Ñallapachami Jehová Diosca panda religiongunata tucuchinga. Shinallata ñallami ashtaca llactacuna tandanajushpa Jehovapa llactataca atacanga. Pero Jehová Diosca Armagedón punllapimi tucuilla nali gentecunata tucuchinga. Shina pasanataca tucuicunallatami shuyanajupanchi.

Ninan manllanai llaqui punllacunapi imacunalla pasanataca na yachapanchichu. Por ejemplo ima hora chai llaqui punllacuna callarinata, imata nishpa gobiernocuna religiongunata atacai callarinata, shuj llactacuna mashna tiempota Jehovapa llactata atacanata, imashina atacanata, Armagedón punllapi nali gentecunata tucuchingapaj Jehová Dios imata ruranatapash na yachapanchichu.

Jipa punllacunapi ima pasanataca na manllanachu capanchi. Porque Bibliapica jipacunaman ima pasanataca villajunmi. Por ejemplo Bibliapica cunan punllacunapica ‘último punllacunapimi’ causanajunchi ninmi (2Ti 3:1). Shinallata Bibliapica religiongunata llaquichina ‘tiempo catichunga na saquingachu’ ninmi. Shinallami Jehovata sirvijcunaca salvari ushanga (Mt 24:22). Jehová Dios paita sirvijcunata salvanataca seguromi capanchi (2Pe 2:9). Armagedón punllapi na cuentai ushanalla ashtaca ashtaca gentecunata salvachunga Jehová Dios Jesusta agllashcatapashmi yachapanchi (Ap 19:11, 15, 16).

Cai cosascuna pasai callarijpica gentecunaca “manllaimandaca desmayaitapashmi desmayanajunga” (Lu 21:26). Pero ñucanchicunaca Jehová Dios paipa sirvijcunata imashna salvashcapi pensarishpa y jipacunapi ima pasanata yaria cashpaca na manllashunllu. Ashtahuanbash Lucas 21:28​pi nishcashnami rurashun. Chaipica ninmi: “Umata alzashpa recto shayarichi. Porque canguna salvarina tiempoca ñami chayamujun” ninmi.