Cai huata 23 de marzotaca casi 12 millón invitashca gentecunami Jesús Huañushcata Yarina tandanajuiman shamunga. Chai tandanajuipi yachachijuj huauquica, Jehová Dios ñucanchita juyaimanda paipa shujlla Churita cai Alpaman cachamushcata, shinallata Jesús shamushcamanda ñucanchicuna ima bendiciongunata charinatami yachachinga (Is. 11:6-9; 35:5, 6; 65:21-23; Juan 3:16). Chai huauqui shina yachachijpipash, tucuicunami invitashca gentecunataca cushijushpa chasquita ushapanchi (Rom. 15:7). Shinaca paicunata ali chasquingapaca huaquin yuyaicunata ricupashun.

• Chayashpa, tandanajui callaringacaman tianman shuyajunapa randica, mushuj invitashcacunatapash, unaillata na villachishpa tandanajuiman na shamujcunatapash cushijushpa ali chasquipashunchi.

• Quiquin invitashcacunata ali chasquina cashpapash, invitación hojata chasquishca tucuilla shamujcunatapashmi ali chasquina capanchi. Chai jipaca paihuan tiarishpami Bibliapi textocunatapash, candana folletogutapash ricuchina capanchi.

• Discurso tucurishca jipaca ¿nachu imapash tapuiguta charipangui? nishpa tapunallami capanchi. Shuj congregacionbash jipaman tandanajuna cashcamanda uchalla llujshina cashpaca ¿imatata rurana capanchi? Nara tauca punllacuna yalijpillatami cutin paihuan parlana canchi. Chaimandami paitaca tapui ushapanchi: “Cai tandanajuita alicachishcata o nalicachishcata yachangapami munapaiman. Maipita quiquinhuan parlashpa catita ushapani” nishpa.