1, 2. ¿Ima tapuicunapita pensarina capangui? ¿Imamandata chai tapuicunamandaca ali yachajuna capanchi?

BIBLIATA yachajushpaca cuenta japishcanguimi Diosta adoranchi nishpapash gentecunaca nalicunata rurajta, Dios millanayachishca cosascunata rurajta (2 Corintios 6:17). Chaimandami Jehová Diosca mandan ‘Babilonia jatun pueblomanda’ o panda religionmanda llujshichi nishpa (Apocalipsis 18:2, 4). Shinaca tapurishunchi, ¿imatata ruragrini? ¿Taita Diostaca pai munashca shinachu adorajuni? O ¿ñuca munashca shinachu adorajuni? nishpa. Imata ruranatapash cada unomi agllana canchi.

² Panda religionda ña saquishca cashpaca alitami rurashcangui. Shinapash panda religionba imapash nali ruraicunata, costumbrecunata alicachishpa catinguirachari. Jehová Dios millanayachishca ruraicunataca na ruranachu canchi. Shinaca nali ruraicuna, yanga costumbrecuna ima cajta yachajushun.

3. a) ¿Imamandata santocunata adoranata saquinaca shinlli can? b) Santocunata adoranamandaca ¿imatata Bibliaca yachachin?

³ Huaquin gentecunaca Taita Diosta adorangapaj nishpami ashtaca huatacunata santocunata, altarcunata huasicunapi charishca. Quiquinbash shina charishca cashpaca Taita Diosta adorangapaj santocunaca na minishtirinllu nijpica na fácil cringuichu. Shinapash na cunganachu cangui  Jehovami paita imashina adoranataca yachachin. Bibliapica ninmi, Diosta ali adorangapaca santocunaca na minishtirinllu nishpa (Éxodo 20:4, 5, liipangui; Salmo 115:4-8; Isaías 42:8; 1 Juan 5:21).

4. a) Huañushcacunamanda imatapash ruranaca ¿imamandata nali can? b) Jehová Diosca ¿imatata israelitacunamanga mandarca?

⁴ Huaquin gentecunaca huañushcacuna ama sufrichun nishpami rezachin, misata rurachun pagan, imacunatapash huañushcacunamanda ruran. Shinapash ñami yachajushcanchi huañushcacunaca ñucanchita imapipash ayudaita, llaquichitaca na ushanllu. Huañushcacunaca na maipipash causashpa catinllu. Huañushcacunahuan parlangapaj nishpa imatapash ruranaca jatun nalimi can. Huañushca familiacuna cuenda ayacuna parlajpimi, huañushcacuna parlajujta shina uyai ushanchi. Chaimandami Jehová Diosca israelitacunataca mandarca huañushcacunahuan parlangapaj, brujocunapaman, yumbucunapamanga na rinachu canguichi nishpa (Deuteronomio 18:10-12). Página 221, 223​pi nota 26, 31​ta ricupangui.

5. Santocunata adoranata, huañushcacunamanda imatapash ruranata saquichunga ¿imata ayudanga?

⁵ Santocunata adoranata, huañushcacunamanda imapash costumbrecunata saquichunga ¿imata ayudanga? Bibliata liishpami Jehová Dios chai ruraicunata imashina ricujtapash yachajungui. Jehová Diosca chai ruraicunataca ‘millanayachishpa’ nalicachishpami ricun (Deuteronomio 27:15). Chaimandami Jehová munashca shina paita ali adorangapaj, nali ruraicunata millanayachingapaj, ayudachun mañariana cangui (Isaías 55:9). Shina rurajpica Jehovallatami panda religión yachachishcacunata saquichun ayudanga.

6. Jesús nacirishcata yarijcunaca ¿imamandata 25 de Diciembreta agllarca?

⁶ Mundo enteropimi Navidad fiestaca rijsishca can. Casi  tucui gentecunami chai fiestataca Jesús nacirishca punllata yaringapami ruranchi nin. Shinapash Navidad fiestaca panda religionba yachachishcami can. Shuj enciclopedia libroca ninmi, Roma llactamanda yanga dioscunata adorajcunami 25 de Diciembretaca indi nacirishca punlla fiestata ruran carca. Chai punllacunapimi, Jesusta catinchi nij tucushcacunata ñaupaman pushajcunaca, iglesiapi gentecuna mirachun munashpa, 25 de Diciembreta Jesús na nacirishca cajpipash, chai fechapi Jesús nacirishcata yari callarirca (Lucas 2:8-12). Chaimandami Jesuspa punllacunapi paita ali catijcunaca Navidad fiestataca na ruran carca. Shuj libropica ninmi, Jesús nacirishcamanda 200 huatacuna yalishca jipapash, Jesús ima punllapacha nacirishcataca pipash na yacharcachu nishpa (Sacred Origins of Profound Things). Navidad fiestataca Jesús Alpapi causashcamanda 300 huatacuna yalishca jipami chaira rurai callarirca.

7. Jesusta ali catijcunaca ¿imamandata Navidad fiestataca na ruran?

⁷ Ashtaca gentecunaca Navidad fiesta panda religionmanda cashcataca yachanmi. Chai punllapica fiestacunata ruran, imapash regalocunatapash caran. Inglaterra llactapi, Americamanda huaquin llactacunapipash Navidadca panda religionba fiesta cashcamandami chai fiestataca na ruran carca. Maijanbash chai fiestata rurajpica castiganmi carca. Shinapash gentecunaca asha ashami Navidad fiestataca rurai callarirca. Shinaca Jesusta ali catijcunaca ¿imamandata Navidad fiestataca na ruran? Tucuipi Jehovata cushichingapaj munashpami chai fiestacunataca na ruran.

8, 9. Punda tiempopi Jesusta ali catijcunaca ¿imamandata cumpleaños fiestataca na ruran carca?

⁸ Tauca gentecunaca paicunapa nacirishca punllata yaringapami cumpleaños fiestata ruran. Shinapash Jesusta ali catijcunaca cumpleañotaca na ruranllu. Cumpleaños fiestamanda  Bibliapi ricujpica, Jehovata na sirvijcunami chai fiestataca ruran carca (Génesis 40:20; Marcos 6:21). Cumpleaños fiestacunata rurashpaca yanga dioscunata adorangapami ruran carca. Shuj libropica ninmi, punda tiempopi Jesusta ali catijcunaca yacharcami, gentecuna nacirishca punllata yarishpa shuj fiestata ruranaca panda religionba costumbre cashcata nishpa (The World Book Encyclopedia).

⁹ Romanocuna, Griegocunaca crinmi carca, shuj huahua nacirijujpica shuj espiritumi paicunata cuidangapaj chaipi can. Chai espiritumi huañungacaman cuidanga nishpa. Punda tiempopi panda religionda catij gentecunaca, paicunapa yanga dioscunami huata pactajujta cuidanga nishpa cumpleaños fiestata ruran carca.

10. Jehovata sirvijcunaca ¿imamandata cumpleañotaca na ruran?

¹⁰ Jehová Diosca panda religionba yanga fiestacunata rurachunga na munanllu (Isaías 65:11, 12). Chaimandami Jesusta ali catijcunaca cumpleaños fiestacunata, panda religión costumbre imapash yanga fiestacunataca na ruran.

11. Huaquin gentecunaca ¿imamandata fiestacunata ruran? ¿Imatata ashtahuanbachaca mascana capangui?

¹¹ Huaquin gentecunaca yachanmi Navidad fiestapash, shuj fiestacunapash panda religionmanda shamujta. Shina yachashca jahuapash chai fiestacunata rurashpa catinrami. Gentecunaca ninmi, chai fiesta punllapimi gulpi familiapura tandanajushpa yalita ushanchi nishpa. ¿Quiquinbash shinallatachu pensangui? Jehovallatami familiacuna tiachun callarichishca. Chaimandami, familiahuan shuj tiempoguta yalichun, familiahuan ali llevarichun munan (Efesios 3:14, 15). Shinapash ñucanchi familiata cushichinamandalla imapash panda religionba fiestacunata ruranapa randica, Jehovahuan ali canatami ashtahuanbachaca  mascana canchi. Chaimandami apóstol Pabloca nirca: “Jesús munashcashna causanatami yarina canguichi” nishpa (Efesios 5:10).

12. ¿Ima fiestacunata Jehovapa ñaupajpica nali can?

¹² Tauca gentecunaca ninmi, fiestacuna maipi callarishca cajpipash na importanllu nishpa. Shinapash Jehová Diosca na gentecunashna pensanllu. Jehovapa ñaupajpica, panda religiongunapa yanga fiestacunata rurana, banderapa ñaupajpi cungurinaca nalichu can. Shuj ejemplota ricushun, Egiptopi causajcunaca paicunapa yanga dioscunamanmi fiestacunata ruran carca. Paicunapa costumbrecunata catishpami israelitacunaca Egiptomanda llujshishca jipalla shuj yanga fiestata rurarca. Chai fiestataca israelitacunaca “Mandaj Diospaj jatun fiestami” can nircami. Shinapash chaita rurashcamandaca Jehová Diosca israelitacunata castigarcami (Éxodo 32:2-10). Profeta Isaiasca nircami: “Imapash mapataca, na tacarinachu canguichi” nishpa (Isaías 52:11, liipangui).

13. Yanga fiestacunata saquigrijushpaca ¿imatata tapuringuiman?

¹³ Yanga fiestacunata saquigrijushpaca tapuringuichari, trabajopi cumbacuna Navidad fiestata ¿imashpata ñana rurangui nishpa tapujpica imatashi nisha? Pipash Navidad punllapi imatapash carajpica ¿imatashi rurasha? Ñuca cusa o huarmi imapash fiestata ruranami canchi nijpica ¿imatashi rurasha? Imapash fiestacunata o cumpleaños fiestata na rurajpi huahuacuna ama llaquilla cachunga ¿imatata rurana cani? nishpa.

14, 15. Feliz navidad nijpi o yanga fiesta punllapipacha imatapash carajpica ¿imatata rurana capangui?

¹⁴ Pipash ñucanchicunata feliz Navidad nijpica pagui ninallami cangui. Shinapash imata ruranata, imata ninataca alimi pensarina cangui. Shinallata imamandata na feliz Navidad ningui nishpa tapujpica cushilla, respetohuan,  aliguman intindichinallami cangui. Bibliapica ninmi: ‘Pi imata tapuchijpipash, cachihuan mishquiyachishpa aliguta villangapaj ña yachajushcallami purina canguichi’ nishpa (Colosenses 4:6). Shinallata ninallami cangui shuj regalota carana, asha ratoguta cushilla yalinaca alimi can. Shinapash yanga fiestacunamandallaca na shina ruranichu nishpa.

¹⁵ Pipash yanga fiesta punllapipacha imatapash carajpica ¿imatata rurana cangui? Bibliapica, caita chaita rurailla nishpaca na shuj listata churashcachu. Shinapash imata ruragrijushpapash ñucanchi conciencia ali cachun, ali yuyashpami rurana cangui ninmi (1 Timoteo 1:18, 19). Huaquinbica yanga fiestacunata na rurajta na yachaimandami pipash quiquinmanga imatapash caranga. Shinallata cashna ningapashchari, cai fiesta punllata quiquin na rurajtaca yachanimi, shinapash cai regalotami carangapaj munapani nishpa. Shina nijpica, chai regalota chasquinata o na chasquinataca quiquinmi ricuna cangui. Chasquishpa o na chasquishpapash quiquinba conciencia ali cachunmi ricuna cangui. Imatapash nali ruraimanda Jehovapa ñaupajpi nali ricuringapaca na munanchichu.

16. Quiquinba familia imapash fiestacunata ruragrijujpica ¿imatata rurana capangui?

¹⁶ Quiquinba familia shuj fiestata ruragrini nijpica ¿imatata rurana cangui? Paicunahuanga na culirajunachu cangui. Paicuna ima fiestata rurangapaj munashpapash rurai ushanmi. Imashinami quiquin imagutapash rurajpi paicuna respetachun munangui, shinallatami respetashpa, juyaihuan tratana cangui (Mateo 7:12, liipangui). Shinapash, chai fiestapi quiquin paicunahuan yalichun munajpica ¿imatata rurana cangui? Imatapash nara rurashpallatami ali decisionda agllangapaj Jehová Diosta mañana cangui. Chai fiestata  imamanda ruragrijujtaca alimi ricuna cangui. Shinami, Jehová Diosta cushichingapaj munashcata ricuchingui.

17. Quiquinba huahuacuna ama llaquilla sintirichunga ¿imatata rurana capangui?

¹⁷ Gentecuna paicunapa huahuacunaman imapash yanga fiestacunata rurajta ricushpa quiquinba huahuacuna ama llaquilla sintirichunga ¿imatata rurana cangui? Chaipaca huahuacuna cushilla yalichunmi shuj punllacuna huahuacunahuan imagutapash rurana cangui. Shinallata shuj regalogutapash caranallami cangui. Shinapash imatapash caranata yalica paicunahuan yalichun, juyaita ricuchichunmi minishtin.

18. ¿Imamandata Testigocunapa tandanajuicunaman rina capangui?

¹⁸ Jehovata cushichingapaca panda religionba costumbrecunata, yanga fiestacunatapash saquishpa, ali religión yachachishcatami pactachina cangui. Chaipaca testigo de Jehovacunapa tandanajuimanmi rina cangui (Hebreos 10:24, 25, liipangui). Chai tandanajuicunaman rishpaca Diosta ali adorajushcatami ricuchingui (Salmo 22:22; 122:1). Shina tandanajushpami caishujmanda, chaishujmanda animarinchi (Romanos 1:12).

19. Bibliapi yachajushcataca ¿imamandata villachina capangui?

¹⁹ Bibliapi yachajushcata shujcunaman parlashpaca Diosta ali adorajushcatami ricuchingui. Cai Alpapi nali cosascuna pasajujta ricushpaca ashtaca gentecunaca llaquillami sintirin (Ezequiel 9:4). Shina llaquilla gentecunata ¿rijsinguichu? Shinaca paicunamanbash shamuj punllacunapi juyailla ali causai tianata villanami cangui. Tandanajuicunaman rishpa, Bibliapi yachajushcata shujcunaman villachishpaca, panda religionba costumbrecunata catingapaca ñana munanguichu. Jehová Diosta ali adorangapaj esforzarijujpica pai bendiciajpimi cushilla causangui (Malaquías 3:10).