapica tucuicunami can shuj ali persona cashcataca yachan.
12 Ciertomi ñucaca canba cusapa pariente capani. Pero shuj pariente más cercanopash tianrami.
13 Cunan tutaca caipi pacarilla. Chai pariente canda cai situacionbi ayudangapaj munashpaca ayudachunlla. Pero causajuj Jehová Diospa shutipimi jurani, si chaishuj pariente na ayudangapaj munajpica ñucapachami ayudasha. Shinaca pacaringacaman caipi quidailla”* nircami.
14 Rutca Boazpa chaqui ladopimi pacarirca. Ama pipash ricuchunmi nara ali punllayajpillata Rutca jatarirca. Boazca trillana pambapi shuj huarmi pacarishcata pipash yachachunga na munarcachu.
15 Boazca Ruttaca “canba jahualla churajunata ricuchi” nircami. Shina ricuchijpimi 55 libra* cebadata churarca. Chai jipaca Rutman apachishpami cacharca. Chaihuanmi Rutca llactaman tigrarca.
16 Rut huasiman chayajpimi Noemica “ñuca huahualla ¿imata pasarca?”* nishpa tapurca. Shina tapujpimi Rutca Boaz paimanda imata rurashcata tucuita parlarca.
17 Rutca nircami: “Paica ‘canba suedrapa huasimanga ama chusha maquica tigraichu’ nihuarcami. Chaimi 55 libra* cebadata carahuarca” nircami.
18 Chashna parlajpimi Noemica nirca: “Ñuca huahualla cunanga cai asuntohuan ima pasajta ricungapaj shuyailla. Paica cunanllatami cai asuntota solucionangapaca pai usharishcata ruranga” nircami.
Notacuna
^ Hebreo shimipica “samana pushtuta” nijunmi.
^ O “llachapatapash”.
^ O “saquirilla”.
^ O “6 medida”. Talvez “6 medida de seas nishcami cashcanga”. Apéndice B14ta ricupangui.
^ Hebreo shimipica “pita cangui” nijunmi.
^ O “6 medida”. Talvez “6 medida de seas nishcami cashcanga”. Apéndice B14ta ricupangui.
