Tito 2:1-15
2 Pero quiquinga, ali yachachishcacunatami yachachishpa catina cangui.
2 Mayor jaricunaca, tucuipi controlarinatami yachana can. Aliguta pensarinatami yachana can. Responsablecunami cana can. Tucui shunguhuanmi crina can. Shujcunata juyanami can, llaquicunatapash aguantanami can.
3 Mayor huarmicunapash Taita Diosta respetashcata ricuchishpami causana can. Cuenteracunapash na canachu can. Yapata vinota ufiana viciotapash na charinachu can. Ali ruraita yachachijcunami cana can.
4 Shinami mayor huarmigucunaca, joven huarmigucunataca paicunapa cusatapash, huahuacunatapash juyachun consejaita ushanga.
5 Chaimi joven huarmigucunaca aliguta pensarinata yachajunga, paicunapa ruraicunapipash, pensamientocunapipash limpio canga. Shinallata, huasi ruraicunapipash trabajadoracunami canga, ali alicunami canga y cusacunamanbash sujetarishpami causanga. Shina rurajpimi shujcunaca Taita Diospa shimimandaca nalicunataca na parlanga.
6 Shinallata, ashtahuan joven jaricunatapash, aliguta pensarishpa causachunmi consejashpa catina cangui.
7 Tucuipi alita rurashpami, shujcunapaca shuj ali ejemplo cana cangui. Ima ciertopacha cashcataca, aliguta pensarishpami yachachina cangui.
8 Shinallata, ama juchachishpa rimachunmi ali shimicunahuan yachachina cangui. Shinami contracunaca, ñucanchimanda imapash nalita na ni ushashpa pingai tucunga.
9 Esclavocunaca, siempremi paicunapa dueñocunataca cazuna can. Paicunata cushichingapami munana can y na respondijunachu can.
10 Shinallata dueñocunataca na shuanachu can. Chaipa randica, dueñocuna paicunapi confiai ushashcatami esclavocunaca ricuchina can. Shinami ñucanchita Salvaj Taita Diospa yachachishcacuna juyaillagu cajta ricuchinga.
11 Taita Dios ninanda juyashcataca* tucui clase o tucui laya gentecunaman salvacionda apamujpimi ricuita ushanchi.
12 Taita Diospa ninan juyaimi* ñucanchitaca mapa causaita rechazachun y cai mundopa nali munaicunatapash rechazachun yachachin. Shinallata aliguta pensarishpa causachun, alita rurachun* y cai tiempopipash* Taita Diosta tucui shunguhuan sirvichunmi yachachin.
13 Ñucanchicuna shuyanajushca alipacha bendición pactarichun, Tucui Ushaita Charij Taita Diospash y ñucanchita Salvaj Jesucristopash paicunapa poderta ricuchichunmi shuyanajunchi.
14 Jesucristoca, paipa causaita cushpami, ñucanchitaca tucui clase o tucui laya nali ruraicunamanda salvarca y paipalla llacta cachunbashmi ñucanchitaca limpiarca. Ali ruraicunata tucui shunguhuan rurachunmi Jesucristoca shina rurarca.
15 Cai cosascunataca yachachishpa, shujcunata consejashpami catina cangui. Autoridadta charishcamandaca, shujcuna imapi pandarijushcataca ricuchinami cangui. Pipash quiquinda na sirvichishpa ricuchunga na saquinachu cangui.
Notacuna
^ Glosariopi “bondad inmerecida” shimita ricupangui.
^ Glosariopi “bondad inmerecida” shimita ricupangui.
^ Glosariopi “cai tiempo” shimita ricupangui.
