Cai huatamanda callarishpaca Jesús Huañushcata Yarina Tandanajuipa prepararingapaca ashtahuan tiempotami charigripanchi. Jesús Huañushcata Yarina Tandanajui chaupi semanapi urmajpica Jesuspa Chaquita Catishpa Causashunchi Yachachishunchi Tandanajuitaca na charipashunllu. Cutin sábado o domingo punllapi urmajpica Bibliamanda Discursota, Villajun revistata yachajungapapash na tandanajushunllu. Shinaca chai punllacunaca ¿imatata rurai ushapanchi? Punda siglopi shinami cunanbipash, chai importante tandanajuiman ringapaca imagutapash rurashpa segurana capanchi (Lu 22:7-13; km 3/15 1). Shinapash tucuicunallatami chai punlla imamanda importante cashcataca yuyana capanchi. Chaipaca:

• Chai tandanajuiman rina imamanda importante cashcapimi yuyana capanchi (1Co 11:23-26).

• Jehová Diosta mañana, paiman imashina ashtahuan quimirinapi yuyana capanchi (1Co 11:27-29; 2Co 13:5).

• Chai tandanajui imamanda importante cashcata parlaj Bibliamanda publicaciongunata liina, liishcapipash yuyanami capanchi (Jn 3:16; 15:13).

Huaquin publicadorcunaca Cada Punlla Diospa Shimita Intindingapaj folletopi Bibliata liina textocunatami liishpa chaipi yuyanata gushtan. Cutin shujcunaca cai dibujocunapi llujshishca textocunatami liinata alicachin. Shinallata huaquingunaca Jesús Huañushcata Yarinamanda parlaj temacunatami Villajun revistacunapica alicachishpa liin. Chai temacunaca Jehovapash, Jesuspash gentecunata juyashcatami ricuchin. Quiquin cai informaciongunamanda yachajushpaca Jehová Diosman, paipa churi Jesusmanbash ashtahuanmi quimiripangui.