1. Cai librota yachajushca jipaca ¿imatata tapuringuiman?

BIBLIATA cai librohuan yachajujushpaca tauca yuyaicunatami yachajushcangui. Para siempre causanata, huañushca jipa ima tucujta, huañushcacuna causarinatapashmi ali intindishcangui (Eclesiastés 9:5; Lucas 23:43; Juan 5:28, 29; Apocalipsis 21:3, 4). Testigo de Jehovacuna Diosta ali adoraj cashcata ricushpa, paicunapa tandanajuicunaman tal vez ña rijunguichari (Juan 13:35). Taita Dioshuan ali amigo tucungapaj, paita sirvingapaj munanguichari.  Shinapash chaipaca ¿imatata rurana cani? nishpachari tapuringui.

2. Etiopiamanda runaguca ¿imamandata bautizaringapaj munarca?

² Jesuspa punllacunapi Etiopía llactamanda runagupash shinallatami tapurirca. Jesusta causachishcamanda asha tiempo jipaca Jesusta catij Felipe runagumi Etiopiamanda runamanga Diospa Shimimanda villachirca. Felipeca, Taita Dios cachamushca Mesiasca Jesusmi can nishpami ali intindichirca. Chaita ali intindishpami Etiopiamanda runaguca cashna nirca: “Ricui, caipi yacu tiashcami. ¿Ñuca bautizaringapaca, imapash jarcahuangachu?” nishpa (Hechos 8:26-36).

3. a) Jesusca ¿imatata paipa catijcunataca mandarca? b) ¿Imashinata bautizarina can?

³ Bibliapica ninmi, Jehovata sirvingapaca bautizarinami cangui nishpa. Jesuspash paipa catijcunataca mandarcami: ‘Ñucapa yachajujcuna tucuchun cai pachapi gentecunapaman rishpa, bautizanami canguichi’ nishpa (Mateo 28:19). Jesusca ali ejemplotami saquirca. Jesús bautizarijpica yacuta umapi talichishpallaca na bautizarcachu. Cuerpo entero yacupi pambashpami bautizarca (Mateo 3:16). Cunanbipash Jesusta ali catijcunataca cuerpo enterota yacupi pambashpami bautizan.

4. Bautizarishpaca ¿imatata ricuchijungui?

⁴ Bautizarishpaca, tucuicunapa ñaupajpimi Taita Diospa amigo cangapaj tucui shunguhuan paita sirvingapaj munashcata ricuchingui (Salmo 40:7, 8). Shinaca ¿imatata bautizaringapaca rurana cani? nishpa tapuripai.

5. a) Nara bautizarishpallata ¿imata rurana capangui? b) Tandanajuicunamanga ¿imamandata na faltana capangui?

⁵ Nara bautizarishpallatami Bibliamanda yachajushpa  Jehová Diosta, Jesucristotapash ali rijsina cangui (Juan 17:3, liipangui). Shinapash yachajushpa catinami cangui. Bibliapica ninmi, Diospa munaita ‘alipacha yachajunami’ cangui nishpa (Colosenses 1:9). Chaipaca Testigocunapa tandanajuicunami ayudanga. Shinaca Jehovahuan ali amigo cangapaca tandanajuicunaman na faltanachu cangui (Hebreos 10:24, 25).

6. ¿Bautizaringapaca Bibliamanda tucuita yachanachu minishtirin?

⁶ Nara bautizarishpallata tucuita Bibliamanda yachachunga Jehová Diosca na ninllu. Yaripai, Etiopiamanda runagu nara bautizarishpallata Diosmanda tucuita yachachunga na nircachu (Hechos 8:30, 31). Jehovamanda yachajunaca nunca na tucuringachu (Eclesiastés 3:11). Shinapash, bautizaringapaca Bibliamanda huaquin yuyaicunata ali intindinami minishtirin (Hebreos 5:12).

7. Bibliamanda yachajushpaca ¿imatata yachajushcangui?

⁷ Bibliapica ninmi: ‘Crishpallami Taita Diostaca cushichita’ ushan nishpa (Hebreos 11:6). Shinaca, nara bautizarishpallatami feta charina cangui. Bibliapica ninmi, punda tiempopi Corinto llactamanda huaquin gentecunaca, Jesuspa catijcuna yachachishcata ‘crishpami bautizarinajurca’ nishpa (Hechos 18:8). Shinallata Bibliamanda yachajushpaca, Taita Dios imacunatalla rurasha nishcata, Jesús huañushcapi feta charinatami yachajushcangui. Shina feta charinami juchamanda, huañuimandapash salvaita ushan (Josué 23:14; Hechos 4:12; 2 Timoteo 3:16, 17).

8. Bibliapi yachajushcata shujcunaman parlachunga ¿imata ayudanga?

⁸ Bibliamanda ashtahuan yachajushpaca, quiquinba  causaipi ali cashcata ricushpami quiquinba fe shinlliyajpi shujcunamanbash parlangapaj munangui (Jeremías 20:9; 2 Corintios 4:13). Shinaca ¿picunamanda villachina cangui?

9, 10. a) Bibliapi yachajushcataca ¿picunamanda parlai ushapangui? b) Congregacionhuan villachingapaca ¿imatata rurana capangui?

⁹ Bibliapi yachajushcataca familiaman, rijsicunaman, vecinocunaman, trabajopi cumbacunamanmi parlangapaj munangui. Chaica alimi can. Shinapash ali shimicunahuan, juyaihuanmi yachajushcataca parlanalla cangui. Jipamanga testigo de Jehovacunahuan villachingapami munangui. Villachingapaj listo sintirishpaca Bibliamanda yachachijhuan parlanallami cangui. Paimi quiquin shujcunaman villachingapaj listo cashcata, Bibliapi mandashca shina causajujtapash ricunga. Chai jipami quiquinhuan, quiquinda Bibliamanda yachachijhuanbash ishcai ancianocuna parlanga.

¹⁰ ¿Imapata ancianocunahuan tandanajuna can? Ancianocunami ricunga, Bibliapi yachajushcacunata quiquin intindijta, crijta, causaipi pactachijujta, testigo de Jehová cangapaj ciertopacha munajtapash. Yaripai, congregacionbica anciano huauquicunami tucuicuna ali cachun ricurianajun. Chaimanda paicunahuan parlanataca na manllana cangui (Hechos 20:28;1 Pedro 5:2, 3). Quiquinhuan parlashca jipami ancianocunaca congregacionhuan villachingapaj llujshi ushashcata o nara llujshi ushashcatapash villanga.

11. ¿Imamandata villachingapaca nali ruraicunata saquina canchi?

¹¹ Huaquinbica anciano huauquicunaca congregacionhuan villachingapaca, imapash nali ruraicunata saquinarami cangui ningapashchari. Shina nijpica cambiangapaj esforzarinami cangui. Gentecunaman Taita  Diosmanda villachijushpaca, ñucanchica paipa randimi parlanajunchi. Chaimandami ñucanchica Taita Diosta alicachishpa causana canchi (1 Corintios 6:9, 10; Gálatas 5:19-21).

12. ¿Imamandata tucui gentecuna arripintirina can?

¹² Nara bautizarishpallata apóstol Pedro nishcata yaringui, paica nircami: “Cangunapaj juchata Dios cungachun, ninanda llaquirishpa [‘arripintirishpa’, NM] Diospajman tigrarichi” nishpa (Hechos 3:19). Arripintirinaca ¿imata can? Juchacunamanda tucui shunguhuan llaquirinatami shina nin. Por ejemplo jarihuan, huarmihuan imapash pinganai mapa juchacunata rurashpa, jaripura o huarmipura cazarashca cuenda causashca cashpaca shungumandami arripintirina cangui. Tucuicunami juchayucuna caimandaca imapipash pandarinchilla. Chaimandami ñucanchi juchacunata perdonachun arripintirishpa Jehová Diosta mañana canchi (Romanos 3:23; 5:12).

13. ‘Diospaman tigrarichi’ nishpaca ¿imatata ningapaj munan?

¹³ ¿Arripintirinallachu minishtirin? Na. Apóstol Pedroca nircami, ‘Diospaman tigrarichi’ nishpa. Chaipaca punda nali causaita saquishpami alita rurashpa causana cangui. Intindingapaca caita yuyapai, primera vez maimanbash carropi rijushpa panda ñanda rijushcata cuenta japishpaca ¿nachu carrota shayachishpa, cutin tigrashpa ali ñanda japishpa ri callaringuiman? Shinallata, Bibliata yachajujushpaca imacunatapash saquishpa cambiana cashcatami cuenta japingui. Shinaca punda nali causaita saquishpa ‘Diospaman tigrangapaca’ alita rurashpa causangapami esforzarina cangui.

14. Jehovaman mingaringapaca ¿imatata rurana capangui?

¹⁴ Bautizarinata pensarijushpaca shuj mañaita rurashpami Jehová Diosman mingarina cangui. Chai mañaipimi, Jehová Diosman mingarishpa candallami sirvisha, ñuca causaipica canba munaitami pundapi churashpa causasha ningui (Deuteronomio 6:15).

15, 16. ¿Imamandata Taita Diosman mingarina capangui?

¹⁵ Jehová Diosta candallami sirvisha nishpaca, cusahuarmi huañungacaman ishcandimi causashun nishca cuendami can. Shuj ejemplota ricushun, shuj jarica shuj huarmiguhuanmi rijsirijun. Chai huarmiguta ña ali rijsishpaca paita ashtahuan juyaimandami cazarana shuj jatun responsabilidad cajpipash, paihuan cazarangapaj munan.

¹⁶ Jehovamanda ashtahuan yachajushpaca, paita juyaimandami tucui shunguhuan sirvingapaj munangui. Chaimandami, candallami sirvingapaj munani nishpa shuj mañaita rurana cangui. Bibliapica ninmi, Jesusta ali catingapaca ‘paipa causaita na llaquishpami’ catina can nishpa (Marcos 8:34). ¿Imashinata ñucanchi causaita na llaquishcata ricuchina canchi? Chaipaca, Jehová Diostami siempre cazuna canchi. Shinallata Jehovapa mandashcacunata cazunami ñucanchi munaicunata, ñucanchi imata ruranacunatapash yali importante cana can (1 Pedro 4:2, liipangui).

17. ¿Imamandata huaquingunaca Taita Diosman na mingarin?

¹⁷ Huaquingunaca Jehovatalla sirvishpa causanata na pactachi ushashachu yashpami, Jehová Diosman mingarinataca  manllan. Paicunaca yanmi, Jehová Diosman mingarishca jipa imapipash pandarishpaca ashtahuan nalimi canga. Jehová Diosman na mingarishpa imapash nalita rurajpica na imapash pasangachu nishpa.

18. Jehovaman mingarinata ama manllachunga ¿imata ayudanga?

¹⁸ Jehovata juyaimandami imapipash pandarina manllaita mishai ushangui. Shinallata juyaimandami, paiman mingarishpa imata nishcatapash tucuita pactachingapaj esforzaringui (Eclesiastés 5:4; Colosenses 1:10). Ashtahuanbash Jehovapa munaita pactachinapash fácil cashcatami ricungui. Apóstol Juanga nircami: “Taita Dios mandashca shimicunata pactachishpa causanajushpallami, paita juyanajushcataca yachanchi. Pai mandashca shimicunaca, pactachi ushanallami” can nishpa (1 Juan 5:3).

19. ¿Imamandata Jehovaman mingarinataca na manllana capangui?

¹⁹ Jehovaman mingaringapaca jucha illaj tucunataca na shuyanachu cangui. Paica, ñucanchi rurai ushashcatallami mañan (Salmo 103:14). Jehovallami tucuita ali rurachun ayudanga (Isaías 41:10). Tucui shunguhuanmi Jehovapi confiana cangui. “Paimi, can purina ñangunapipash aliguta pushanga” (Proverbios 3:5, 6).

20. Jehovaman mingarishca jipaca ¿imatata rurana capangui?

²⁰ Jehová Diosman mingaringapaca ¿listochu cangui? Jehovaman ña mingarishca jipaca bautizarinallami cangui.

21, 22. Feta charishcataca ¿imashinata tucuicunaman ricuchingui?

²¹ Ancianocunata coordinador huauquihuan parlashpa, ñami Jehovaman mingarircani bautizaringapaj munanimi nishpa villanguilla. Chaimi chai ancianoca caishuj  ancianocuna Bibliamanda quiquin imatalla yachajushcata parlachun arreglocunata ruranga. Chai jipami bautizaringapaj listo cashcata ricushpaca, anciano huauquicunaca testigo de Jehovacunapa shuj jatun tandanajui tiajpi bautizarinallami cangui ninga. Chai jatun tandanajuipica, shuj discursota cushpami bautizarina ima cashcata yachachinga. Shinallata discursota cuj huauquica chai  punlla bautizarinacunatami ishcai tapuicunata ruran. Chai tapuicunata contestashpami shimihuan quishpiringapaj villajushcata ricuchingui (Romanos 10:10).

²² Chai jipami cuerpo entero yacupi pambashpa bautizanga. Bautizarishpami Jehová Diosman mingarishcata,  ña testigo de Jehová cashcatapash tucuicunaman ricuchingui.

23. ‘Taitapa, Churipa, jucha illaj espiritupa shutipimi bautizarina’ cangui nishpaca ¿imatata ningapaj munan?

²³ Jesusca paipa catijcunataca nircami: ‘Taitapa, Churipa, Diospa jucha illaj espiritupa shutipimi bautizana canguichi’ nishpa (Mateo 28:19, liipangui). Shina nishpaca Jehová Dioslla mandana cashcata, Taita Diospa munaita Jesús pactachinata, jucha illaj espirituhuan Diospa munaita pactachinata crichunmi shina nin (Salmo 83:18, NM; Mateo 28:18; Gálatas 5:22, 23; 2 Pedro 1:21).

24, 25. a) Bautizarinaca ¿imata can? b) Último capitulopica ¿imatata yachajushun?

²⁴ Bautizarijushpa, cuerpo entero yacupi pambarishpaca punda nali causaita saquishcatami ricuchingui. Cutin yacumanda llujshishpaca, Diospa munaita rurangapaj mushuj causaita callarijushcatami ricuchingui. Shinallata na cunganachu cangui, gentecunapa ruraicunata catishpa, paicunahuan tandanajushpa imatapash rurangapaca na mingarishcanguichu. Jehová Diosmanmi quiquinba causaitaca mingashcangui.

²⁵ Jehovaman mingarishpaca paihuan ali amigo canatami callarijungui (Salmo 25:14). Shinapash, bautizarishpaca ñami salvarishcani nishpaca na yanachu cangui. Apóstol Pabloca nircami, quishpiringapaca tucui shunguhuan manllashpa, tucuita ali rurashpami causana canguichi nishpa (Filipenses 2:12). Shinaca, bautizarishpaca chairami salvarina ñanda cati callarijungui. Jehovamanda ama caruyangapaca ¿imatata rurana cangui? Cai libropa último capitulopimi cai tapuitaca ashtahuan yachajushun.