1. Gentecuna ¿imashina causachunda Taita Diosca munarca?

TAITA DIOSCA cai Alpataca shuj paraisota rurashpami gentecunaman cusha nin. Diosca Adanda, Evata rurashpaca paicuna shuj juyailla Paraisopi causachun churarca. Shinallata huahuacunata charishpa, cai tucui Alpata shuj juyailla paraisota rurashpa, animalcunata cuidashpa causachunmi Taita Diosca munarca (Génesis 1:28; 2:8, 9, 15. Página 208​pi nota 6​ta ricupangui).

2. a) ¿Jehovapa munaica pactaringacha? b) ¿Picunallata Paraisopica causanga?

² Cai Alpa shuj paraíso tucujpica ¿chaipicha cashun? Jehová Diosca ninmi: “Ñuca yarijushcataca pactachishapachami” nishpa (Isaías 46:9-11; 55:11). Jehovapa munai pactarichunga imapash na jarcangachu. Jehová Diosca ninmi: Cai Alpataca ‘na yanga tiachun rurarcanichu’ nishpa (Isaías 45:18). Paica gentecuna mundo enteropi causachunmi munan. Shinapash cai Alpapica ¿imashina gentecuna causachunda munan? ¿Mashna huatacunata causachunda munan? Bibliapica ninmi: “Imatapash cashcatapacha rurajcunami [o cazujcunami], llactataca japinga. Chai llactapica, causaitami causanajunga” nishpa (Salmo 37:29; Apocalipsis 21:3, 4).

3. Gentecuna huañujpica ¿imatata tapurinchi?

³ Cunanbi gentecunaca ungüicuna japijpi huañunmi. Ashtaca llactacunapica paicunapura macanajushpami huañun. Shina causachunga Taita Diosca na munarcachu. Shinaca ¿imamandata shina causanchi? Bibliapimi ashtahuan yachajushun.

4, 5. a) Evahuan parlashca culebrataca ¿pita parlachirca? b) ¿Imashinata honrado gentecunaca shuhua tigran?

⁴ Bibliapica ninmi: Diospa contraca ‘Diablo Satanasmi’ can nishpa. Diabloca jardín de Edenbi Evahuan parlachunga shuj culebratami utilizarca (Apocalipsis 12:9; Génesis 3:1). Shinami Evapa ñaupajpica culebra parlajushcashnalla ricurirca. (Página 208​pi nota 7​ta ricupangui.)

⁵ Shinaca, Taita Dioschu ¿Satanás Diablotaca rurarca? Na. Taita Dios cai Alpata Adanba, Evapa rurajujpimi jahua cielopi shuj angelca paipa munaita rurangapaj munashpa Diablo tucurca (Job 38:4, 7). ¿Imamandata shina tucurca? Shuj ejemplota ricushun, pipash shuhuaca na nacirinllu. Shinaca ¿imashinata honrado gentecunaca shuhuaman tigran? Shujcunapa cosascunata cutin cutin munashpa ricujujpi nali munaicuna shungupi mirajpimi jipamanga shuhua tigran (Santiago 1:13-15, liipangui. Página 208​pi nota 8​ta ricupangui).

6. ¿Imashinata shuj angelca Diospa contra tucurca?

⁶ Chai nali angelca cutin cutin nali yuyaicunata shungupi charimandami naliman tigrarca. Jehová Adanda, Evata rurashca jipaca nircami, huahuacunata charishpa ‘tucui alpapi miranguichi’ nishpa (Génesis 1:27, 28). Chaita uyashpami paica cashna pensashcanga: “Gentecunaca Taita Diosta alicachishpa jatunyachinapa randica, ñucatami alicachina can” nishpa. Chaitallata cutin cutin pensarijuimandami nali munai paipa shungupi mirashpa catishcanga. Shinami chai nali angelca gentecuna paita alicachichun munashcanga. Chaimandami shuj punllaca chai nali angelca Taita Diosmanda llullacunata nishpa Evata umachirca (Génesis 3:1-5, liipangui). Shinami Satanás Diablo tucushpa, Taita Diospa contra tucurca.

7. a) ¿Imamandata Adanbash, Evapash huañurca b) ¿Imamandata rucuyanchi, huañunchi?

⁷ Adanbash, Evapash Diablopa llullacunata crishpami  Diosta na cazushpa ama micunguichichu nishca frutata micurca (Génesis 2:17; 3:6). Na cazuimandami paicunaca juchayucuna tucushpa, Jehová nishca shina jipamanga huañurca (Génesis 3:17-19). Adanbash, Evapash juchayucuna tucuimandami paicunapa huahuacunapash juchayucuna nacirishpa paicunapash huañurca (Romanos 5:12, liipangui). Adanba, Evapa huahuacuna imashina juchayu tucushcata intindingapaj shuj ejemplota ricushun. Ladrillocunata rurana molde vishtu cajpica ¿imashina ladrillocunashi llujshinman? Tucuilla ladrillocunami vishtu llujshinman. Adanga Taita Diosta na cazuimandami juchayu tucurca. Chaimandami, ñucanchipash Adanba huahuacuna caimandaca juchayucuna nacirinchi. Shinami rucuyanchi, huañunchi (Romanos 3:23, página 210​pi nota 9​ta ricupangui).

8, 9. a) Diabloca Adanda, Evataca ¿imatata crichingapaj munarca? b) ¿Imamandata Jehová Diosca na cazujcunataca na tucuchirca?

⁸ Adanbash, Evapash Taita Diosta ama cazuchunga Diablomi umachirca. Paicunataca Jehová Dios llulla cashcata, nali mandaj cashcata, gentecuna cushilla causachun na munashcatami Diabloca crichingapaj munarca. Shinallata ima ali cashcata, ima nali cashcatapash paicunallatami agllaita ushan. Pipash paicunata mandachunga na minishtinllu nijurcami. Chaita ricushpaca Jehová Diosca ¿imatata rurarca? Na cazujcunata chai rato tucuchita ushanmanmi carca. Shinapash, shina rurashpaca Diablo llulla cajtaca na ricuchita ushanmanllu carca.

⁹ Chaimandami, Jehová Diosca na cazujcunataca na chai rato tucuchirca. Chaipa randica gentecuna paicunallata mandashpa causachunmi saquirca. Shinami Diablo llulla cashcata, gentecunapa ima ali cashcatapash Jehovalla yachashcata ricuchirca. Chaitaca capítulo 11​pimi ashtahuan yachajushun. Adanbash, Evapash na cazushcamandaca ¿imatata yuyangui? Taita Diospa randi, Diablotara  cazushpaca ¿alitachu rurarca? Jehová Diosca jucha illaj causaita, juyailla Alpapi causanata, cushilla trabajashpa causanatapashmi Adanman, Evamanga cushcarca. Cutin  Diabloca paicunamandaca imatapash na rurashcarcachu. Quiquin chaipi cashpaca ¿imatashi ruranguiman carca?

10. ¿Imata ruranatata cada uno ricuna capanchi?

¹⁰ Ñucanchipash Jehovata cazunata, na cazunataca cada unomi ricuna canchi. Jehovata cazushpaca ñucanchillatami ali causaita charishun. Jehovapa lado tucushpaca pai mandachun munashcata ricuchishpami, Diablo llulla cashcata ricuchishun (Salmo 73:28; Proverbios 27:11, liipangui). Mundo enteropica ashalla gentecunami Jehovata cazun. Shinapash ¿Jehová Dioschu cai mundotaca mandajun?

11, 12. a) Diabloca ¿imatata Jesusmanga cusha nirca? b) ¿Ima textocunata Diablo cai Alpata mandajushcata ricuchin?

¹¹ Diablo cai mundota mandajujtaca Jesusca yacharcami. Shuj punllaca Diabloca ‘cai pachapi tucui llactacunata, chai llactacuna juyailla cajtapashmi’ Jesusman ricuchirca. Chai jipaca nircami: ‘Ñucata cungurishpa alicachijpica, caicunataca tucuillatami canman cusha’ nishpa (Mateo 4:8, 9; Lucas 4:5, 6). Pensaripai, tucui llactacuna na Diablopa maquipi cajpica ¿Jesusmanga tucui llactacunata cusha ninmanllu carca? Na shina ninmanllu carca. Imashinami ricunchi cai Alpaca Diablopa maquipimi can.

¹² Shinaca tapuringuichari, ¿imashpata Diabloca cai Alpata mandajun? ¿Nachu Jehová Tucuita Ruraj, Tucui Ushaita charij Dios? can nishpa (Apocalipsis 4:11). Jehová Diosca Tucui Ushaita charij Diosmi can. Shinapash Jesusca nircami: Diablomi ‘cai pachapajtalla rurachishpa mandajun’ nishpa (Juan 12:31; 14:30; 16:11). Apóstol Pablopash nircami: Diablomi ‘cai pachapi mandajuj dios’ can nishpa (2 Corintios 4:3, 4). Shinallata, apóstol Juanbash nircami: “Cai pachapajtalla rurashpa causajcunataca, diablomi tucuicunata mandajun” nishpa (1 Juan 5:19).

13. ¿Imamandata cai Alpa paraíso tucuchun minishtinchi?

¹³ Cai mundoca ashtahuan nalimi tigrajun. Guerracuna, nali politicocuna, llullacuna, millai millai gentecunapashmi miranajun. Cai llaquicunata tucuchingapaj munashpapash gentecunaca na ushashcachu. Shinapash ñallami Armagedón guerrapi Taita Diosca tucui llaquicunata tucuchinga. Chai jipami, cai mundotaca shuj juyailla paraíso Alpaguta ruranga (Apocalipsis 16:14-16, página 210​pi nota 10​ta ricupangui).

14. a) Jehová Diosca paipa Reinopi mandachunga ¿pitata agllarca? b) Bibliapica ¿imatata Jesusmandaca nin?

¹⁴ Jehová Diosca paipa Reinopi mandachunga Jesustami agllarca. Ashtaca huatacuna huashamanllatami Bibliapica nirca, Jesusca ‘casilla ali causanata caraj Mandajmi’ canga. Pai mandanaca ima horapash na tucuringachu nishpa (Isaías 9:6, 7). Jesuspash paipa catijcunataca Diosta cashna mañachunmi yachachirca: “Can mandanaca, ucha chayamuchunmi munanchi. Imashnami jahua pachapica can munashcashna ruranajun, chashnallata cai pachapipash, can munashcashna ruranajushpami ali canman” nishpa (Mateo 6:10). Diospa Reino mandai callarishpa cai Alpapi gobiernocunata tucuchinata, shuj ali gobiernota churanatapash capítulo 8​pimi yachajushun (Daniel 2:44, liipangui). Diospa Reinomi cai Alpataca juyailla paraisota ruranga. (Página 210​pi nota 11​ta ricupangui.)

15. ‘Cai pachapash mushujmi’ canga nishpaca ¿imatata nijun?

¹⁵ Bibliapica ninmi: ‘Jahua pachatapash, cai pachatapash mushujta ruranatami shuyanajunchi. Chaipimi, imatapash cashcatapacha ruranaca’ pactaringa nishpa  (2 Pedro 3:13; Isaías 65:17). Bibliapi ‘cai pacha’ nishpaca, huaquinbica cai Alpapi causaj gentecunamandami parlan (Deuteronomio 32:1). Shinaca, ‘cai pachapash mushujmi’ canga nishpaca Taita Dios bendiciashca, cazuj gentecunamandami parlajun.

16. a) Paraisopi causajcunaca ¿imatata chasquinga? b) Chaipaca ¿imatata rurana capanchi?

¹⁶ Jesusca nircami, cai Alpa juyailla paraíso tucujpi, chaipi causajcunaca “causaita causagrinatami japinga” nishpa (Marcos 10:30). Shina causaita chasquingapaca ¿imatata rurana canchi? Juan 3:16; 17:3, liipangui. Cunanga, chai paraíso Alpagupi imashina causai tianata Bibliapi ricushun.

17, 18. Paraisopica ¿picunata causanga? ¿Imashinashi causashun?

¹⁷ Nali ruraicuna, guerracuna, shuhuacuna, millai gentecunaca ñana tiangachu. Taita Diosca cai Alpapi nali gentecunataca tucuchingami (Salmo 37:10, 11). “Cai pacha tucui manñacunacaman jatun macanajuicuna tiajtapash” tucuchingami (Salmo 46:9; Isaías 2:4). Paraíso Alpapica Jehovata juyaj, cazuj gentecunallami causanga. Para siempre tranquilo causaimi tianga (Salmo 72:7).

¹⁸ Jehovata sirvijcunaca na manllashpami causanga. Punda tiempopi israelitacunaca Taita Diosta cazujpi pai cuidanata yachashpami na manllashpa causarca (Levítico 25:18,19). Shinallata paraíso Alpagupica imatapash na manllashpa, tranquilo seguromi causashun (Isaías 32:18; Miqueas 4:4, liipangui).

19. Paraisopi granocuna fucunamandaca ¿imatata Bibliapica nin?

¹⁹ Granocunapash ninandami fucunga. Bibliapica ninmi: “Pambapipash, jahua urcu umacunapipash, granocuna” ninandami fucunga (Salmo 72:16). Ñucanchitaca “Taita Diosca bendiciangami”. ‘Alpacunapipash granocuna fucungami’ nishpa (Salmo 67:6).

20. Cai mundoca ¿imata tucunga?

²⁰ Mundo enteromi juyailla Paraíso tucunga. Gentecunaca,  juyailla causanayai huasigucunatami charinga (Isaías 65:21-24; Apocalipsis 11:18, liipangui). Mundo enteromi jardín de Edén shina shuj juyailla Alpagu tucunga. Jehová Diosca ñucanchi tucui ima minishtishcatami caranga. Bibliapica ninmi: Jehová Diosca paipa ‘maquita pascashpami, causaita charijcunataca ninanda bendicianga’ nishpa (Salmo 145:16).

21. Paraisopica millai animalcunaca ¿imata tucunga?

²¹ Animalcunapash ñana millaicuna cangachu. Gentecunaca sacha animalcunataca ñana manllangachu. Uchilla huahuacunapash millai millai animalcunahuan pugllangami (Isaías 11:6-9; 65:25, liipangui).

22. Ungüihuan gentecunataca Jesusca ¿imatata ruranga?

²² Ima ungüipash ñana tiangachu. Jesús cai Alpapi cashpaca ashtaca gentecunatami jambirca (Mateo 9:35; Marcos 1:40-42; Juan 5:5-9). Taita Diospa Reinopi Jesús mandajushpaca, gentecuna ima ungüihuan cajpipash jambingami. Chaimandami pipash ñana ninga: “Ñucaca huañujunimi” nishpa (Isaías 33:24; 35:5, 6).

23. Huañushcacunahuanga ¿imata tucunga?

²³ Huañushcacunaca causaringami. Jehová Diosca ninmi, ashtaca ashtaca huañushca gentecunataca causachishami nishpa. Chaimandami Bibliapica nin: ‘Imatapash cashcatapacha rurajcuna, imatapash cashcatapacha na rurajcuna huañushcatapash Taita Diosca causachingami’ nishpa (Juan 5:28, 29, liipangui; Hechos 24:15).

24. Paraisopi causangapaj munashpaca ¿imatata rurana cangui?

²⁴ Jehovamanda yachajushpa paita sirvinata o ñucanchi munashcata ruranataca cada unomi ricuna canchi. Jehovata sirvinata agllashpaca shamuj punllacunapica ali causaitami charishun. Cunanga Jesusmanda, Taita Diospa munaita Jesús imashina pactachinatapash ashtahuan yachajushun.