Santiago 5:1-20
-
Charijcunaman cushca advertenciacuna (1-6)
-
Pacienciata charijcunata y aguantajcunataca Taita Diosca bendicianmi (7-11)
-
“Ari” nishpaca, chai ari nishcataca cumplinami capanguichi (12)
-
Tucui shunguhuan crishpa mañashcacunaca ashtaca podertami charin (13-18)
-
Pecadorcunataca ali ñanman tigrachun ayudanami capanchi (19, 20)
5 Charij gentecuna uyapanguichi. Llaquicuna japij shamunata yachaimandami, quiquingunaca huacana, llaquirina capanguichi.
2 Quiquingunapa charishcacunaca ñami ismushca. Quiquingunapa ropatapash* ñami polilla jurucuna micushca.
3 Quiquingunapa oropash, culquipash ñami oxidarishca. Shina oxidarishpami quiquinguna culpata charishcata ricuchinga. Y quiquingunatapashmi tucuchinga. Quiquingunapa tandachishcacunaca ninashnami último punllacunapica canga.
4 Quiquingunapa pambacunapi cozechashpa trabajajcunaca paicunaman na pagashcamandami caparinajun. Llaquilla caparinajujpimi ashtaca ashtaca angelcunata charij Jehová* Diosca, paicunata uyashca.
5 Cai alpapica gushtutami causanajushcanguichi. Quiquinguna ima munashcata rurashpami causanajushcanguichi. Huañuchina punllapami quiquingunaca micushpa racuyanajunguichi.
6 Alita ruraj* runagutami quiquingunaca culpanguichi y huañuchinguichi. ¿Nachu paica quiquingunapa contra shayarijun?
7 Shinaca huauquicuna, ñucanchi Señor Jesús tigramuna tiempocamanga* pacienciata charipaichi. Tarpuj runaguta ricupaichi. Paica, pai tarpushcata cozechangapami, ashatalla tamiana tiempota y shinllita tamiana tiempotaca pacienciahuan shuyashpa catin.
8 Quiquingunapashmi pacienciata charina capanguichi. Shinlli tucunami capanguichi. Porque Señor Jesús tigramuna tiempoca* ñami chayamujun.
9 Huauquicuna caishujmanda chaishujmandaca na quejarijunachu capanguichi. Shinami na juzgai tucunguichi. Ricuichi, Juezca ñami pungu ñaupapi shayajun.
10 Huauquicuna, Jehová* Diospa shutipi parlashca profetacunapa* ejemplota catipaichi. Paicunaca llaquicunatapashmi aguantarca, pacienciatapashmi charirca.
11 Llaquicunata aguantajcunaca cushillami can. Quiquingunaca Job imashina aguantashcataca uyashcanguichimi. Job shina aguantashcamanda Jehová* Dios paita bendiciashcatapash alimi yachapanguichi. Shinaca, Jehová* Dios ninanda juyaj, llaquij Taita Dios cashcataca alimi yachapanguichi.
12 Ñuca huauquicunalla, ashtahuanbachaca jahua cielomanda o cai alpamandapash juranataca saquinami canguichi. Shuj juramentocunatapash ñana rurajunachu capanguichi. Ashtahuangarin “imatapash ari” nishpaca, chai ari nishcataca cumplinami capanguichi. Cutin “imatapash na” nishpaca, chai na nishcataca cumplinami capanguichi. Chaimi Taita Diosca quiquingunataca na juzganga.
13 ¿Pita quiquingunapurapica sufrinajupanguichi? Shina cashpaca Taita Diosta mañachun. Shinallata ¿pita quiquingunapurapica cushilla capanguichi? Shinaca Taita Diosta alabangapaj salmocunata candapachun.
14 ¿Pita quiquingunapurapica ungushca* capanguichi? Shina cashpaca congregacionbi ancianocunata* cayapachun. Paicunami chai runagupa uma jahuapica Jehová* Diospa shutipi aceiteta* talishpa mañanga.
15 Tucui shunguhuan crishpa mañajpica, ungushcaca* ali tucungami. Jehová* Diosmi paitaca shinllichinga. Ashtahuangarin, ima pecadota rurashca cajpipash Taita Diosca perdonangami.
16 Shinaca ima pecadota rurashca cashpapash caishuj chaishujmi villarina capanguichi. Shinallata caishujmanda chaishujmandami Taita Diostaca mañana capanguichi. Shinami sanoyachi tucunguichi. Alita ruraj* runagupa mañashcacunaca ashtaca podertami charin. Taita Diosca chashna mañashcacunatami uyan.
17 Eliasca ñucanchishnallatami carca.* Shinapash, ama tamiachun nishpa Taita Diosta tucui shunguhuan mañajpica, quimsa huata chaupitami cai alpapica na tamiarca.
18 Chaimi Eliasca Taita Diosta cutin mañarca. Shina mañajpimi tamiarca, alpapash fucurca.
19 Ñucanchi huauquicuna, quiquingunapuramanda maijanbash cabal yachachishcacunamanda caruyashcajpi pai tigramuchun ayudashpaca,
20 yachanami capanguichi shuj pecador runata nali ñanmanda tigramuchun ayudashpaca, huañunamanda pai* salvarichunmi ayudanajunguichi. Shinallata ashtaca pecadocunamandapash pai perdonai tucuchun ayudanajushcatami yachana capanguichi.
Notacuna
^ O “llachapatapash”.
^ Glosariopi “Jesús tigramuna tiempo” shimita ricupangui.
^ Glosariopi “Jesús tigramuna tiempo” shimita ricupangui.
^ Caipica “na shinlli feta charijcunamandami” parlajun.
^ Caipica “Taita Diospa shimita utilizanatami” shina nijun.
^ O talvez “shaijushcaca”.
^ O “ñucanchishnallata sentimientocunatami charirca”.
