Santiago 3:1-18
3 Ñuca huauquicunalla, na tucuicunachu congregacionbi* yachachijcuna cana capanguichi. Congregacionbi yachachijcuna tucushpaca, Taita Diospa ñaupapica ashtahuan jatun obligaciondami charishun.
2 Tucuicunami tauca viajeta pandarinata* yachanchi. Maijanbash paipa parlocunapi nunca na pandarishpaca perfectomi canman. Paipa tucuilla cuerpotapashmi alipacha controlanman.
3 Ñucanchicunata cazuchunmi caballocunamanga shimipi bosalta churachinchi. Shina churachishpami caballo maiman rinata controlaita ushanchi.
4 Barcocunata ricupaichi. Barcocunaca jatun jatungunami can. Shinallata ninanda huairashpami barcotaca cuyuchinlla. Pero shina cajpipashmi barcota manejajcunaca timón nishca uchilla caspiguhuan paicuna maiman ringapaj munashcaman barcotaca cuyuchita ushan.
5 Shinallatami ñucanchi jalluhuanbash pasaita ushan. Jalluca ñucanchi cuerpopica shuj uchilla partegumi can. Shinapash imacunamandapash jariyanllami. Shinallata pensaripaichi, ninaca ashagutalla rupai callarishpallatami, jatun jatun bosquetaca rupachita ushan.
6 Ñucanchi jallupash, ninashnami can. Ñucanchi cuerpopa tucuilla partecunamandaca jallumi ashtahuan nali can. Porque jallumi ñucanchi cuerpo enterota mapayachinlla. Ñucanchi gulpi causaitami ninashna tucuchita ushan. Y tucuchita ushashcamandami Gehenashna* can.
7 Shinallata sacha animalcunata, jahuata volaj animalcunata, culebracunata, cocodrilocunata* mar yacupi causajuj animalcunatapashmi gentecunaca mansoyachishpa controlaita ushan y ñami gentecunaca animalcunata mansoyachishpa controlaitapash ushashca.
8 Pero jallutaca nipipash na controlaita ushanllu. Ni mandaitapash na mandaita ushanllu. Jalluca llaquichinllami. Huañuchijlla venenohuanbash jundashnami can.
9 Jalluhuanmi ñucanchi Taita Jehová* Diostaca alabanchi. Y chai jalluhuanllatami “Taita Diosman parecidota” rurashca gentecunatapash maldicinchi.
10 Chai shimihuanllatami Taita Diostaca alabanchi y chai shimihuanllatami maldicishpa rimanchi.
Ñuca huauquicunalla, shina rimanaca napacha ali canllu.
11 ¿Chai pugyumandallatachu mishqui yacupash, jayaj yacupash llujshin?
12 Ñuca huauquicunalla aceitunaca na higos yurapi fucunllu. Ni uvas yurapipash na higosca fucunllu. Ni cachi yacumandapash mishqui yacuca na llujshinllu.
13 Quiquingunapurapica ¿pita alipacha yachajushca capanguichi? Ali yachajushca cashcataca paipa causaipimi tucuita aliguman rurashpa ricuchina can.
14 Pero quiquingunapa shungupi ninanda envidiashpa y culira sintirinajushpaca, ali yachajushcami canchi nishpaca na jariyajunachu capanguichi. Shina ruranajushpaca llullanajunguichimanmi.
15 Porque chashna ali yachajushca canaca na jahua cielomandaca shamunllu. Sino cai alpamanda, animalcunamanda, demoniocunamandami* shamun.
16 Porque quiquinguna envidianajushpa y culira sintirinajushpaca shujcunahuan tranquilo caitaca na ushanguichichu. Tucui clase o tucui laya nali ruraicunatapashmi ruranguichi.
17 Shinapash jahua cielomanda ali yachaica* primeroca limpio shunguta charichunmi gentecunataca ayudan. Chai jipami tranquilo, ali causachun y intindijcuna cachun ayudan. Shinallata cazuchun, ninanda llaquichun, alicunata rurachun, tucuicunata igual tratachun, ama yangata alishnalla caj tucuchunmi ayudan.
18 Shujcunahuan ali llevarijcunaca* tranquilo ali causai tiachunmi ayudan. Paicunaca shina rurashpami ali ruraicunata* ruraita ushan.
Notacuna
^ Glosariopi “congregación” shimita ricupangui.
^ Griego shimipica “nitijanata” nijunmi.
^ Jerusalén llacta canllapi basurata rupachina pushtutami “Gehena” nin carca. Glosariopi “Gehena” shimita ricupangui.
^ O “alpapi llucashpa purij animalcunata”.
^ O “ayacunamandami”.
^ O “sabiduriaca”.
^ O “shujcunahuan ali causajcunaca”.
